LEVITIKUS 20:1-21

Deel

LEVITIKUS 20:1-21 Afrikaans 1983 (AFR83)

Die Here het vir Moses gesê: “Sê vir die Israeliete: Elke Israeliet en vreemdeling in Israel wat sy kind aan Molek wy, moet met die dood gestraf word: die burgers moet hom met klippe doodgooi, anders sal Ek self teen so iemand optree en hom van sy volksgenote afsny omdat die wyding van 'n kind aan Molek my heiligdom onrein maak en my heilige Naam ontheilig. As die burgers hulle oë sluit vir so 'n oortreding en nie die skuldige doodmaak nie, sal Ek self ingryp en so iemand en sy familie sowel as almal wat saam met hom ontrou is en vir Molek dien, van sy volksgenote afsny. Enigiemand wat aan My ontrou is deur hulp te soek by geeste of waarsêers, teen hom sal Ek optree: Ek sal hom van sy volksgenote afsny. Wy julle aan My. Wees heilig, want Ek is die Here julle God. Gehoorsaam my voorskrifte en leef daarvolgens. Ek is die Here, Ek heilig julle aan My. “Wanneer iemand sy pa of sy ma vloek, moet hy doodgemaak word. Hy het sy pa of sy ma gevloek en hy verdien die dood.” “Iemand wat egbreuk pleeg met die vrou van 'n medeburger, moet doodgemaak word. Dit geld vir die man en ook vir die vrou wat egbreuk pleeg. Iemand wat gemeenskap het met een van sy pa se vrouens, bring skande oor sy pa. Hy en die vrou moet albei doodgemaak word. Hulle verdien die dood. Iemand wat met sy skoondogter gemeenskap het, moet doodgemaak word, en sy ook. Hulle het iets afskuweliks gedoen. Hulle verdien die dood. “Twee mans wat homoseksueel verkeer, doen 'n afskuwelike sonde. Hulle moet doodgemaak word. Hulle verdien die dood. Iemand wat met 'n ma en haar dogter trou, begaan 'n afskuwelike sonde. Hulle moet al drie 'n vuurdood sterf. Julle mag sulke afskuwelike sondes nie duld nie. “'n Man wat met 'n dier geslagsgemeenskap het, moet doodgemaak word, en die dier ook. 'n Vrou wat met 'n dier geslagsgemeenskap het, moet doodgemaak word, en die dier ook. Sulke mense moet doodgemaak word. Hulle verdien die dood. “As 'n man met sy suster of halfsuster se toestemming gemeenskap met haar het, is dit 'n skandelike daad. Hulle moet in die openbaar van hulle volksgenote afgesny word. Hy het skande oor sy suster gebring en moet die gevolge dra. As 'n man met die toestemming van 'n vrou wat menstrueer, gemeenskap met haar het, moet albei afgesny word van hulle volksgenote. “Niemand mag gemeenskap hê met sy tante aan moederskant of aan vaderskant nie, want sy is 'n naaste bloedverwant. As dit gebeur, moet albei gestraf word. As iemand met sy oom se vrou gemeenskap het, bring hy skande oor sy oom. Die man en die vrou moet die gevolge dra: hulle sal sterf as mense wat alle regte verbeur het. As 'n man sy broer se vrou afneem, is dit 'n skandelike daad. Die man het skande oor sy broer gebring. Die man en die vrou verbeur al hulle regte.

LEVITIKUS 20:1-21 Die Bybel 2020-vertaling (AFR20)

