Deel Jou GeloofVoorbeeld

Versprei Vreugde

Om vreugde te versprei as 'n manier om ons geloof in Jesus te deel, sal vir sommige gelowiges die maklikste ding wees wat hulle ooit kan doen. Sommige mense is net van nature gaaf en vriendelik. Mense mag selde iets negatief oor hulle te sê hê, en regtig beter voel om net in hulle teenwoordigheid te wees. Hulle moet dit gebruik om ander vir Jesus te beïnvloed deur vreugde te versprei! Hoe kan dit gedoen word? 

Eerstens moet ons dink voor ons praat. Wanneer ons woorde van vriendelikheid en sagmoedigheid getuig, trek ons mense na ons toe aan in plaas daarvan om hulle weg te stoot. Om met genade en vriendelikheid te praat is 'n universele taal wat almal verstaan. 

Tweedens kan ons iets lekkers vir iemand doen. Miskien is ons kollega altyd negatief. Dit mag dalk onnatuurlik voel om iets lekkers vir hom of haar te doen, maar dit is nou die beste tyd om dit te doen. Die vinnigste manier om 'n harde hart sag te maak, is deur dit met 'n vriendelike handeling te oorweldig.

Derdens kan ons kies om vriendelike dinge te doen wat iemand laat glimlag — 'n kompliment in plaas van 'n beskuldiging, 'n handgeskrewe nota van bemoediging, of hulle gunsteling koeldrank. Wanneer ons sulke dinge doen, sê ons vir hulle dat ons hulle raaksien en dat hulle 'n vriend in ons het. 

Mense wat vreugde versprei is op ander gefokus en is op die uitkyk vir maniere om die mense om hulle te dien en lief te hê. Dit kom meer natuurlik vir sommige mense, maar ons is almal geroepe om vreugde te versprei en 'n verskil in iemand se lewe te maak. Verstaan net, wanneer ons dit doen sal 'n verskeidenheid vrae aan ons gevra word:

Hoekom is jy so gelukkig?
Hoekom sê jy vriendelike dinge vir my?
Hoekom het jy nie slegte dae nie?
Hoekom het jy altyd 'n glimlag op jou gesig?
Hoekom is jy vriendelik met almal?

Ons het 'n groot geleentheid om die evangelie aan die mense om ons te verkondig deur eenvoudig vir hulle te vertel hoekom ons hierdie onverklaarbare vreugde het. Dit is ons tyd om te sê: "Die rede waarom ek so vol vreugde is, is omdat ek Jesus ken, en Hy my lei. Dinge loop nie altyd vir my reg nie, en soms is die lewe baie swaar. Maar Hy is altyd by my, in elke tydperk en gedurende moeilike storms. Hy het vir jou gesterf en Hy wil jou ook leer ken."

Of jy jou geloof deur jou verhaal deel, deur 'n uitnodiging te rig, jou op iemand se intellek te beroep, of deur vreugde te versprei — wat ook al jou strategie is om die evangelie te deel — gebruik dit! Al wat ons moet doen is ons deel. God het ons nie gevra om iemand te red nie. Dit is sy werk. Ons is net die instrumente wat Hy gebruik terwyl sy Heilige Gees besig is om iemand se hart te herskep.