Aan Die Voete Van Die VaderVoorbeeld

Maar God …

Baie van ons het ’n “maar” in ons lewe. Daardie skadu wat soveel van die goeie en die mooi in ons lewe verduister en ontsier – soos Naäman se “maar melaats”. Daar is egter ’n ander “maar”, die groot maar, die “maar God”. Dis waarna Paulus in ons Skrifvers verwys. Nadat hy in die eerste drie verse van Efesiërs 2 die sondige en hooplose toestand van die Efesiërs uitgewys het, kom hy met die twee woorde wat alles verander: “maar God … ”

Paulus sê: “Maar God, wat ryk is in barmhartigheid … ” Barmhartigheid, genade, liefde – God is ryk daarin; Hy is ʼn genade-magnaat; Hy boer met genade en barmhartigheid. Dit is wat ons as mense die nodigste het. Ons elkeen kom soms op ’n plek in ons lewe wanneer ons niks anders as God se barmhartigheid nodig het nie.

Barmhartigheid kan jy nie verdien nie, jy kan dit nie koop nie. Jy kan net leë hande uitsteek na God en Hom smeek daarom. Dank die Here dat sy genade nie gerantsoeneer word omdat dit uit voorraad raak nie. Trouens, Jakobus 4:6 sê: “God is besig om ons steeds meer genade te gee.” Sy barmhartigheid is altyd meer, sy genade altyd groter as ons sonde, smart, pyn of skande.

Here, dankie dat u genade altyd beskikbaar is. Amen.

Hierdie oordenkings is saamgestel uit AAN DIE VOETE VAN DIE VADER deur Isak Burger © Christelike Uitgewersmaatskappy.