Die HERE het met Moses gepraat en gesê: “ Vir die Israeliete moet jy sê, ‘Enigiemand onder die Israeliete en onder die •vreemdelinge met tydelike verblyf in Israel wat van sy nageslag aan Moleg afstaan, moet beslis sterf. Die volk van die land moet hom met klippe doodgooi; anders sal Ek self teen daardie man draai en hom uit die midde van sy volk verwyder, omdat hy van sy nageslag afgestaan het aan Moleg om so my heiligdom te verontreinig en my heilige Naam te ontheilig. Ja, as die volk van die land hulle oë dig sluit vir daardie man en hom nie doodmaak wanneer hy van sy nageslag aan Moleg afstaan nie, sal Ek My teen daardie man en sy familie rig, en Ek sal hom en almal wat agter hom aan hoereer en sodoende agter Moleg aan hoereer, verwyder uit die midde van hulle volk. “ ‘ En iemand wat hom wend tot waarsêergeeste en voorvadergeeste om agter hulle aan te hoereer – Ek sal teen so iemand draai en hom uit die midde van sy volk verwyder. “ ‘ Sorg dat julle heilig bly; wees heilig, want Ek, die HERE, is julle God. Julle moet my vaste voorskrifte nakom en dit uitvoer. Ek is die HERE wat julle heilig maak. “ ‘ As daar enigiemand is wat sy vader en sy moeder vervloek, moet hy beslis sterf. Hy het sy vader en sy moeder vervloek, sy bloedskuld is op hom. As daar iemand is wat owerspel pleeg met 'n vrou, moet daardie man wat owerspel pleeg met sy naaste se vrou beslis sterf – die owerspeler én die owerspeelster. As daar iemand is wat by sy vader se vrou slaap, het hy naaktheid wat aan sy vader behoort, ontbloot. Hulle moet albei beslis sterf. Hulle bloedskuld is op hulle. As daar iemand is wat by sy skoondogter slaap, moet hulle albei sterf. Hulle het iets skandaligs gedoen. Hulle bloedskuld is op hulle. As daar iemand is wat by 'n manlike persoon slaap soos by 'n vrou, het hulle albei iets afstootliks gedoen. Hulle moet beslis sterf. Hulle bloedskuld is op hulle. As daar iemand is wat met 'n vrou en haar moeder trou, is dit 'n skanddaad. Die mense moet hom en die vroue met vuur verbrand. Daar mag nie so 'n skanddaad onder julle wees nie. As daar 'n man is wat met 'n dier geslagsgemeenskap het, moet hy beslis sterf en die dier moet julle doodmaak. As daar 'n vrou is wat na enige dier gaan om daarmee te paar, moet die vrou en die dier doodgemaak word. Hulle moet beslis sterf. Hulle bloedskuld is op hulle. As daar 'n man is wat sy suster, 'n dogter van sy vader of sy moeder, vat, en hy sien haar naaktheid en sy sien sy naaktheid, is dit 'n skande. Hulle moet voor die oë van hulle mense verwyder word. Die naaktheid van sy suster het hy ontbloot; sy skuld moet hy dra. As daar 'n man is wat by 'n vrou slaap wat ongesteld is en hy ontbloot haar naaktheid – hy lê haar bron bloot en sy ontbloot die bron van haar bloeding – dan moet hulle albei verwyder word uit die midde van hulle volk. Die naaktheid van jou moeder se suster of jou vader se suster mag jy nie ontbloot nie. As iemand 'n bloedverwant ontbloot, moet hulle hulle skuld dra. As daar 'n man is wat by sy tante slaap, het hy die naaktheid wat aan sy oom behoort, ontbloot. Hulle moet hulle sonde dra: Kinderloos sal hulle sterf. As daar 'n man is wat sy broer se vrou vat, het hy die naaktheid wat aan sy broer behoort, ontbloot – dit is besoedeling. Kinderloos sal hulle wees.

LEVITIKUS 20:1-21 Nuwe Lewende Vertaling (NLV)

