Koninkryksmanne wat Opstaan: 'n 8-dag leesplan Voorbeeld

Lê die Grondslag

Om sterk spiere te ontwikkel behels 'n proses van spierweefsel wat moet skeur om jou liggaam die geleentheid te gee om spiergroei te bevorder. Die proses van spierbou is pynlik omdat jy nie jou spiere op 'n ander manier kan versterk nie.

Net so kom die ontwikkeling van jou geestelike wandel as 'n koninkryk-man dikwels tydens die probleme en pynlike scenario's van die lewe. Dit is wanneer die meeste mans geestelike groei sal ervaar, as ons op die regte manier op ons uitdagings reageer. As jy egter kies om bloot jou seer te behandel en oor die ervaring te kla, sal jy nie groei nie. Dit is net wanneer jy deur die pyn werk dat jy heerlikheid aan die ander kant ontdek.

Koninkryk-mans het 'n geestelike erfenis van die Here ontvang, maar hierdie erfenis is nie net vir hulle nie, dit is vir almal wat met hulle in aanraking kom. Om eerbied te hê vir wat aan hulle gegee is, moet koninkryk-mans op hul geestelike groei en ontwikkeling fokus. Dit is die verantwoordelikheid van elke koninkryk-man om hulle koninkryks-erfenis met ander te deel. Dit is die proses van dissipelskap. Dit is die proses waar een koninkryk-man die waardes van die koninkryk neem en dit aan 'n ander oordra wat dit dan weer aan 'n ander man sal oordra.

Hierdie is ons verantwoordelikheid. Dit is wat Abraham met sy seun Isak gedoen het. Wat Elia met Elisa gedoen het. Wat Jesus met die twaalf dissipels gedoen het. Wat Paulus met Timoteus gedoen het. Ons moet niks minder doen nie. Selfs al beteken dit om uit jou gemaksone te tree. Om vir God te staan sal nie altyd gewild wees nie, maar dit sal altyd goeie vrug lewer.

Dissipelskap verg vrymoedigheid. Selfvertroue. Liefde. Bewustheid. Toewyding. Miskien het jy van hierdie eienskappe gebruik om die koninkryk-man te beskryf. Moeilike gesprekke oor onderwerpe soos die waarheid, sonde en verlossing is nie maklik nie. Dit verg moed. Mense wil nie altyd die waarheid hoor nie. Dissipelskap is nie noodwendig pret nie. Liggaamsbou en gewigoptel is ook nie pret nie. Tog is dit alles nodig om ons spiere sterk te kry. Net so is dissipelskap nodig vir 'n koninkryk-man om sy geestelike erfenis oor te dra.

Die oordrag van koninkryks-waardes moet op 'n gereelde basis plaasvind deur persoonlike voorbeelde en eerlike gesprekke oor daardie voorbeelde. Dit word nie net deur seminare, boeke of radio uitsendings gedoen nie. Daardie dinge is ook goed, maar dit is aanvullend. Die oordrag van koninkryks-waardes, soos dit duidelik in die Bybel beskryf word, vind van persoon-tot-persoon en hart-tot-hart plaas.

Die oorsaak van al die probleme wat ons in ons land, gemeenskappe, kerke, gesinne en ook in ons eie privaat lewens in die gesig staar, is hierdie gebrek aan die oordrag van koninkryks-waardes. Dissipelskap is ‘n eenvoudige proses, maar dit is nie maklik nie. Dit is hoekom ons sterk in die genade van Jesus Christus moet wees. Ons kan egter altyd seker wees, die genade wat ons nodig het, sal altyd voorsien word namate ons meer soos Jesus word.