Jy Is UniekVoorbeeld

Jy is 'n unieke skepping

Wie van julle besit ‘n Gucci of Dolce & Cabana handsak? Aah! Julle is bevoorreg. Mag ek nou baie persoonlik raak en vra: Is dit ‘n regte een of ‘n namaaksel? Hoe weet 'n mens wanneer dit ‘n nagemaakte een is en wanneer dit die ware Jakob is? Gewoonlik word 'n mens nogal sterk deur die prys gelei, nè? ‘n “Designer’s Original” is altyd baie duurder as ‘n nagemaakte een. Daar is hordes van die nagemaaktes – jy koop hulle sommer op die vlooimark.

Almal van ons sou graag eerder ‘n regte een bo ‘n nagemaakte een verkies.

‘n “Designer’s Original” - dis wat jy is. Jy is nie soos enige iemand anders nie. Jy is uniek. Jy kan jouself met niemand anders vergelyk nie. Die meeste van ons lae selfbeeld probleme kom juis daarvandaan, dat ons onsself die heeltyd met ander vergelyk. Ons raak dinge kwyt soos: Ek wens ek was so maer soos sy; ek wens ek het so ‘n mooi vel gehad soos sy; ek wens ek kon so gemaklik met mense gesels; ek wens ek was nie so skaam nie ... Het jy al daaraan gedink dat die Here juis soveel moeite gedoen het en so versigtig te werk gegaan het om jou juis so uniek te maak, dat jy nooit ooit weer gedupliseer kan word nie?

Ons sterf tien dode as iemand per geleentheid dieselfde rok as ons aanhet, maar tog gebruik ons nie dieselfde beginsel as dit kom by ons liggame, ons eie aantreklikheid, ons persoonlikheid en ons gawes nie, dan wil ons soos iemand anders wees. Ons vergeet dat ons eintlik ‘n “Designer’s Original” is.

Ons is die produk van God se kreatiwiteit en liefde. Dit is iets wat nooit kan verander of van jou af weggeneem kan word nie.

Jy en ek moet leer om van onsself te hou en onsself te aanvaar. Die gesoute aktrise, Judy Garland, het gesê: “Always be a first rate version of yourself, instead of a second rate version of somebody else.”

Gebed: Dankie Here dat U my so uniek gemaak het. Leer my om myself te aanvaar en lief te hê net soos ek is. Amen.