Die HERE het vir Moses gesê: “Gee vir die Israeliete hierdie instruksies. Dit is instruksies wat van toepassing is op sowel gebore Israeliete as die vreemdelinge wat tussen julle lewe. As enigiemand onder julle hulle kinders aan Molek as brandoffers wy, moet hulle deur die mense van die gemeenskap gestenig word. Ek sal self teen hulle optree en hulle van die gemeenskap afsny omdat hulle my heiligdom onrein gemaak het en my heilige Naam ontheilig het deur hulle kinders aan Molek te gee. As die mense van die gemeenskap hierdie kinderoffers aan Molek ignoreer en weier om die skuldige ouers dood te maak, sal Ek teen hulle optree en hulle uit die gemeenskap verwyder saam met almal wat prostitusie gepleeg het deur Molek te aanbid. “As iemand onder die volk ontrou is deur geeste of waarsêers te raadpleeg, sal Ek teen hulle optree en hulle verwyder van die gemeenskap. Sonder julleself af om heilig te wees, want Ek, die HERE, is julle God. Hou my gebooie en wees gehoorsaam, want Ek is die HERE wat julle heilig maak. “Elkeen wat sy pa of ma vloek, moet doodgemaak word. Hulle is skuldig aan ’n baie ernstige oortreding. “As ’n man egbreuk pleeg met ’n ander man se vrou, moet beide die man en vrou doodgemaak word. As ’n man gemeenskap het met sy pa se vrou, moet beide die man en vrou doodgemaak word, want hulle is skuldig aan ’n baie ernstige oortreding. As ’n man gemeenskap het met sy skoondogter, moet albei doodgemaak word. Wat hulle gedoen het, is heeltemal verkeerd en hulle is skuldig aan ’n baie ernstige oortreding. “As ’n man by ’n man slaap soos ’n man by ’n vrou slaap, moet beide doodgemaak word. Dit is ’n afskuwelike ding en hulle is skuldig aan ’n baie ernstige oortreding. As ’n man met ’n vrou en ook haar ma trou, is dit verskriklik verkeerd. Al drie moet verbrand word om sulke verkeerde dade onder julle uit te wis. “As ’n man gemeenskap het met ’n dier, moet hy doodgemaak word en die dier ook. As ’n vrou met ’n dier gemeenskap het, moet sy en die dier doodgemaak word. Beide moet doodgemaak word, want hulle is skuldig aan ’n baie ernstige oortreding. “As ’n man seksuele gemeenskap het met sy suster, die dogter van sy pa of ma, is dit ’n verskriklike skande. Beide van hulle moet in die openbaar uit die gemeenskap verwyder word. Omdat die man seksuele gemeenskap met sy suster gehad het, moet hy onder die gevolge van sy skuld ly. As ’n man seksuele gemeenskap het met ’n vrou tydens haar menstruasie, moet beide verwyder word uit die gemeenskap. Hy het die bron van haar bloedvloeiing openbaar en sy het hom toegelaat om dit te doen. “As ’n man seksuele gemeenskap het met sy tante, sy ma se suster of sy pa se suster, het hy ’n naby familielid oneer aangedoen. Beide partye is skuldig aan ’n baie ernstige oortreding. As ’n man seksuele gemeenskap het met sy oom se vrou, het hy sy oom oneer aangedoen. Beide die man en vrou is skuldig aan ’n baie ernstige oortreding en sal kinderloos sterf. As ’n man trou met sy broer se vrou, is dit ’n onrein daad. Hy het sy broer oneer aangedoen en die skuldige paar sal kinderloos bly.

LEVITIKUS 20:1-21 Bybel vir almal (ABA)

