Om God Se Hart Te KenVoorbeeld

God Hou Daarvan om te Vergewe

Die woordeboek definieer die woord genade as onverdiende Goddelike hulp wat aan die mens verleen word vir wedergeboorte of heiligmaking. Die woord onverdiend is hier die sleutel. Daarom sal ons in die Christelike geloof sê dat genade iets is wat ons nie verdien nie. Een van die wonderlikste dinge wat aan ons deur God se genade gegee is, is sy vergifnis. 

In Lukas 15 vertel Jesus 'n gelykenis van 'n ondankbare seun wat sy erfdeel van sy vader se boedel opgeëis het. Die vader het die versoek toegestaan en die seun het weggegaan met alles wat hy ontvang het. Hy het ligsinnig en roekeloos geleef, alles verkwis wat hy gehad het en uiteindelik het hy besluit om terug huis toe te gaan. Tot sy verbasing was sy vader op die uitkyk vir hom, het hom tegemoet gehardloop en hom met 'n genade-gevulde, onverwagse verwelkoming ontmoet. Ons lees graag hierdie verhaal, want dit is 'n toonbeeld van liefde wat aan die onverdienstelike bewys is. Dit is hoe God teenoor ons voel.

Ons kom egter ook agter dat dit ons effens ongemaklik laat wanneer hierdie seun terugkeer huis toe en met feesvieringe ontvang word. Daar was geen “Ek het jou mos gesê” kommentaar of les oor wat die pa sal doen as dit weer gebeur nie. Daar is net ontsaglike liefde, verstommende genade en oorweldigende vergifnis uitgestort op 'n baie onwaardige seun. Dit voel net nie reg nie, of hoe? 

Só werk God se vergifnis in die voorsienigheid van die hemelse koninkryk. God vergewe ons vrylik vanweë Jesus se volmaakte daad van onbaatsugtigheid aan die kruis. Ons ontvang vergifnis omdat Hy dit gegee het. Ons verdien niks deur ons goeie werke nie; Jesus se volmaakte werk doen alles vir ons. 

Ons wil vergifnis hê, maar weet eerlikwaar nie hoe om dit te aanvaar nie. Ons weet dit is 'n geskenk, maar ons wil darem iets doen om net 'n bietjie daarvan te verdien. Deur 'n geskenk te ontvang wat ons nooit verdien het nie, waarvoor ons nooit genoeg kan doen om terug te betaal nie, is meer as wat ons beperkte denke kan begryp. Gelukkig is God se vergifnis vir almal wat na Hom roep. Almal. 

Omdat God vergewensgesind is, maak dit net sin dat ons kanale sal wees waardeur daardie vergifnis ander ook kan bereik. Om ander te vergewe, sal ons egter iets kos. Dit sal moeilik wees. Dit sal moeite verg. Dit sal indruis teen wat óns wil hê. Ons sondige natuur verlang na wraak. Nie net dit nie, maar ons dink dat daar 'n soort “sondestelsel” is waarvolgens sommige sondes minder sleg en ander uiters sleg is. Alle sonde is sleg, maar nie alle gevolge van sonde is dieselfde nie. God haat alle sonde, ongeag die intensiteit daarvan. 

Prys God dat Hy ons nie haat nie! Hy wag vir ons en tuur die verte in om te sien wanneer ons terugkom huis toe. Hy is gereed om na ons toe te hardloop, en ons feesvierende met sy genade, aanvaarding en vergifnis te oorweldig.