PSALMS 41:1-13
PSALMS 41:1-13 Bybel vir almal (ABA)
Vir die leier van die koor: 'n Psalm van Dawid. Dit gaan goed met die persoon wat bekommerd is oor 'n arm mens. Die Here sal so 'n persoon red wanneer dit sleg gaan met hom. Die Here sal hom beskerm en hom laat aanhou lewe, die Here sal hom 'n gelukkige mens maak in hierdie land. U sal hom nie vir sy vyande gee sodat hulle met hom kan doen wat hulle wil nie. Die Here sal hom help wanneer hy siek is en Hy sal hom weer gesond laat word. Ekself het gesê: Here, U moet genadig wees vir my, ek het sonde gedoen teen U, maar U moet my gesond maak. My vyande sê dat dit sleg sal gaan met my. Hulle vra: “Wanneer sterf hy, wanneer verdwyn sy naam?” En wanneer iemand kom kyk hoe dit gaan, dan sê hy mooi dinge, maar hy hoop dat dit nie gebeur nie. Hy kom kyk hoe sleg dit met my gaan en hy gaan vertel dit daar buite. Al die mense wat my haat, staan en fluister oor my, hulle hoop dat dit baie sleg sal gaan met my. Hulle sê: “Hierdie siekte sal hom laat sterf, hy sal nie weer opstaan van sy bed nie.” Ek het gedink 'n goeie vriend sal my help, hy het altyd saam met my geëet, maar hy het my verraai. En U, Here? U moet genadig wees vir my en U moet my laat opstaan, sodat ek aan hulle kan doen wat hulle aan my gedoen het. Ek weet U is lief vir my, want U sal my vyande nie laat juig omdat hulle dink hulle het gewen nie. En ek? Ek is onskuldig, daarom help U my en hou U my regop, U laat my voor U staan vir altyd.
PSALMS 41:1-13 Afrikaans 1933/1953 (AFR53)
VIR die musiekleier. 'n Psalm van Dawid. Welgeluksalig is hy wat ag gee op die arme; die HERE sal hom red in die dag van onheil. Die HERE sal hom bewaar en hom in die lewe hou; hy sal gelukkig gemaak word op die aarde. Ja, U kan hom nie oorgee aan die begeerte van sy vyande nie. Die HERE sal hom ondersteun op die siekbed; sy hele slaapplek verander U as hy krank is. Ék het gesê: O HERE, wees my genadig! Genees my, want ek het teen U gesondig. My vyande spreek kwaad van my en sê: Wanneer sal hy sterwe en sy naam vergaan? En as iemand kom om my te sien, dan praat hy leuens; sy hart vergader boosheid vir hom; gaan hy uit na buite, dan spreek hy daarvan. Al my haters tesame fluister onder mekaar teen my; teen my bedink hulle my onheil en sê: Iets skandeliks is op hom uitgestort; en nou dat hy lê, sal hy nie weer opstaan nie. Selfs die man wat met my in vrede lewe, op wie ek vertrou het, wat my brood eet, het die hakskeen teen my opgelig. Maar U, o HERE, wees my genadig en rig my op, dat ek hulle dit kan vergelde! Hieraan weet ek dat U 'n welbehae in my het: dat my vyand oor my nie juig nie. My tog, in my opregtheid ondersteun U my, en stel my voor u aangesig tot in ewigheid.
PSALMS 41:1-13 Afrikaans 1983 (AFR83)
Vir die koorleier. 'n Psalm van Dawid. Dit gaan goed met die mens wat omsien na die swakke. Die Here sal hom red op die dag van nood, die Here sal hom beskerm en in die lewe hou; die hele land sal praat oor hoe goed dit met hom gaan. U sal hom nie uitlewer aan die wraaksug van sy vyande nie. Die Here sal hom bystaan in sy siekte. As hy siek is, sal U hom genees. Ek het gesê: “Wees my genadig, Here! Maak my tog gesond; ek het teen U gesondig.” My vyande wens my net die ergste toe: “Wanneer gaan hy dood en verdwyn sy naam?” As iemand na my kom kyk, dink hy dis klaar met my. Hy kom kyk hoe sleg dit gaan en gaan vertel dit buite rond. Almal wat my haat, staan en fluister oor my, hulle wens my net die ergste toe: dis 'n dodelike siekte wat hom getref het, waar hy nou daar lê, sal hy nie weer opstaan nie! Selfs my boesemvriend op wie ek vertrou het, wat altyd by my geëet het, het my in die rug gesteek. Wees U my genadig, Here, en laat my hier opstaan, dat ek aan hulle kan doen wat hulle aan my gedoen het. Dit weet ek: U het my lief, my vyand sal nie oor my triomfeer nie. Ek is onskuldig, U hou my vas en laat my altyd by U bly.
