JOËL 2:1-11

Deel

JOËL 2:1-11 Afrikaans 1983 (AFR83)

Blaas die ramshoring in Sion, roep hard op my heilige berg. Al die inwoners van die land sal bewe, want die dag van die Here kom, dit is naby: dié stikdonker dag, die dag van donker wolke waarop die groot sterk nasie oor die berge uitsprei soos die lig van die dagbreek uitsprei. Só 'n sterk nasie was daar nog nooit en sal daar nooit weer wees nie, selfs nie in die verste toekoms nie. Die leër se voorhoede is 'n vuur wat verteer, sy agterhoede 'n vlam wat brand. Voor die koms van die sprinkaanswerm is die veld soos die tuin van Eden; as hy verby is, is dit 'n onbewoonbare woestyn. Hy laat niks oorbly nie. Sy manskappe lyk soos perde, hulle galop soos ryperde. Op die bergtoppe dreun hulle soos strydwaens, knetter hulle soos die vuur van 'n grasbrand wanneer dit strooi verbrand, rumoer hulle soos 'n groot leër wat klaarmaak om te veg. Voor hulle bewe die nasies, almal word wit van angs. Hulle storm vorentoe soos dapper soldate, hulle klim oor die stadsmure. Elkeen gaan reg vorentoe, hulle verander nie van rigting nie. Die een stamp nie teen die ander nie; elkeen bly op sy pad. Hoe hulle ook sneuwel voor die verdediging, hulle raak nie van koers af nie. Hulle oorval die stad, hulle hardloop oor die mure, hulle storm die huise binne, soos diewe klim hulle deur die vensters. Die aarde skrik vir hulle, die hemel bewe; die son en die maan word donker, die sterre verloor hulle glans. Die Here laat sy stem weerklink voor sy leërmag uit. Sy leër is ontsaglik groot, dié wat die Here se bevel uitvoer, is sterk. Die dag van die Here is 'n groot dag, 'n verskriklike dag; wie is daarteen bestand?

JOËL 2:1-11 Bybel vir almal (ABA)

Julle moet die ramshoring blaas en hard skree op my gewyde berg Sion. Almal wat in die land woon, moet bewe, want die dag van die Here kom nou, die dag is naby. Dit sal daardie dag baie donker wees, die wolke sal swart wees. Die sprinkane sal soos baie en sterk soldate oral op die berge wees en hulle sal alles donker maak. Soos die lig in die oggend oor die berge kom, so sal die sprinkane oral op die berge wees. Daar was nog nooit so baie sprinkane nie en daar sal nooit weer so baie wees nie. Waar die voorste sprinkane vreet, lyk dit of 'n vuur alles afbrand, en wanneer die agterste sprinkane weggaan, dan is die veld so kaal soos wanneer dit afgebrand het. Voordat die sprinkane kom, lyk die veld soos 'n baie mooi tuin, en wanneer hulle weggaan, dan lyk die veld soos 'n woestyn. Niks kan daar lewe nie. Daar bly niks oor nie. Die sprinkane lyk soos perde, hulle hardloop soos vinnige perde. Hulle raas soos wanneer oorlogkarre oor die berge jaag, hulle raas soos wanneer kaf in 'n vuur brand, soos wanneer baie soldate aankom om oorlog te maak. Al die volke bewe wanneer die sprinkane kom, almal skrik, en hulle gesigte word bleek. Die sprinkane hardloop soos soldate wat kom oorlog maak, hulle klim bo-oor die stad se mure. Elkeen gaan reguit vorentoe, hy draai nie links of regs nie. Hulle stamp nie teen mekaar nie, elkeen loop op sy eie pad. Die mense gooi baie sprinkane met klippe dood, maar die ander sprinkane staan nie stil nie. Hulle hardloop in die stad in, hulle hardloop oor die mure, hulle klim teen die huise op, hulle klim soos diewe deur die vensters. Wanneer die sprinkane kom, dan bewe die aarde en skud die hemel. Dan word die son en die maan donker, en die sterre skyn nie meer nie. Dit is die Here self wat die sprinkane bring. Die sprinkane is sy soldate, en Hy roep hulle om te kom. Hulle is baie soldate en hulle is sterk, en hulle almal luister na Hom. Ja, die dag van die Here is 'n vreeslike dag! Dit is 'n verskriklike dag, niemand sal lewe wanneer daardie dag verby is nie.