Die Here het vir Moses gesê: “Jy moet vir die Israeliete sê: 'n Israeliet of 'n vreemdeling in die land wat 'n kind van sy nageslag vir Molek gee, moet sterf. Die mense van die land moet hom doodgooi met klippe. Ek sal self daardie man se vyand wees, Ek sal hom afsny van sy volk, want hy het 'n kind van sy nageslag vir Molek gegee. Dit het my tempel onrein laat word en my heilige Naam ontwy. Iemand het miskien 'n kind van sy nageslag vir Molek gegee, en die mense van die land maak of hulle nie sien wat daardie man gedoen het nie. As hulle die man nie doodmaak nie, dan sal Ek self daardie man en sy familie se vyand wees. Ek sal hom afsny van sy volk, en ook almal wat saam met hom ontrou was en wat vir Molek gedien het. “Wanneer 'n persoon wil vra wat hy moet doen, dan vra hy dit miskien vir die geeste van mense wat gesterf het, of vir waarsêers. Daardie persoon is ontrou aan My. Ek sal sy vyand wees en Ek sal hom afsny van sy volk. Julle moet julleself aan My wy, julle moet gewyde mense wees, want Ek is julle God die Here. Julle moet aanhou om te doen wat Ek wil hê. Ek is die Here, Ek wy julle aan My. “Ja, die persoon wat sy ouers vervloek, moet sterf. Hy het sy ouers vervloek, daarom moet hy sterf, hy is skuldig. “En die man wat egbreuk pleeg met 'n ander man se vrou, moet sterf, hy en die vrou moet sterf. En 'n man wat seks het met sy pa se vrou, moet sterf, hy het skande gebring oor sy pa se naam. Die man en die vrou moet altwee sterf, hulle is skuldig. “En 'n man wat seks het met sy skoondogter, moet sterf. Hulle moet altwee sterf, hulle het iets gedoen wat die Here haat, hulle is skuldig. “En die man wat seks het met 'n ander man, moet sterf. Hulle het iets gedoen wat die Here haat, hulle moet altwee sterf, hulle is skuldig. “En dit is 'n slegte ding wanneer 'n man met 'n vrou én met haar ma trou. Julle moet hulle aldrie verbrand, daar mag nie so 'n slegte ding by julle gebeur nie. “En 'n man wat seks het met 'n dier, moet sterf. Hy moet sterf, en julle moet die dier ook doodmaak. En as 'n vrou seks het met 'n dier, dan moet julle die vrou én die dier doodmaak. Hulle moet sterf, hulle is skuldig. “En as 'n man trou met sy suster of met sy halwe suster en hy het seks met haar, dan is dit 'n skande. Julle moet hulle afsny van die volk, en die mense moet sien dat julle dit doen. Hy het skande gebring oor sy suster se naam, hy is skuldig. “As 'n man seks het met 'n vrou wat menstrueer, dan moet julle hulle altwee afsny van hulle volk. “Jy mag nie seks hê met jou pa of jou ma se suster nie. As jy dit doen, dan is jy én die vrou skuldig. “En die man wat seks het met sy oom se vrou, bring skande oor sy oom se naam. Hulle doen sonde, hulle is skuldig, nie een van hulle sal kinders hê nie. “En as 'n man seks het met sy broer se vrou, dan maak dit hulle onrein. Hy het skande gebring oor sy broer se naam, en die man of die vrou sal nooit kinders hê nie.

LEVITIKUS 20:1-21 Afrikaans 1933/1953 (AFR53)

VERDER het die HERE met Moses gespreek en gesê: Jy moet ook aan die kinders van Israel sê: Elkeen uit die kinders van Israel of uit die vreemdelinge wat in Israel vertoef, wat van sy kinders aan Molog gee, moet sekerlik gedood word. Die volk van die land moet hom stenig. En Ek sal my aangesig teen dié man rig en sal hom uitroei onder sy volk uit; want hy het van sy kinders aan Molog gegee om my heiligdom te verontreinig en my heilige Naam te ontheilig. En as die volk van die land hulle oë maar enigsins toemaak vir dié man as hy van sy kinders aan Molog gee, sodat hulle hom nie doodmaak nie, dan sal Ek my aangesig rig teen dié man en sy geslag, en Ek sal hom en almal wat agter hom aan hoereer om agter Molog aan te hoereer, uitroei onder hulle volk uit. En as 'n persoon hom begewe tot die geeste van afgestorwenes en die geeste wat waarsê om agter hulle aan te hoereer, sal Ek my aangesig teen dié persoon rig en hom uitroei onder sy volk uit. Toon dan dat julle heilig is en wees heilig, want Ek is die HERE julle God. En onderhou my insettinge en doen dit. Ek is die HERE wat julle heilig. Want elkeen wat sy vader of moeder vloek, moet sekerlik gedood word. Hy het sy vader of sy moeder gevloek. Sy bloedskuld is op hom. En as iemand owerspel doen met 'n man se vrou, owerspel doen met sy naaste se vrou, moet hy en sy wat owerspel doen, sekerlik gedood word. En as 'n man met sy vader se vrou gemeenskap het, het hy die skaamte van sy vader ontbloot. Hulle altwee moet sekerlik gedood word. Hulle bloedskuld is op hulle. En as 'n man met sy skoondogter gemeenskap het, moet hulle altwee sekerlik gedood word. Hulle het 'n gruwelike vermenging bewerk. Hulle bloedskuld is op hulle. En as 'n man met 'n manspersoon gemeenskap het soos 'n mens met 'n vrou het, het hulle altwee iets gruweliks gedoen. Hulle moet sekerlik gedood word. Hulle bloedskuld is op hulle. En as 'n man 'n vrou en haar moeder neem, is dit 'n skandelike daad; hulle moet hom en dié twee met vuur verbrand: daar mag geen bloedskande onder julle wees nie. En as 'n man vleeslike gemeenskap het met 'n dier, moet hy sekerlik gedood word, en die dier moet julle doodslaan. En as 'n vrou naby enige dier kom om daarmee te doen te hê, moet jy die vrou en die dier doodslaan. Hulle moet sekerlik gedood word. Hulle bloedskuld is op hulle. En as 'n man sy suster neem, sy vader se dogter of sy moeder se dogter, en hy haar skaamte sien en sy sy skaamte sien, is dit 'n skande. Daarom moet hulle voor die oë van die kinders van hulle volk uitgeroei word. Hy het die skaamte van sy suster ontbloot; hy moet sy ongeregtigheid dra. En as 'n man met 'n vrou gemeenskap het wat onwel is, en haar skaamte ontbloot — hy het haar fontein ontbloot en sý die fontein van haar bloed — dan moet hulle altwee uitgeroei word onder hulle volk uit. Ook mag jy die skaamte van jou moeder se suster en van jou vader se suster nie ontbloot nie, want hy het sy bloedverwante ontbloot; hulle moet hul ongeregtigheid dra. En as 'n man met sy tante gemeenskap het, het hy die skaamte van sy oom ontbloot. Hulle moet hul sonde dra; sonder kinders sal hulle sterwe. En as 'n man sy broer se vrou neem, is dit bloedskande. Hy het die skaamte van sy broer ontbloot; sonder kinders sal hulle wees.

