Jy is ’n Kosbare Dogter Van Die Koning Voorbeeld

Jy het reg gekies

Van die eerste dag wat jy ’n doelbewuste besluit kon neem, het sonde mag oor jou gehad. Jy het dit gekies. Jy het dalk nie ’n “verskriklike” sonde gedoen nie; maar dit was tog sonde. Jy dink dalk jy is ’n onafhanklike persoon wat nie onder enigiemand se mag staan nie, maar jy is verkeerd. Iemand kies óf vir God óf vir die sonde. En om nie te kies nie, is steeds ’n keuse …

Vandat jy Jesus as jou Verlosser aanvaar het, het jy ’n verhouding met God, wat beteken dat jy nou onder sy beheer staan. En daar is geen beter plek om te wees nie! Dit klink dalk teenstrydig, maar om onder God se beheer te wees, gee in werklikheid vir jou vryheid, want Hy het jou lief en wil net die beste vir jou hê. Sy mag druk jou nie af nie, dit hef jou op en gee vir jou die krag en wysheid om jou beste lewe te leef. Jy het reg gekies!

God gee altyd sy heel beste aan dié wat Hom kies. (Jim Elliot)