Jesus se Opdrag

Op hierdie stadium in Jesus se lewe, versprei berigte oor Hom deur die streek en mense in sy tuisdorp, Nasaret, was nuuskierig. Om hulle vrae te beantwoord, het Jesus, toe dit sy beurt was om die Skrif in die sinagoge te lees, die boekrol van Jesaja oopgemaak en 'n antieke profesie oor Homself en sy opdrag gelees. Hy het gekom om die "goeie nuus" aan die armes, gevangenes, blindes en onderdruktes te bring. God het selfs die mense op die rand van die samelewing liefgehad en 'n plan in werking gestel om hulle te red — 'n plan wat uiteindelik vervul sou word in die dood en opstanding van Jesus, ons Middelaar.

Die Africa Study Bible se spreuke en aangetekende verhale, getiteld "Uneasy Truths" stel dit so:

Die mense in Nasaret was teen Jesus gekant omdat hulle gedink het Jesus veroordeel hulle met sy verwysings na die heidene, in plaas van die Jode, wat God se genade ontvang het (Luk. 4:23-28). 'n Igbo-spreekwoord uit die suidooste van Nigerië sê: "Wanneer droë beendere genoem word, word ou vroue altyd onrustig." 

Dus, wanneer mense die waarheid oor hulself hoor, is hulle geneig om ongemaklik te raak. 'n Boodskap wat mense egter onverskillig laat, bevat waarskynlik nie die waarheid wat op die luisteraars van toepassing is nie.  

Wanneer jy die evangelies lees, kan jy voor moeilike gesegdes en pynlike realiteite te staan kom. Die sleutel is om met 'n oop hart Christus se boodskap te lees en daarna te luister.

Oordink of Bespreek

Hoe beskryf Jesus sy opdrag? 

Op watter maniere kan jy sy opdrag in jou lewe toepas? 

Ten spyte van Jesus se opdrag om goeie nuus te bring, het die mense van sy eie tuisdorp hom verwerp. Waarom dink jy het hulle so kwaad geword, al was hulle verbaas oor sy woorde van genade en die waarheid wat Hy gepraat het? 

Ken jy iemand wat die goeie nuus van Jesus regtig uitleef? Wat kan jy van hulle leer?