Wanneer Ek Voel Ek Is Nie Goed Genoeg NieVoorbeeld

Wanneer ek voel ek is nie goed genoeg nie

Die God van Abraham, Petrus, Rut, Salomo, Agas, Ussia, Manasse en Ragab

Daar is talle voorbeelde van prominente gelowiges in die Skrif wat by tye gefaal het. Ons lees van Abraham, die man wat nie eers die moed gehad het om vir die farao te sê Sara is sy vrou nie (Genesis 12:10-13). God noem Homself die God van Abraham.

Hy is ook die God van Petrus, die man wat die Meester verloën het (Matteus 26:31-35). Na Jesus se opstanding was Petrus en die ander dissipels besig om vis te vang toe Hy aan hulle verskyn en opdragte aan Petrus gee. Hy het gekies om sy kerk op hierdie man, wat Hom verloën het, te bou (Matteus 16:18).

Hy is ook die God van Rut, die Moabitiese vrou. Die Moabiete was ‘n volk wat tot stand gekom het uit ‘n daad van bloedskande tussen Lot en sy jongste dogter. Tog is sy opgeneem in die geslagsregister van Jesus (Matteus 1:1 - 17). God is nie skaam oor Rut die Moabiet nie.

Hy is die God van Salomo, die koning wat ’n duisend vrouens en byvrouens gehad het en uiteindelik agter ander gode aangeloop het.

God, die God van Jakob en van Dawid is ook die God van Ragab die prostituut. Hierdie slegte vrou word op grond van die genade en ontferming van God in Jesus se geslagsregister ingesluit. God word die God van Ragab, die skandevrou.

Daar is nog baie ander mense in Jesus se geslagsregister opgeneem soos byvoorbeeld koning Agas, die koning wat goddeloser was as al die ander konings voor hom, koning Hiskia en koning Ussia, die twee konings wat hoogmoedig geword het en koning Manasse, die goddeloosste van al die konings in die Bybel wat hom uiteindelik volledig tot God bekeer het (2 Konings 21:11).

Dalk het jou lewe ook deur die valleie en donkertes van onreinheid, egskeiding en immoraliteit geloop. Maar dit beteken nie dat jy nie vergewe en genees kan word nie. Dit maak net die wonderwerk wat God in jou wil doen groter.