LEVITIKUS 20:1-21 Contemporary Afrikaans Bible 2023 (CAB23)

En die HERE het met Moses gespreek en gesê: Verder moet jy aan die kinders van Israel sê: Elkeen van die kinders van Israel of van die vreemdelinge wat in Israel vertoef, wat van sy nageslag aan Molog gee; hy moet sekerlik gedood word; die volk van die land moet hom stenig. En Ek sal my aangesig teen daardie man rig en hom onder sy volk uitroei; omdat hy van sy nageslag aan Molog gegee het om my heiligdom te verontreinig en my heilige Naam te ontheilig. En as die mense van die land op enige manier hulle oë vir die man verberg, wanneer hy van sy nageslag aan Molog gee, en hom nie doodmaak nie; Dan sal Ek my aangesig rig teen daardie man en teen sy familie en hom uitroei en almal wat agter hom aan hoereer, om te hoereer met Molog, onder hulle volk uit. En die siel wat hom bekeer na geeste van afgestorwenes en towenaars om agter hulle aan te hoereer, Ek sal selfs my aangesig teen daardie siel rig en hom onder sy volk uitroei. Heilig julle dan en wees heilig, want Ek is die HERE julle God. En julle moet my insettinge onderhou en dit doen: Ek is die HERE wat julle heilig. Want elkeen wat sy vader of sy moeder vloek, moet sekerlik gedood word; hy het sy vader of sy moeder gevloek; sy bloed sal op hom wees. En die man wat owerspel pleeg met 'n ander man se vrou, ook hy wat owerspel pleeg met sy naaste se vrou, die egbreker en die egbreekster moet sekerlik gedood word. En die man wat met sy vader se vrou gemeenskap het, het die skaamte van sy vader ontbloot; al twee moet sekerlik gedood word; hulle bloed sal op hulle wees. En as 'n man met sy skoondogter gemeenskap het, moet hulle al twee sekerlik gedood word: hulle het verwarring bewerk; hulle bloed sal op hulle wees. As 'n man ook met 'n man gemeenskap het, soos hy met 'n vrou gemeenskap het, het hulle al twee 'n gruwel gedoen; hulle moet sekerlik gedood word; hulle bloed sal op hulle wees. En as 'n man 'n vrou en haar moeder neem, is dit boosheid: hulle moet met vuur verbrand word, hy sowel as hulle; dat daar geen goddeloosheid onder julle sal wees nie. En as iemand met 'n dier gemeenskap het, moet hy sekerlik gedood word; en julle moet die dier doodmaak. En as 'n vrou na 'n dier nader en daarop gaan lê, moet jy die vrou en die dier doodmaak; hulle moet sekerlik gedood word; hulle bloed sal op hulle wees. En as iemand sy suster, sy vader se dogter of sy moeder se dogter neem en haar skaamte sien, en sy sien sy skaamte; dit is 'n goddelose ding; en hulle sal uitgeroei word voor die oë van hulle volk. Hy het die skaamte van sy suster ontbloot; hy sal sy ongeregtigheid dra. En as 'n man met 'n vrou gemeenskap het wat haar siekte het, en haar skaamte ontbloot; hy het haar fontein ontdek, en sy het die fontein van haar bloed ontbloot; en hulle al twee sal onder hulle volk uitgeroei word. En jy mag die skaamte van jou moeder se suster en van jou vader se suster nie ontbloot nie, want hy het sy naaste ontbloot; hulle sal hul ongeregtigheid dra. En as 'n man met sy oom se vrou gemeenskap het, het hy die skaamte van sy oom ontbloot; hulle moet hul sonde dra; hulle sal kinderloos sterf. En as 'n man sy broer se vrou neem, is dit 'n onrein ding; hy het die skaamte van sy broer ontbloot; hulle sal kinderloos wees.

