Jesus se Meesterklas oor Gebed

Jesus het nie aangeneem dat ons outomaties alles oor gebed sou weet nie. Hy het genadiglik sy volgelinge wat wou leer hoe om te bid, in die bergrede geleer en gesê:

“‭‭Nee, as jy bid, gaan na jou kamer toe, maak die deur toe en bid tot jou Vader wat jy nie kan sien nie. Jou Vader wat sien wat verborge is, sal jou beloon. Wanneer julle bid, moet julle nie soos die heidene 'n stortvloed van woorde gebruik nie. Hulle verbeel hulle dat hulle gebede verhoor sal word omdat hulle baie woorde gebruik. Moet dan nie soos hulle maak nie, want julle Vader weet wat julle nodig het, nog voordat julle dit van Hom vra” (Matteus 6:6-8).

“So moet julle bid:
Ons Vader wat in die hemel is,
laat u Naam geheilig word;
laat u koninkryk kom;
laat u wil
ook op die aarde geskied, net soos in die hemel.
Gee ons vandag ons daaglikse brood;
en vergeef ons ons oortredings
soos ons ook dié vergewe wat teen ons oortree;
en laat ons nie in versoeking kom nie
maar verlos ons van die Bose.”
— (Matteus 6:9-13)

Let op sommige van die waarhede wat Jesus insluit:

• Gebed hoef nie lank of ingewikkeld te wees nie.
• Gebed is nie bedoel om 'n openbare optrede te wees nie, maar gaan oor 'n verbondenheid met God.
• Gebed word deur God verwelkom. Hy reageer graag wanneer ons na Hom toe kom.
• Gebed is 'n geleentheid om God te aanbid en sy grootheid te erken.
• Gebed kan insluit om vergifnis te vra, voorsiening te versoek en God se wil te soek.
• Gebed bevorder God se koninkryk op aarde!

Ons vaardigheid en ervaring maak nie saak nie, want ons stel nie ons vertroue in die krag van ons gebede nie. Ons vertroue is in die krag van God, wat ons liefhet en na ons luister en optree wanneer ons bid. Dit is hoekom ons bid.

Die “regte woorde” of 'n sekere formule is nie die fokus van gebed nie. Jesus is.

Gebed:

"Ons Vader wat in die hemel is, laat u Naam geheilig word; laat u koninkryk kom; laat u wil ook op die aarde geskied, net soos in die hemel. Gee ons vandag ons daaglikse brood; en vergeef ons ons oortredings soos ons ook dié vergewe wat teen ons oortree; en laat ons nie in versoeking kom nie maar verlos ons van die Bose (Matteus 6:9-13)."