Die Goeie Nuus oor VersoekingVoorbeeld

Waarheid 1: Ons is nie alleen nie

In die hitte van die stryd teen versoeking is dit vir my maklik om te voel dat ek die enigste mens op aarde is wat my pad deur die warboel van bose gedagtes en begeertes moet vind. Die apostel Paulus het die kerk in Korinte met hierdie woorde gerusgestel: “Geen versoeking wat meer is as wat 'n mens kan weerstaan, het julle oorval nie” (1 Korintiërs 10:13).

Die goeie nuus is dat ons nie alleen in ons versoekings is nie!

Al ons versoekings is in werklikheid doodgewoon — algemeen, tipies of alombekend. Tog is dit die Satan — na wie Jesus in Johannes 8:44 verwys het as "die vader van die leuen" — wat ons mislei om te dink dat ons versoekings uniek is. Niks is verder van die waarheid nie. Alle mense worstel dag in en dag uit met dieselfde soort bose gedagtes en begeertes as ek en jy. Dis gevaarlik om te glo dat ons versoekings uniek is, want dit kan veroorsaak dat ons deur 'n gevoel van skaamte oorweldig word, wat ons laat twyfel aan God se innige liefde vir ons.

Boonop kan ons getroos word in die wete dat Jesus met presies dieselfde versoekings geworstel het terwyl Hy op aarde was! Die enigste verskil is dat Hy nooit onder die druk geswig en vir sonde ja gesê het nie — en dit is wat Hom laat kwalifiseer het om die volmaakte offer vir ons sondes te word.

Hou dus moed — jou versoekings is nie uniek nie en jy is nie alleen nie — God is by jou en Hy wil jou help.

Gebed:

Vader, dankie dat ek nie alleen in my versoekings is nie. U is hier by my, elke tree van die pad. Gee my asseblief u krag om nee te sê wanneer ek in die versoeking kom. Gee my ook die geloof om te glo dat U my wel vergewe wanneer ek swak is en ja sê vir versoeking. Amen.