MIGA 3:9-12
MIGA 3:9-12 Bybel vir almal (ABA)
Leiers van die Israeliete, julle moet luister! Julle dink dit is nie belangrik om reg te doen nie, julle dink dit is reg om verkeerd te doen. Die hele Jerusalem is vol moordenaars en mense wat verkeerd doen. Dit is julle skuld. Die leiers wat moet sê wat reg is, vra geld om dit te doen. Die profete wat moet sê wat sal gebeur, vra geld om dit te doen. Julle doen nie reg nie, maar julle sê die Here is by julle. Julle sê Hy sal dit goed laat gaan met julle. Omdat julle dit doen, sal die vyande Jerusalem omploeg soos 'n mens 'n stuk grond omploeg. Hulle sal Jerusalem verwoes, en die berg waar die tempel nou staan, sal vol bosse wees.
MIGA 3:9-12 Afrikaans 1933/1953 (AFR53)
Hoor tog dit, hoofde van die huis van Jakob en owerstes van die huis van Israel! Julle wat van die reg 'n afsku het en al wat reg is, verdraai; julle wat Sion bou met bloed en Jerusalem met onreg! Sy hoofde spreek vonnisse uit vir 'n geskenk, en sy priesters gee onderrig vir loon, en sy profete is waarsêers vir geld. Nogtans steun hulle op die HERE en sê: Is die HERE nie in ons midde nie? Geen onheil sal ons wedervaar nie! Daarom sal Sion om julle ontwil soos 'n land omgeploeg en Jerusalem puinhope word en die tempelberg bosrante.
MIGA 3:9-12 Afrikaans 1983 (AFR83)
Luister hierna, leiers van Jakob, regeerders van Israel, julle wat die regspraak minag en alles verdraai, julle wat vir Sion met moord gebou het en Jerusalem met onreg: Jou leiers lewer uitspraak vir omkoopgeld, jou priesters gee onderrig teen salaris, jou profete maak voorspellings teen betaling, en tog verwag hulle hulp van die Here! Hulle sê: “Die Here is by ons, onheil sal ons nie tref nie.” Daarom is dit julle skuld dat Sion soos 'n stuk land geploeg sal word, dat Jerusalem 'n puinhoop sal word, dat die tempelberg 'n hoogte vol bossies sal word.
MIGA 3:9-12 Die Bybel 2020-vertaling (AFR20)
“Luister tog hierna, hoofde van die huis van Jakob en gesagvoerders van die huis van Israel, julle wat regte minag en alles wat reg is, verdraai; julle wat Sion met bloed gebou het en Jerusalem met onreg! Haar leiers spreek 'n oordeel uit vir omkoopgeskenke! Haar priesters gee onderrig teen betaling! Haar profete maak voorspellings vir geld! Hulle steun nogal op die HERE en sê, ‘Is die HERE nie in ons midde nie? Geen onheil sal ons tref nie!’ Daarom, deur julle toedoen sal Sion 'n omgeploegde veld word; Jerusalem sal puinhope word en die tempelberg oorgroeide heuwels.”
MIGA 3:9-12 Contemporary Afrikaans Bible 2023 (CAB23)
Hoor tog hierna, hoofde van die huis van Jakob en owerstes van die huis van Israel, wat 'n afsku het van reg en alle billikheid verdraai. Hulle bou Sion op met bloed en Jerusalem met ongeregtigheid. Sy hoofde oordeel vir loon, en sy priesters leer vir loon, en sy profete waarsê vir geld; tog sal hulle op die HERE steun en sê: Is die HERE nie onder ons nie? geen onheil kan oor ons kom nie. Daarom sal Sion om julle ontwil soos 'n land geploeg word, en Jerusalem sal hope word en die berg van die huis soos die hoogtes van die woud.
MIGA 3:9-12 Die Boodskap (DB)
“Hoor hier, julle leiers van Israel! Julle is mos die mense wat regverdigheid nie kan verdra nie. Julle lieg en bedrieg almal. Jerusalem lyk baie mooi en dit lyk of dit baie goed gaan, maar dit is ’n vals prentjie. Die waarheid is dat mense vermoor en bedrieg is om dit reg te kry. Jou leiers word maklik omgekoop. Vir geld sorg hulle dat dit met die een mens goed gaan terwyl hulle ’n ander een skade aandoen as hy nie kan betaal nie. Julle priesters leer ook net mense as hulle kan betaal. Die profete vra geld om vir iemand te sê wat die Here sê. Tog sê almal van hulle dat hulle van die Here afhanklik is. Hulle sê: ‘So lank as wat die Here by ons in sy tempel is, sal niks vir ons verkeerd loop nie.’ Hoor hier, julle leiers, dit is julle skuld dat Jerusalem verwoes gaan word. Sion gaan soos ’n omgeploegde land lyk. Die afgebreekte mure van Jerusalem gaan soos ’n hoop bourommel lyk. Bossies gaan oral op die berg groei waar die tempel staan, want daar gaan nie mense na die tempel toe kom wat die bossies gaan plattrap nie.”
MIGA 3:9-12 Nuwe Lewende Vertaling (NLV)
Luister na my, leiers van Israel! Julle haat regverdigheid en verdraai die reg. Julle bou Jerusalem op ’n fondasie van moord en bedrog. Julle leiers lewer uitsprake vir omkoopgeld. Julle priesters onderrig mense teen vergoeding. Julle profete voorspel teen betaling. Tog verwag hulle dat die HERE hulle sal help. Hulle sê: “Die HERE is by ons, geen kwaad sal ons tref nie.” Julle is die oorsaak dat die tempel gaan wees soos ’n omgeploegde land. Jerusalem sal soos ’n puinhoop lyk en die tempelberg soos ’n toegegroeide heuwel.