JOËL 2:1-11 Afrikaans 1933/1953 (AFR53)

BLAAS die basuin op Sion, en blaas alarm op my heilige berg! Laat al die inwoners van die land bewe, want die dag van die HERE kom, want hy is naby — 'n dag van duisternis en donkerheid, 'n dag van wolke en wolkenag; soos die môreskemering, uitgesprei oor die berge, kom 'n talryke en magtige volk, wat van oudsher sy gelyke nie gehad het nie en dit hierna ook nie sal hê tot in die jare van die verste geslagte nie. Voor hom uit verteer 'n vuur, en agter hom brand 'n vlam; voor hom lyk die land soos die tuin van Eden, en agter hom is dit 'n woeste wildernis; ook kan niks daaraan ontkom nie. Sy voorkoms is soos dié van perde, en net soos ryperde so hardloop hulle. Soos die gedruis van waens huppel hulle oor die bergtoppe, soos die geknetter van 'n vuurvlam wat die kaf verteer, soos 'n magtige volk wat vir die geveg opgestel is. Vir hom bewe die volke van angs, alle aangesigte verbleek. Soos helde hardloop hulle, soos krygsmanne klim hulle op die muur, en elkeen gaan sy eie koers; hulle verander nie van pad nie. En die een druk nie die ander nie; elkeen gaan sy eie pad; en tussen wapens deur val hulle; maar hulle bly in gelid. Hulle oorval die stad, hulle hardloop op die muur, hulle klim in die huise, hulle dring by die vensters in soos 'n dief. Voor hulle bewe die aarde, sidder die hemel; die son en die maan word swart, en die sterre trek hulle glans in. En die HERE verhef sy stem voor sy leërmag uit; want geweldig groot is sy leër, ja, magtig die uitvoerder van sy woord. Want die dag van die HERE is groot en uitermate vreeslik, en wie kan dit verdra?

JOËL 2:1-11 Die Bybel 2020-vertaling (AFR20)

Blaas die •ramshoring op Sion, maak alarm op my heilige berg! Al die inwoners van die land moet bewe, want die dag van die HERE is aan die kom, ja, dit is naby! Dit is 'n dag van duisternis en donkerte, 'n dag van wolke en diepe duisternis. Soos die rooidag wat oor die berge uitsprei, so is daar 'n groot en magtige volk soos daar nog nooit tevore was, of ooit weer sal wees nie tot in die verste nageslag. Voor hulle uit verteer 'n vuur, en agter hulle verskroei 'n vlam. Soos die tuin van Eden is die land voor hulle, maar agter hulle lê 'n verlate woestyn. Boonop is dit nie moontlik om van hulle te ontvlug nie. Soos perde lyk hulle, soos oorlogsperde, so hardloop hulle. Soos met die geratel van strydwaens storm hulle oor die bergtoppe, soos die geknetter van vlamme wat strooi verteer, soos 'n magtige volk wat vir die oorlog opgestel is. Voor hom bewe volke, almal se gesigte is doodsbleek. Soos krygshelde storm hulle, soos krygsmanne klim hulle teen die stadsmuur uit: Elkeen van hulle gaan reguit vorentoe, hulle verander nie van rigting nie. Die een hinder die ander nie, elke manskap bly op koers; al sneuwel sommige onder die aanslag, hulle wyk nie af nie. Hulle bestorm die stad, op die stadsmuur hardloop hulle, die huise val hulle binne, deur die vensters klim hulle soos diewe. Voor hierdie volk bewe die aarde, skud die hemele. Son en maan word duister, die sterre hou hulle glans terug. En die HERE self verhef sy stem voor sy leërmag uit, want geweldig groot is sy leër, ja, magtig is hulle wat sy bevel uitvoer. Voorwaar, die dag van die HERE is groot, uitermate verskriklik – wie kan dit verduur?

JOËL 2:1-11 Contemporary Afrikaans Bible 2023 (CAB23)

Blaas die basuin in Sion en blaas alarm op my heilige berg; laat al die inwoners van die land bewe, want die dag van die HERE kom, want dit is naby; 'n Dag van duisternis en donkerheid, 'n dag van wolke en donkerheid, soos die môre versprei oor die berge: 'n groot en sterk volk; daar was nog nooit so iets nie, en daarna sal daar nie meer wees nie, tot in die jare van baie geslagte. 'n Vuur verteer voor hulle; en agter hulle brand 'n vlam; die land is soos die tuin van Eden voor hulle, en agter hulle 'n woeste woestyn; ja, en niks sal hulle ontvlug nie. Hulle voorkoms is soos die voorkoms van perde; en soos ruiters, so sal hulle hardloop. Soos die geraas van strydwaens op die toppe van berge sal hulle spring, soos die geraas van 'n vuurvlam wat die stoppels verteer, soos 'n magtige volk wat in 'n slagorde staan. Voor hulle aangesig sal die volk baie pyn wees: alle gesigte sal swart word. Hulle sal hardloop soos helde; hulle sal die muur klim soos krygsmanne; en hulle sal elkeen op sy weë trek en hulle geledere nie verbreek nie. Die een sal ook nie die ander stoot nie; hulle sal elkeen op sy pad wandel, en as hulle op die swaard val, sal hulle nie verwond word nie. Hulle sal in die stad heen en weer hardloop; hulle hardloop op die muur, hulle klim op die huise; hulle sal by die vensters ingaan soos 'n dief. Die aarde sal voor hulle bewe; die hemele sal bewe: die son en die maan sal donker word, en die sterre sal hul glans onttrek. En die HERE sal sy stem verhef voor sy leër, want sy laer is baie groot, want hy is sterk wat sy woord uitvoer; want die dag van die HERE is groot en baie vreeslik; en wie kan dit verduur?

