Deur GeloofVoorbeeld

Gehoorsaamheid deur Geloof

As jy nie dink dat daar omstredenheid in die Bybel is nie, dink weer! Hebreërs 11:31 sê vir ons: “Omdat Ragab, die prostituut, geglo het, het sy die verkenners vriendelik ontvang en het sy nie omgekom saam met dié wat aan God ongehoorsaam was nie." Hierdie vrou was nie net 'n prostituut nie, maar sy het spioene gehuisves. Vandag leer ons hoe God haar gebruik het om nie net die Israelitiese volk te help om die land in te neem wat God aan hulle gegee het nie, maar ook die rol wat sy gespeel het om ons Verlosser in die wêreld te bring. Kom ons leer egter eers die agtergrond van die verhaal. 

In Josua 1 het daar 'n nuwe leier na vore getree wat die Israeliete na hul "beloofde land" moes lei. Voordat hulle dit kon doen, moes hulle weet wat vir hulle voorlê. In die volgende hoofstuk stuur Josua twee spioene uit: “... Gaan kyk die land deur, veral Jerigo ..." (Josua 2:1). Die twee spioene het by die huis van Ragab, 'n prostituut, in die Kanaänitiese stad Jerigo aangekom waar hulle oornag het. 

Van die beamptes van die stad het van hul teenwoordigheid by haar huis uitgevind en haar ondervra. Ragab het ontken dat sy iets van hulle weet en het selfs gesê dat hulle reeds die stad verlaat het. Intussen het sy hulle op haar dak weggesteek. 

Ragab het tussen die Kanaäniete gewoon wat vir hulle boosheid bekend was. Hulle het afgode aanbid, aan verbode dade deelgeneem en selfs kinders aan hul gode geoffer. Dit was die kultuur waarin sy geleef het, en dit kan dus verwarrend voorkom dat 'n prostituut hierdie spioene gehelp het. Josua 2:9 gee ons 'n wenk waarom: "... Ek weet die Here gee vir julle die land ..."  Die res van die verhaal vertel vir ons, te danke aan Ragab se hulp was die Israeliete se oorname van Jerigo 'n oorwinning. Benewens hul oorwinning, is Ragab se hele gesin gered. Dit is hoe Ragab die Israeliete gehelp het om die land op te eis wat God aan hulle gegee het. 

Haar rol in die geboorte van Jesus Christus was net so waardevol. Daar word min oor Ragab genoem, behalwe dat sy onthou word vir wat sy gedoen het om die beloofde land vir die Israeliete te verseker. Wanneer ons by die Nuwe Testament kom, sien ons weereens haar naam. Hierdie keer op 'n verrassende wyse. 

Matteus 1 beskryf die voorouers van die Messias, Jesus Christus. Ons sien die bekende name van Abraham, Isak en Jakob, maar as ons na vers 5 gaan, sien ons Ragab se naam. Ragab het ondertrou in die Israelitiese volk en die moeder geword van Boas, 'n legendariese en vriendelike man wat dieselfde bloed as ons Verlosser gedeel het. Dit beteken dat sy ma, 'n voormalige prostituut, dit ook gedeel het. 

Die geloof wat Ragab betoon in 'n God wat sy nie geken het nie, is iets wat die meeste van ons verbaas. As volgelinge van Jesus, is ons baie keer oor God verbaas. Ons ken sy karakter en sy beloftes en kies om sy weë te vertrou. Ragab het egter nie hierdie riglyne gehad nie. Sy het net geweet dat iets anders was, en God het haar bestem om 'n deel daarvan te wees, ongeag haar beroep of 'n gebrek aan kennis oor wie Hy was.