JESAJA 4:2-6
JESAJA 4:2-6 Bybel vir almal (ABA)
Daardie dag sal al die plante mooi en vol saad wees, die plante wat die Here laat groei. Die Israeliete wat nog lewe, sal bly wees oor al die mooi vrugte wat hulle kan eet. Die mense sal sê almal in Jerusalem wat nog lewe, is gewyde mense. Die Here het die gewyde mense se name in sy boek geskryf. Die Here sal die vroue in Jerusalem skoon was, hulle sal nie meer vuil wees nie. Hy sal die Regter wees en Hy sal die moordenaars uit Jerusalem uithaal soos wanneer iemand silwer smelt en die grond uithaal. Dan sal die Here in die dag 'n wolk bring en Hy sal in die nag rook bring en ook die lig van 'n vuur oor elke plek in Jerusalem, elke plek waar mense woon en bymekaarkom. Daar sal 'n afdak wees wanneer die Here kom na die mense toe in Jerusalem. Die afdak sal hulle beskerm sodat hulle nie brand nie, en dit sal hulle ook beskerm teen storms en reën.
JESAJA 4:2-6 Afrikaans 1933/1953 (AFR53)
In dié dag sal die Spruit van die HERE wees tot sieraad en heerlikheid, en die vrug van die land tot hoogheid en versiering vir die vrygeraaktes van Israel. En wie in Sion oorgebly het en gespaar is in Jerusalem, dié sal heilig genoem word, elkeen wat onder die lewendes opgeskrywe is in Jerusalem — as die Here die onreinheid van die dogters van Sion afgewas en die bloedskulde van Jerusalem daaruit weggespoel het deur die Gees van strafgerig en die Gees van uitdelging. Dan skep die HERE oor elke woonplek van die berg Sion en oor sy plekke van samekoms 'n wolk bedags en rook met die glans van vuurvlamme in die nag; want oor alles wat heerlik is, sal daar 'n beskutting wees. En daar sal 'n afdak wees vir 'n skaduwee bedags teen die hitte en vir 'n skuilplek en toevlug teen die stortbui en die reën.
JESAJA 4:2-6 Afrikaans 1983 (AFR83)
Daardie dag sal alles wat die Here laat uitspruit, mooi en weelderig wees. Dié uit Israel wat vrygekom het, sal trots wees op die opbrengs van die land en hulle daarin verlustig. Wie in Sion oorgebly het, wie in Jerusalem bewaar gebly het, elkeen in Jerusalem wat vir die lewe opgeskryf is, sal heilig genoem word. Die Here sal die inwoners van Sion reinig van hulle wandade en Hy sal die bloed wat aan die hande van Jerusalem kleef, verwyder deur die Gees wat oordeel en verteer. Dan sal die Here bedags 'n wolk en snags die rook en glans van 'n vlammende vuur skep oor elke woonplek op Sionsberg en oor al die bymekaarkomplekke daar. Sy magtige teenwoordigheid sal alles beskut. Daar sal 'n skuiling wees, 'n skaduwee teen die hitte bedags, 'n skuilplek en toevlug teen stortbuie en reën.
JESAJA 4:2-6 Die Bybel 2020-vertaling (AFR20)
Op daardie dag sal die loot van die HERE pragtig en luisterryk wees; en die opbrengs van die land sal die trots en roem wees van dié Israeliete wat ontkom het. Dié wat oorbly in Sion, wat agtergelaat word in Jerusalem, sal heilig genoem word, almal wat vir die lewe opgeskryf is in Jerusalem. As my Heer die vuilheid van die vroue van Sion afgewas, en die bloedskuld van Jerusalem uit haar midde weggespoel het, deur 'n gees wat oordeel en 'n gees wat wegvee, sal die HERE oor die hele gebied van die berg Sion en oor die byeenkoms by Sion bedags 'n wolk skep, en snags rook en die glans van vuurvlamme. Ja, oor alles wat luisterryk is, sal dit 'n gewelf vorm. 'n Takskerm sal dit bedags wees as skaduwee teen die hitte, en 'n skuilplek en beskutting teen stortbuie en reën.
JESAJA 4:2-6 Contemporary Afrikaans Bible 2023 (CAB23)
In dié dag sal die loot van die HERE mooi en heerlik wees, en die vrugte van die aarde sal voortreflik en lieflik wees vir die wat uit Israel ontvlug het. En dit sal gebeur dat hy wat in Sion oorgebly het, en hy wat in Jerusalem oorbly, heilig genoem sal word, elkeen wat onder die lewendes in Jerusalem geskrywe is. Wanneer die HERE die vuilheid van die dogters van Sion afgewas het en die bloed van Jerusalem daaruit gesuiwer het deur die gees van oordeel en deur die gees van brand. En die HERE sal oor elke woonplek van die berg Sion en oor sy gemeentes 'n wolk en rook skep bedags en die glans van 'n vlammende vuur in die nag, want oor al die heerlikheid sal 'n skuilplek wees. En daar sal 'n tabernakel wees as 'n skaduwee bedags teen die hitte en as 'n toevlugsoord en as 'n skuilplek teen storm en reën.
JESAJA 4:2-6 Die Boodskap (DB)
Maar daar kom ’n tyd waarin die Here elke boom en plant in Israel weer welig sal laat groei en sal laat vrugte dra. Dan sal die mense wat uit Israel oorgebly het, weer trots en opgewonde wees op die opbrengs van die land. Dan sal almal wie se name in God se boek opgeskryf is, dié wat die verwoesting van Jerusalem oorleef het, heilig genoem word. Die Here sal die inwoners van Jerusalem se morele vuilheid wegwas. Hy sal die bloed wat in Jerusalem vergiet is, verwyder deur sy Gees wat oordeel en verteer. Dan sal die Here die berg Sion en almal wat daar kom aanbid, beskerm. Bedags sal dit soos ’n wolk lyk en snags sal dit soos rook lyk met helder vlamme daarin. Hierdie magtige teenwoordigheid van die Here sal die hele stad beskerm soos ’n dak. Bedags sal dit skaduwee gee teen die son se hitte, en wanneer die storms en die reën kom, sal dit soos ’n skuilplek wees.
JESAJA 4:2-6 Nuwe Lewende Vertaling (NLV)
In die toekoms sal Israel, die tak van die HERE, mooi en glansryk wees. En die vrugte van die land sal die trots wees van die mense wat oorgebly het. Almal wie se name neergeskryf is, wat die uitwissing beleef het van Jerusalem, sal heilige mense wees. Die Here sal die vuilheid afwas van die dogters van Jerusalem. Hy sal Jerusalem skoon was van sy bloedvlekke deur die gees van oordeel wat brand soos vuur. Dan sal die HERE skadu verskaf vir Jerusalem en almal wat daar vergader. Dan sal die HERE bedags ’n wolk en snags ’n vuur beskik. Sy magtige heerlikheid sal alles beskerm. Dit sal skuilplek bied teen die hitte van die dag en teen storms en reën.