Doelgerigte GebedVoorbeeld

Bid volgens die Skrif in jou daaglikse stiltetyd

Vader, op grond van u uitnodiging kom ek met vrymoedigheid na u genadetroon sodat ek barmhartigheid en genade kan ontvang en so op die regte tyd gered kan word (Heb. 4:16). 

Ek staan vas op al u beloftes. Ongeag hoeveel beloftes U gemaak het, Jesus is die “ja” van God, die “ja” op al u beloftes. Daarom is dit ook deur Christus dat ek tot eer van God daarop “Amen” sê (2 Kor. 1:20-21). Here Jesus, U het belowe: “Vra, en vir julle sal gegee word; soek, en julle sal kry; klop, en vir julle sal oopgemaak word” (Matt. 7:7). Ek weet dat u beloftes gebou is op u karakter, en u Woord leer dat God nie ’n mens is dat Hy sou lieg nie; ’n mens dat Hy van gedagte sou verander nie. Sou Hy iets sê en dit nie doen nie, iets belowe en dit nie uitvoer nie? (Num. 23:19). Here Jesus, my hoop en vertroosting is in u Naam omdat U ons belowe dat wat ons ook al in u Naam vra, U dit sal doen sodat die Vader deur die Seun verheerlik kan word. U het belowe dat, as ons U iets in u Naam vra, U dit sal doen (Joh. 14:13-14).

Ek roep U aan op grond van u verbond met my toe U gesê het U sal vir my ’n Vader wees, en ek sal vir U ’n seun/dogter wees (2 Kor. 6:18; Heb. 8:10). Om te verseker dat u besluit onveranderlik is, het U dit met ’n eed aan die erfgename gewaarborg (Heb. 6:17). U het my geskape om u verteenwoordiger op aarde te wees en my deel van u koninkryk gemaak, ’n priester om U te aanbid, om U voortdurend aan Jesus se volmaakte offer te herinner terwyl ek my priesterlike taak voor u troon verrig (Op. 1:6). Wanneer ek voor u troon staan om in te tree vir die wêreld, hou ek vas aan u belofte, dat ons almal uit u oorvloed genade op genade sal ontvang (Joh. 1:16).

Vader, niks is vir U onmoontlik nie (Jer. 32:17) en U trek niemand voor nie (Rom. 2:11). Daarom kom ek met vrymoedigheid na die genadetroon met die sekerheid dat U na my sal luister en dat ek hulp van U sal ontvang (Heb. 4:16).

Hierdie oordenkings is saamgestel uit DOELGERIGTE GEBED deur Bennie Mostert © Christelike Uitgewersmaatskappy.