LEVITIKUS 20:1-21 Die Boodskap (DB)

Die Here het verder vir Moses beveel om vir die Israeliete te sê: “Enigeen uit Israel of uit die buitelanders wat tydelik in Israel bly wat sy kind aan die afgod Molek offer, moet beslis doodgemaak word. Die volk moet hom met klippe doodgooi. Ek verwerp so iemand en Ek beskou hom nie langer as deel van die volk nie. Wanneer hy sy kind vir Molek gee, het hy My goedkoop gemaak en my Naam deur die modder gesleep. As die volk toelaat dat iemand sy kinders aan Molek afstaan en hom nie doodmaak nie, sal Ek self teen hom en sy familie optree. Ek sal hom en elkeen wat saam met hom ontrou is aan My en agter Molek aanloop, uit die volk wegvat. Ek verwerp die persoon wat afdwaal en agter spiritiste en die geeste van dooies aanloop. Hy is nie meer een van die volk nie. Leef vir My met alles wat julle het. Wees aan My toegewyd, want net Ek, die Here, is julle God. Hou vas aan my reëls en leef volgens hulle, want Ek, die Here, het julle aan My alleen verbind.” “Wanneer enigiemand sy ouers met minagting behandel, moet hy doodgemaak word. Iemand wat op sy ouers neersien, mag nie bly leef nie. “As ’n man by ’n ander man se vrou slaap, moet hulle al twee doodgemaak word. As ’n man by een van sy pa se vroue slaap, bring hy sy pa in die skande. Al twee is skuldig en hulle moet doodgemaak word. As ’n man by sy skoondogter slaap, het hulle skande gemaak. Albei is skuldig. Hulle moet doodgemaak word. As ’n man seksueel met ’n ander man verkeer soos met ’n vrou, het hulle iets baie leliks gedoen. Hulle is al twee skuldig en al twee moet doodgemaak word. Dit is ’n skande as ’n man gemeenskap het met sy vrou sowel as sy skoonma. Hulle al drie moet met vuur verbrand word om sulke skandelike gedrag onder julle stop te sit. ’n Man wat seks het met ’n dier moet doodgemaak word en die dier moet doodgeslaan word. As ’n vrou met ’n dier verkeer, moet sy en die dier doodgemaak word. As ’n man en sy suster of halfsuster met mekaar afspreek en met mekaar seks het, moet hulle in die openbaar uit die volk weggejaag word. Die man het sy suster onteer en hy moet daarvoor verantwoordelikheid aanvaar. ’n Man en vrou wat met wedersydse instemming saamslaap terwyl sy besig is om te menstrueer, moet al twee van die volk afgesny word. Jy mag nie omgang hê met jou tannie nie, of dit nou aan jou pa of jou ma se kant is, want dit is bloedfamilie. Julle moet albei skuld aanvaar. Iemand wat by sy tannie slaap, bring skande oor sy oom. Die man en vrou moet verantwoordelikheid aanvaar vir hulle oortreding. Hulle sal doodgaan sonder om ooit kinders te hê. Dit is ’n skande as iemand sy broer se vrou afvry. Hy het skande oor sy broer gebring. Hulle sal nooit kinders hê nie.”