JEREMIA 44:16-17
JEREMIA 44:16-17 Bybel vir almal (ABA)
“Jy sê die Here het jou gestuur om hierdie dinge vir ons te sê, maar ons sal nie luister na jou nie. Ja, ons sal aanhou om te doen wat ons gesê het. Ons sal vir die koningin van die hemel offers bring en ons sal vir haar drank-offers uitgooi soos ons en ons voorvaders en ons konings en ons amptenare altyd gedoen het in die stede van Juda en op die strate van Jerusalem. Daardie tyd het ons genoeg gehad om te eet, en dit het goed gegaan met ons, nie sleg nie.
JEREMIA 44:16-17 Afrikaans 1933/1953 (AFR53)
Aangaande die woord wat u ons in die Naam van die HERE verkondig het — ons sal na u nie luister nie. Maar ons sal stellig alles doen wat uit ons mond uitgegaan het — om vir die hemelkoningin rook te laat opgaan en vir haar drankoffers uit te giet soos ons gedoen het, ons en ons vaders, ons konings en ons vorste, in die stede van Juda en op die strate van Jerusalem; toe is ons met brood versadig en was gelukkig, en ons het geen onheil gesien nie.
JEREMIA 44:16-17 Afrikaans 1983 (AFR83)
“Ons gaan nie luister na wat jy vir ons sê in die Naam van die Here nie. Ons sal bly doen wat ons beloof het: ons sal vir die hemelkoningin wierookoffers bring en drankoffers uitgiet net soos ons, ons voorvaders, ons konings en ons amptenare in die stede van Juda en op die strate van Jerusalem gedoen het. Ons het daardie tyd genoeg te eet gehad, ons was voorspoedig, en geen ramp het ons getref nie.
JEREMIA 44:16-17 Die Bybel 2020-vertaling (AFR20)
“Die woord wat jy aan ons in die Naam van die HERE verkondig het – ons gaan nie na jou luister nie. Trouens, ons sal alles wat ons met ons eie monde onderneem het, beslis doen: om offers te verbrand vir die koningin van die hemel en vir haar drankoffers uit te giet soos ons gedoen het, ons en ons voorouers, ons konings en ons •hoë amptenare, in die dorpe van Juda en die strate van Jerusalem. Toe was ons versadig met brood en het dit met ons goed gegaan; rampe het ons toe nie beleef nie.
JEREMIA 44:16-17 Contemporary Afrikaans Bible 2023 (CAB23)
Wat die woord betref wat u in die Naam van die HERE tot ons gespreek het, ons sal na u nie luister nie. Maar alles wat uit ons eie mond uitgaan, sal ons beslis doen, om vir die hemelkoningin rook te laat opgaan en drankoffers vir haar uit te giet, soos ons gedoen het, ons en ons vaders, ons konings en ons vorste, in die stede van Juda en op die strate van Jerusalem; want ons het toe oorvloed van voedsel gehad, en ons was gesond en het geen onheil gesien nie.
JEREMIA 44:16-17 Die Boodskap (DB)
“Ons sal nie na die dinge luister wat jy sê van die Here af kom nie! Ons sal alles doen wat ons beloof het ons sal. Ons sal wierook brand vir die koningin van die hemel. Ons sal ook drank uitgooi om te wys dat ons haar vereer. Dit is tog wat ons nog altyd gedoen het en ook ons voorouers voor ons. Ons konings en ons leiers het dit ook gedoen. Ons almal het dit gedoen in die stede van Juda en in die strate van Jerusalem. En toe ons dit gedoen het, het ons volop kos gehad. Dit het eintlik sommer baie goed met ons gegaan. Ons het nie probleme geken nie.
JEREMIA 44:16-17 Nuwe Lewende Vertaling (NLV)
“Ons sal nie luister na die boodskap wat jy sê van die HERE af kom nie! Ons sal doen wat ons wil. Ons sal wierook brand vir die koningin van die hemel en drank uitgiet om haar te vereer. Ons het dit nog altyd gedoen en ook ons voorouers voor ons. Ons konings en ons leiers het dit ook gedoen. Ons almal het dit gedoen in die dorpe van Juda en in die strate van Jerusalem. En toe het ons volop kos gehad, dit het eintlik sommer baie goed gegaan met ons! Ons het nie probleme gehad nie!