PONGWANG LAIPEX 19
19
Sodom Nok Ochax
1Sodom nok to kaxtaimix mixsün anyi nguikya hansong ma, Lot a tingnu pan ma thungle tüikya. Chixe hokhi ngünkya shemle, chix ajong ilaxle hokhi füi apong ang lai. Chix hokhi chitong ma akhuxle shwom. 2Chixe thüi: “Alixachong nyi, ku a ikhama hünzom thotha ang ngopu. Kwom hom to nguihax. Hünkhie cha-chakbu tsuxlaxle hom ma nazak wünpom le chang ang tsuaküi. Ngainop swomsae zolaxle hünkhi pao angkya khato achexle pao ang tsuak.”
Ikoxle hokhie lan: “Tax, kukhie zangnak ija tingnu panja to akai lax-angpuix.”
3Chixe atsangle ngokya oshukma hokhi chix hom to wünpom ang ngui. Wünpa nyi hanpakma müile fongmok-tiktale chang angkya Lot-e chix dabu füi akax. Amyet-akhomle changkya zuma hwome ija sax-lingle chang.
4Wünpa nyi lyakho to madongkya bama, Sodom nok angkya khünaknue ija hom akhople kop. Tingnu angkya khünaknu, azupa makhange naosa to lünle ikhama tüikya. 5#Kax 19.22-24.Hwome Lot sele alailaxle ataüi: “Aja nang hom ma wünpom ang nguikya mixsün anyi ojong? Okhi ikhato kwom hato alaihüi!” Sodom nok angkya khünakbue hokhi füi sheko-lüka mwot moksele sung.
6Lot a homtho to lai ilaxle tokfüi ma kahak. 7Chixe hwom ang thüi: “Kue hünzom ma chingcha jupu, iningkya chichang-chizang mwot ija nyi füi sütaxmokünfa! 8Hulax, ku ang naochasa anyi tüile. Kue hokhi hünzom hato alaifang. Hünzome chemle mokse tsupuix ija hünzome hokhi füi moklax. Ikoxlechu ija wünpa nyi to chemle chu taxchangünfa. Okhi a ku hom to nguikya wünpa nyi changle. Okhi khose angkya a ku mwot changpu.”
9Ikoxle hwome thüi: “Nang püntüi, ikhama taxngo! Kwom hama ija taxmok, ija moklax le akax angkya nang owa? Lomshan lax, chichangthüiba ibu to hwonse süthak le kwome nang to hwon angkya awancha?” Hwome Lot thwomle apao ilaxle kahak daple ama ang hüi. 10Ikoxle hommong angkya mixsün nyie chak thui laxle Lot bele hommong to anop ilaxle ka hak. 11#2 Wa 6.18.Ifüima hokhie homthoma tüikya khünak noknusa ang mik apwom ang tom, ikhoma hwome kahak lomle chiataktsuak.
Lot-e Sodom Dantoxkya
12Ija mixsün anyie Lot ang thüi: “Nang ang owawa: su-sa hwom, nomcha hwom, chichangba owawa ma-mix ija tingsho ma ngokya mix jangtüiba: hwom ija tingsho angkya paokox, 13chemthüikoxle kwome ijakha amüt angkya changle. Ikha angkya khünakbu bama kaxhux-fekya Jowanpae huanuma atatle hüidaoa ilaxle kwom a ija Sodom tingnu amüt angkya hanpakma tsanle ahüikya changpu.”
14Ikoxle Lot a chix sacha hwom lax angkya khünakbu füi apong ang paole akax: “Momlax, ikha angkya laile paohax; ikha a Jowanpae amüt angkya changle.” Ikoxle hwome chix kax a abaokya ang laxle apa.
15Swomsa ma kaxtaimix nyie Lot nonole apao ang azongle ngo. Okhie thüi: “Momlax! Ija tingnu maxpongma hünzom chiwom angkya hanpakma nang kakonu hia sacha nyi koplaxle momle achexün.” 16#2 Pit 2.7.Lot a paose chitsu. Tütale wüi changkoxchu Jowanpae chix to chingcha; ikhoma ija mixsün nyie chak ma syetle, Lot, chix kakonu üntoxle sacha nyi, hwom bibi tingnu akaile apao. 17Ifüima kaxtaimix tuitae thüi: “Hünzom khang azang ang zikle paolax! Aküile taxhu chichangba haxsha to zak-zui le taxchang. Hünzom chilang angkya hanpakma haxhua chito zikle paolax.”
