PONGWANG LAIPEX 17
17
Khwonzüt-Zom,#17.0: khwonzüt-zom: Lüka opong tun angkya khwonnüi zütle awütkya Zom. Tsaotsüt Münwan
1Chemtue Abram zanglao puli-aku changkya hex, Jowanpa chix hato ngai ilaxle akax: “Ku a Khüthak Zang changpu. Ku kax ma laxlax ilaxle chem supuix ija moklax. 2Kue nang füi ku Tsaotsüt laxüi ilaxle nang ang sixli huanuma tüiüi.” 3Abram-e chix thün hax to lyetle akhux, ilaxle Zang-e akax, 4“Kue ija Tsaotsüt nang füi laxpu: Kue tsaopu nang a jat-li obiobi hopu ang achangüi. 5#Rom 4.17.Nang mün a Abram münchang ikoxle Abraham ang changüi,#17.5: abraham: Ibri kax ma ija mün a “Jat-libu hopu”, le changle. chemthüikoxle nang a kue obiobi jat-libu hopu ang achangpu. 6Kue nang ang su-sa hwom huanuma koxüi, ilaxle hwom khama züizüi a wanghom angchu changüi. Nang su-sa hwom huanuma tüikya khoma hwom a ojat-olibu ang achangüi.
7 #
Luk 1.55. “Oshuk-chitüikya Tsaotsüt tuita ang kue ku kaxtsao füichima nang füi tamchu nang su-sa hwom füi thom ang tomüi. Ku a nang Zang tamchu nang su-sa hwom Zang ang ngoüi. 8#Mwt 7.5.Athax nang püntüi tuita ang achangle tüikya ija haxtok kue nang ang tamchu nangsu-nangsa hwom ang koxüi. Kanan haxtok komkaile othuithui hanpak ang nangsu-nangsa hwom haxtok ang achangüi ilaxle ku a hwom Zang ang ngoüi.”
9Zang-e Abraham ang thüi: “Nange chuwüi ku füi tomle ija Tsaotsüt thom ang mongtsu angkya oli changle; nange tamchu füichima nangsu-nangsa hwome chuwüi tsüntsün to ija chialakle thom angkya oli. 10#Mwt 7.8; Rom 4.11.Nang üntoxle nangsu-nangsabu, hünzom pangnusae wüi, hünzom kha angkya lükaka ang khwonzütle zomzing angkya to mongtsu angkya oli changpu. 11-12Athax makhange hünzome lüka naosasa pangwüi ang puxkya füima nyix-achyet lükya to ija Khwonzüt-Zom zingle kox angkya changpu. Hünzom homkhama pux-paile changkya da su-sa hwom tamchu mixnok tokya shakle laxkya da, ibu pangnu angwüi zingle kox angkya changpu. Ijae kem bama Tsaotsüt tüikya münwan ahole ngoüi. 13Mixhuak pangwüie ija zom zing angkya changpu, ijae hünzom füikya ku Tsaotsüt a oshuk chitüikya changpule aho angkya otok to ngün ang kopkya münwan tuita changpu. 14Lüka owawa Khwonzüt-Zom chizingkya mix a ku khünak changpule münlaxüi, chemthüikoxle chixe ku füikya Tsaotsüt münthom.”
15Zang-e Abraham ang thüi: “Nange nang kakonu ang Sarai le münnyaküi; athax makhange she mün a Sarah#17.15: sarah: ija mün a Ibri kax ma “wangcha” changpu. changpu. 16Kue she to mohimanüi, ilaxle she makhange kue nang ang sasün tuita koxüi. Kue she to mohimanüi ilaxle she a jat-libu honu tuita ang achangüi, ilaxle sasün hwom khama wanghombu chuwüi tüiüi.”
17Abraham-e chix thün füi hax to thule akhux, ikoxlechu “Zanglao hota nguiünkya azupa tuitae supux-sapaile chang ang tho ang chami? Sarah angchu zangpuli-bün nguikoxle nao nguidongle chang ang chami?”, le ajang pongma chix nyi. 18Chixe Zang ma atüi: “Ishmael ang ku mantswon angkya büthüikoxle chitom angkya?”
19Ikoxlechu Zang thüi: “Ile münchang. Nang kakonu Sarah-e nang ang sasün tuita puxüi. Nange ija nao ang Isak#17.19: isak: Ija mün a Ibri ma “chix nyile”, le thüikya tha. le amün angkya changle. Kue ku Tsaotsüt chix füi tamchu chixsu chixsa hwom füi othuithuima thomüi. Ija a oshuk chitüikya Tsaotsüt changpu. 20Kue Ishmael hanpakma nange tsaiju-kaxjukya atatdaoa, ikhoma kue chix to mohimanüi. Kue chix angchu su-sa hwom tamchu sixlibu huanuma koxüi. Chix a tuita, wanghom bün-anyi hopa ang achangüi, ilaxle chix sixli hwom makhange kue chongkya jat-li zingüi. 21Ikoxlechu ku Tsaotsüt kue hünsa Isak füitix thomüi. Chix a ngaizang itukhae Sarah-e pux angkya changle.” 22Ibibi zangwün ashukkya füima Zang-e Abraham danle tox.
23Ija nyix Abraham-e Zang kax ma laxle chix homkha ma tüikya lüka sühuak pangwüi ang Khwonzüt-Zom zingle kox. Ikhama chix hom ma pux-paikya hia shakle apüikya dabu pangwüi wom. 24Chixe Khwonzüt-Zom zingpongma Abraham a zanglao puli-bün changkya. 25Sasün Ishmael a zangbün-azom changkya. 26Okhi pangnyi wüi nyix tuita ma khwonzütle zomzing. 27Abram dabu ang chuwüi hokhi füi tomle zingle kox.
Currently Selected:
PONGWANG LAIPEX 17: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.