JOËL 2:1-11 Die Boodskap (DB)

Blaas op trompette in Sion om die mense te waarsku, maak ’n groot geraas op die berg daar in Jerusalem waar my tempel staan! Bewe, mense van Juda, want die dag waarop die Here na ons toe kom, is naby! Dit sal ’n donker, mistroostige dag wees. Swaar onweerswolke sal in die lug hang. Soos die dagbreek oor die berge verskyn, so skielik sal ’n groot swerm sprinkane verskyn. Hulle sal soos ’n leër soldate lyk. So iets vreesaanjaends is nog nooit voorheen gesien nie, en sal ook nooit weer gesien word nie. Dit is of hulle soos ’n vuur alles voor en agter hulle sal verbrand. Voor hulle lyk die land soos die tuin van Eden, maar wanneer hulle daardeur getrek het, lyk dit net soos ’n woestyn sonder enige lewe. Niks of niemand kan voor hulle wegvlug nie. Hulle lyk soos oorlogsperde wanneer hulle aankom en hulle hardloop ook net so vinnig. Hulle klink soos strydwaens wat op pad is na die slagveld toe wanneer hulle oor die bergtoppe beweeg. Hulle knetter soos droë gras in ’n veldbrand. Hulle lyk net soos ’n magtige leër wat besig is om saam te trek voor die groot geveg. Nasies bewe voor hulle van angs. Almal word bleek van benoudheid! Hulle val aan soos sterk soldate en klim oor die stadsmure soos opgeleide troepe. Hulle ken net een pad en dit is reguit vorentoe. Nie een van hulle verander van koers of kom in die ander een se pad nie. Hulle weet presies wat om te doen. Hulle breek deur elke verdediging asof dit nie bestaan nie. Daar is niks wat hulle kan keer nie. Hulle loop die stad plat en hardloop oor al die mure; hulle klouter soos diewe deur die vensters. Die aarde bewe van skrik wanneer hulle aankom en die hemel sidder; dit word pikdonker rondom hulle; dit lyk of die son en die maan nie meer skyn nie en of die sterre al hulle glans verloor het. Die Here voer sy leër aan met ’n oorlogskreet. Hy roep hulle op om te veg. Dit is ’n reuseleër wat presies doen wat die Here sê. Die dag van die Here is ’n verskriklike dag. Wie sal dit kan oorleef?

JOËL 2:1-11 Nuwe Lewende Vertaling (NLV)

Blaas op die trompet in Jerusalem! Maak alarm op my heilige berg! Al die inwoners van die land bewe van vrees, want die Dag van die HERE kom en is naby. Dit is ’n dag van duisternis en donkerte, ’n dag met dik wolke en intense donkerte. ’n Magtige leër verskyn skielik oor die heuwels soos die lig van die dagbreek! Hoe geweldig groot en magtig is hulle nie! Niemand het nog ooit so iets gesien nie, en niemand sal ooit weer so iets sien nie. Voor die leër brand vuur en agter volg ’n brandende vlam. Voor hulle lê die land soos die Tuin van Eden, maar agter die leër is ’n verlate verwoesting gelaat. Niks kan hulle ontsnap nie. Hulle lyk soos perde en hulle galop soos oorlogsperde. Hulle klink soos strydwaens wat oor die heuweltoppe voortdreun! Hulle raas soos vuur wat ’n grasveld verteer of soos ’n magtige leër wat gereed is om oorlog te maak. Angs oorweldig die mense; hulle gesigte is bleek van vrees. Die dapper soldate storm vorentoe, soos opgeleide manskappe klim hulle oor die mure. Hulle marsjeer doelgerig vorentoe, niks laat hulle van hulle koers afwyk nie. Hulle stamp nooit teen mekaar nie, elkeen bly op sy regte plek. Hulle bars deur die verdediging, geen wapen kan hulle stop nie. Hulle oorval die stad en hardloop op die mure. Hulle val die huise binne, en klim soos diewe deur vensters. Soos hulle voortbeweeg, skud die aarde en bewe die hemel. Die son en die maan verdonker en die sterre skyn nie meer nie. Die HERE roep hard uit terwyl Hy hulle lei. Hulle is sy magtige leër en gehoorsaam sy bevele. Die Dag van die HERE is iets angswekkends, iets verskrikliks. Wie kan dit oorleef?