Wie Ek In Christus IsVoorbeeld

Weet Wie Jy Is

Om verteer te word deur wat mense van jou dink, is die vinnigste manier om te vergeet wat God van jou dink. — Craig Groeschel

Wie is jy? 

As iemand ons die vraag vra, is die eerste ding wat ons gewoonlik noem, een van die pligte of rolle wat ons daagliks verrig. Ek is 'n dokter. Ek is 'n tuisbly-mamma. Ek is 'n brandweerman. Ek is 'n skrywer. Dit is eintlik nie wie ons is nie; dit is wat ons doen.

Dit is verstaanbaar dat ons reaksie daarop is om iemand te vertel wat ons doen. Dit is so natuurlik soos asemhaal, want wat ons doen, wel, dit is wat ons elke dag doen. Of ons nou hou van wat ons doen of nie, dit kan nie wees wat ons definieer nie. As dit so is, sal ons identiteit misplaas word, omdat ons werk en rolle regdeur ons lewens verander. Ook sal ons met 'n misplaaste identiteit en met min tevredenheid leef en altyd na aanvaarding streef.

As volgelinge van Christus, kom ons identiteit van wie God sê ons is, nie van wie ander sê ons is nie. Tog glo ons elke dag dinge oor onsself wat onwaar is. Hierdie onwaarhede strook nie met die Waarheid oor ons volgens die Bybel nie. Nie net is dit maklik om aan te neem ons identiteit kom van wat ons doen nie — ons word dikwels deur diegene rondom ons bestempel as:

Verloorder
Lafaard
Alkoholis
Bedrieër
Luiaard
Werkslaaf
Niemand

Daardie woorde, daardie mense en daardie beskrywings is nie wie ons is nie. As jy nog nooit jou ware identiteit as 'n Christen verstaan het nie, sal hierdie leesplan jou help om hierdie lewenslange strewe te begin om jou ware self te leer ken.  God noem jou:

Sy Kind
Een Wat Vergewe is
Sy Meesterstuk
Nuut in Christus
Meer As 'n Oorwinnaar
Veilig Van die Bose
Burger van die Hemel

Oor die volgende nege dae van hierdie leesplan leer ons meer oor wie ons in Christus is. Om te weet wie ons as volgelinge van Christus is, is noodsaaklik in ons lewenswandel met Jesus. As ons weet wie ons is, sal ons weet wat om te doen. 

Oordink

• Watter rolle of benamings is aan jou gegee waarvan jy hou? (d.w.s vader, onderwyser, vriend, mooi, atleties.)
• Is daar 'n negatiewe benaming of rol wat jou die grootste deel van jou lewe gevolg het? Wie het dit vir jou gegee — ander of jyself?