Oorkom Vrees, Bekommernis en AngsVoorbeeld

Dag 4: Om ander te Vrees

In die Nuwe Testament vind ons mense wat met hul vrees vir ander gesukkel het. Daar was byvoorbeeld die Joodse gelowiges wat in Christus geglo het, maar bang was om ander van hul bekering te vertel. Dit is hoe die Nuwe Testament hulle dilemma beskryf:

“Nietemin het selfs baie van die lede van die Joodse Raad tog ook tot geloof in Hom gekom, maar uit vrees vir die Fariseërs het hulle dit nie openlik bely nie, sodat hulle nie uit die sinagoge geban sou word nie; want hulle het verkies om liewer deur mense geëer te word as deur God" (Johannes 12:42-43).

Sommige van die Joodse godsdienstige leiers het tot geloof in Christus gekom. Hulle het geweet dat Hy die Messias was, en hulle het die waarheid in sy uitsprake gesien. Maar hulle het 'n probleem gehad: hulle het geweet dat, as hulle hul geloof bely, hulle uit die gemeenskap — en die sinagoge — verban sou word. Ek is seker jy kan jou hul moeilike situasie voorstel. Die sinagoge, vir die antieke Jood, was nie soos vandag se moderne kerk nie. As ons oortuigings vandag met die kerk bots, kan ons maklik oppak en iewers anders gaan. Dit is egter nie hoe dit vir hulle was nie. Hulle het een sinagoge gehad, en het 'n verpligting gehad om dit te ondersteun. Hulle totale sosiale en ekonomiese lewe was gekoppel aan die assosiasies in die groep. As hulle uit die sinagoge geban is, is hulle in wese uit elke sosiale en sakeverhouding in hul lewe verban.

Let op dat Johannes nie sê dat hul probleem dié was van 'n swak selfbeeld of gevoelens van minderwaardigheid nie. Nee, hy identifiseer hul probleem as 'n probleem van liefde. Wat het hulle meer liefgehad as die goedkeuring van God? Die goedkeuring van mense. Waarna het hulle meer verlang as die lof wat van God tot hulle sou kom: “Mooi so, goeie en getroue dienskneg”? Hulle was lief vir hul eweknie se lofprysing. Trouens, hulle het dit so liefgehad dat hulle Christus se opdrag om vir Hom te getuig, verontagsaam het.

NADENKE

Is daar enige persoon (of groep mense) waarvoor jy bang is? Bestee tyd om vir hierdie persoon of mense te bid, en vra God om jou 'n Christelike liefde vir hulle te gee — 'n liefde wat homself nie bemoei met hoe ander op jou reageer nie.