18Ikoxle Lot-e lan: “Münchang, alixachong-hom, kwom ile chang ang taxtom. 19Hünkhie kwom azün laxle ku to ching-chahudaoa. Ikoxlechu haxhuabu a ochu towüi; kue thama apongüi changa, ikha ma-alop ma wüi ku zile paoüi changa. 20Hünkhie chuja tingsa ngüncha? Ija a nuisox changle. Ku ikhato pao ang koxhüi: ikha a onui hixkya changle: ku ikhato ozün ma ngo ang müiüi.”
21Chixe lan: “Müiüi, naxchanglax. Kue ija tingsa münamütpu. 22Momlax! Ziklax! Nange ikha ma-alopba kue chemchu mok ang müntsuak.”
Lot-e ija tingsa changle le thüikya khoma, ija noksa ang Zoar#19.22: zoar: Ija mün a Ibri ma hixkya le thüikya kax. le nyak.
Sodom hia Gumorah Maxkya
23Lot-e Zoar alop pongma zanghan a dongle changüna. 24#Mat 10.15; 11.23,24; Luk 10.12; 17.29; 2 Pit 2.6; Jud 1.7.Jowanpae allele Sodom hia Gomorah ding ma chuale ngokya khat zangwat ningle düt ang tom. 25Tingnu pangnyi tamchu haxsha komkaile amüt, ibu füi tomle ikhama tüikya khünak-mixsa hia haxtok ma alailai komle amüt. 26#Luk 17.32.Ikoxle Lot kakonue aküile hu ikhoma she a hum longlo ang achangle pao.
27Ofüinop swomsae Abraham, Jowanpa hokhi ajongle ngokya haxkho alop ang zikle pao. 28Chixe Sodom hia Gomorah üntoxle haxsha pangwüi to asongle hukoxle chaxwan angkya wünkhut laile, tsanzok wünchao lailaile ding to dongkya ngün. 29Ikoxlechu haxsha ma tüikya, Lot ngokya tingnubu amüt pongma, chixe Abraham texle atak ilaxle Lot a zingmüi ma paole azang ang tom.
Moab nok hia Amon Nok Tongpu
30Lot a Zoar ma ngo ang chazakya khoma, chix a sacha anyi koplaxle haxhua chito dongle longlua tuita ma ngo. 31Hona mixe honao ang thüi: “Künyi hopa a azupu, ilaxle künyi tuiju-nasomle supux-sapaile chang angkya chaxwannu#19.31: chaxwannu ma; chichangba ija haxtok ma. ma lüka owangaxchu chitüi. 32Oman, künyie pi apa to ju ang atok-hax, ikoxtix künyi chix füi jip-pom manüi ifüimatix chix makhange supux-sapaile chang ang tsuaküi.” 33Ija ja hokhie chix ang ju aling, ilaxle nüchongnu chix füi jip-pomle chang. Chix to jue müimamale tokkya khoma chixe ibu chemchu chiawan.
34Ofüinyix honae honao füi akaxle thüi: “Ku müja chix füi jip-pomle changpu; aja chuwüi chix jutok ang tomhax, ilaxle chix füi nang jiplax. Ifüima künyi pangnyi ang wüi apa makhange süshix naosom nguidongle changüi.” 35Ikhoma ija chuwüi hokhie chix to ju ang atok, ilaxle honao chix füi jip-pomle chang. Chix müimamale jutok le changkya khoma ija chuwüi chixe ojao chiawan. 36Ile Lot sacha pangnyi wüi hopa makhange nao nguidongle chang. 37Nüchongnue sasün tuita ngün. She-e chix ang Moab#19.37: moab: Ija mün a Ibri kax ma “ku apa makhange”, le changle. le mün kox. Chix a anyixkya Moab nok putong changkya. 38Honao ang chuwüi sasün tuita ngün. She-e chix ang Benami#19.38: benami: Ija a Ibri kax ma “ku mamix sasün”, le changle ilaxle Ibri kax ma “Amon nok”, le thüikya ningle changpu. le amün. Chix a anyixkya Amon nok putong changkya.
Currently Selected:
PONGWANG LAIPEX 19: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.