PSALMS 41:1-13 Die Bybel 2020-vertaling (AFR20)
Vir die •musiekleier. 'n Psalm. Van Dawid. Gelukkig is die mens wat die hulpelose in ag neem; op die dag van onheil sal die HERE hom laat ontkom. Die HERE sal hom beskerm en in die lewe hou; hy sal gelukkig genoem word in die land. U moet hom nie uitlewer aan die begeerte van sy vyande nie. Die HERE sal hom ondersteun op sy siekbed. Waar hy ook al siek lê, maak U hom gesond. Ek, ek het gesê: “HERE, wees my genadig, genees my tog, want ek het teen U gesondig. My vyande wens my kwaad toe, ‘Wanneer sterf hy en verdwyn sy naam?’ As iemand my besoek, huigel hy; in sy hart koester hy onheilsgedagtes en as hy buite kom, dan praat hy. Almal wat my haat, fluister onder mekaar oor my. Teen my beplan hulle onheil Hulle sê, ‘Iets slegs het hom aangetas, en hy wat daar lê, sal nie weer opstaan nie.’ Selfs my vriend wat ek vertrou het, hy wat my brood geëet het, het die hakskeen teen my gelig.” Maar U, HERE, wees my genadig en laat my opstaan, sodat ek hulle kan vergeld. Hieraan weet ek dat U my goedgesind is: dat my vyand nie oor my juig nie. Wat my betref, omdat ek onberispelik is, ondersteun U my. U laat my altyd in u teenwoordigheid staan.
PSALMS 41:1-13 Contemporary Afrikaans Bible 2023 (CAB23)
Welgeluksalig is hy wat ag gee op die arme: die HERE sal hom red in tyd van benoudheid. Die HERE sal hom bewaar en hom in die lewe hou; en hy sal geseën word op die aarde, en jy sal hom nie oorlewer aan die wil van sy vyande nie. Die HERE sal hom versterk op die bed van kwyn: U sal sy hele bed maak in sy siekte. Ek het gesê: HERE, wees my genadig; genees my siel; want ek het teen jou gesondig. My vyande praat kwaad van my: Wanneer sal hy sterwe en sy naam vergaan? En as hy kom om my te sien, spreek hy nietigheid; as hy na die buiteland gaan, vertel hy dit. Almal wat my haat, fluister saam teen my; teen my bedink hulle my onreg. 'n Slegte siekte, sê hulle, kleef aan hom, en nou dat hy lieg, sal hy nie meer opstaan nie. Ja, my eie bekende vriend, op wie ek vertrou het, wat van my brood geëet het, het sy hakskeen teen my opgelig. Maar U, HERE, wees my genadig en rig my op, dat ek hulle kan vergelde. Hieraan weet ek dat U 'n welbehae in my het, omdat my vyand nie oor my triomfeer nie. En wat my aangaan, U ondersteun my in my opregtheid en stel my voor U aangesig tot in ewigheid. Geseënd is die HERE, die God van Israel, van ewigheid tot ewigheid. Amen, en Amen.
PSALMS 41:1-13 Nuwe Lewende Vertaling (NLV)
Geseënd is die mens wat omgee vir die armes. In tye van nood sal die HERE hom red. Die HERE sal hom beskerm en hom die lewe laat behou. Hy gee aan hom voorspoed in die land en lewer hom nie oor in die mag van sy vyande nie. Die HERE sorg vir hom as hy siek is en laat hom opstaan uit sy siekbed. Ek het gesê: “HERE, wees my genadig. Maak my gesond, want ek het teen U gesondig.” My vyande praat kwaad van my. Hulle sê: “Wanneer sal hy sterf en vergete wees?” As hulle my besoek, is hulle skynheilig: In hulle harte versamel hulle slegte gedagtes; dan gaan hulle uit en vertel dit. Almal wat my haat, fluister saam oor my en beplan net die ergste vir my: “’n Dodelike siekte het hom getref. Waar hy nou lê, sal hy nooit opstaan nie!” My beste vriend wat ek vertrou het, wat saam met my geëet het, selfs hy het sy rug op my gedraai. HERE, wees my genadig. Maak my weer gesond sodat ek hulle kan vergeld! Ek weet dat U my liefhet, want my vyand seëvier nie oor my nie. U hou my staande omdat ek onskuldig is. U laat my altyd naby U bly.