DANIËL 8:15-27

Deel

DANIËL 8:15-27 Bybel vir almal (ABA)

Ek, Daniël, wou weet wat beteken die dinge wat ek sien. Skielik het daar voor my iemand gestaan wat soos 'n man lyk. Ek het gehoor iemand praat uit die Ulai-rivier. Hy het gesê: “Gabriël, jy moet vir Daniël sê wat beteken die dinge wat hy sien.” Gabriël het gekom tot waar ek staan. Ek het groot geskrik en ek het gaan lê met my gesig teen die grond. Hy het vir my gesê: “Mens, jy moet weet, die dinge wat jy gesien het, wys wat nog sal gebeur.” Ek, Daniël, het met my gesig teen die grond gelê toe Gabriël met my praat. Ek was bewusteloos, maar hy het aan my geraak en hy het my regop laat staan. Gabriël het vir my gesê: “Ek sal nou vir jou sê wat sal gebeur wanneer God nie meer kwaad sal wees vir sy mense nie. Die skaap-ram met die twee horings wat jy gesien het, is die konings van Medië en Persië. En die bok-ram wat baie hare het, is die koning van die Grieke. Die groot horing wat tussen sy oë was, is die eerste koning. Die groot horing het afgebreek, en vier horings het begin groei op die plek waar die horing was. Die vier horings is vier konings. Hulle sal Grieke wees, maar hulle sal nie baie sterk wees nie. Wanneer hulle nie meer regeer nie en die mense baie sonde gedoen het, dan sal daar 'n koning kom wat baie wreed en geslepe is. Hy sal baie sterk wees, maar dit is God wat hom sterk sal maak. Hy sal baie dinge verwoes. Hy sal doen wat hy wil. Hy sal sterk mense verwoes, ook die gewyde volk. Hy sal doen wat hy wil omdat hy baie geslepe is. Hy sal hoogmoedig word en hy sal baie mense doodmaak. Niemand sal hom kan keer nie. Hy sal 'n vyand wees van God, die Koning van konings. Maar wanneer dit die regte tyd is, dan sal God hom breek. Die dinge wat jy gesien het, sal gebeur, die dinge oor die oggende en die aande. Maar dit sal baie later gebeur. Jy moenie nou daaroor praat nie.” Ek, Daniël, het siek geword en ek het lank siek gebly. Ek het opgestaan en weer die koning se werk gedoen, maar ek was baie geskok oor wat ek gesien het. Ek kon dit nie verstaan nie.

DANIËL 8:15-27 Afrikaans 1933/1953 (AFR53)

En toe ek, Daniël, die gesig gesien het, het ek probeer om dit te verstaan, en kyk, daar het iemand voor my gestaan wat soos 'n man gelyk het. En ek het 'n mensestem gehoor uit die Ulai wat geroep en gesê het: Gabriël, laat hierdie een die gesig verstaan! Toe kom hy by my staanplek; en toe hy kom, het ek geskrik en op my aangesig geval. En hy het vir my gesê: Let op, mensekind, want die gesig sien op die tyd van die einde. En terwyl hy met my spreek, het ek bewusteloos met my aangesig op die grond geval; toe het hy my aangeroer en my op my staanplek opgerig en gesê: Kyk, ek maak jou bekend wat aan die einde van die strafgerig sal gebeur, want dit sien op die bepaalde tyd van die einde. Die ram wat jy gesien het met die twee horings, is die konings van die Meders en die Perse. En die harige bok is die koning van Griekeland; en die groot horing wat tussen sy oë was, dit is die eerste koning. En dat dit gebreek is en vier in sy plek ontstaan het — vier koninkryke sal uit sy volk ontstaan, maar nie met sy krag nie. Maar aan die einde van hulle heerskappy, as die goddelose die maat volgemaak het, sal 'n koning optree, hard van aangesig en wat listige streke verstaan. En sy krag sal sterk word, maar nie deur sy krag nie; en hy sal buitengewoon baie kwaad aanrig en dit voorspoedig uitvoer; en hy sal magtiges vernietig en ook die volk van die heiliges. En op grond van sy slimheid sal hy met geluk bedrog pleeg, en hy sal groot dinge onderneem in sy hart en baie mense onverwags vernietig, ja, optree teen die Vors van die vorste, maar hy sal sonder toedoen van mensehand verbreek word. En die gesig van die aande en die môres waarvan gespreek is, dit is waarheid; en jý, hou die gesig geheim, want dit sien op 'n verre toekoms. En ek, Daniël, was gedaan en was dae lank siek; daarna het ek opgestaan en die werk van die koning gedoen; en ek was verstom oor die gesig, maar niemand het dit gemerk nie.

DANIËL 8:15-27 Afrikaans 1983 (AFR83)

Nadat ek, Daniël, die visioen gesien het, het ek gesoek na 'n verklaring daarvoor. Meteens staan daar toe voor my iemand wat soos 'n man lyk, en ek hoor 'n stem uit die Ulai roep: “Gabriël, verklaar vir Daniël die gesig!” Hy het nader gekom na die plek toe waar ek gestaan het, en toe hy by my kom, het ek bang geword en vooroor op die grond geval. Hy sê toe vir my: “Jy moet verstaan, mens, dié visioen slaan op die eindtyd.” Terwyl hy met my praat, het ek bewusteloos geraak en daar gelê met my gesig op die grond. Maar hy het my gevat en my op my voete getel en vir my gesê: “Ek sal jou vertel waarop die toorn van God gaan uitloop. Dit gaan oor die eindtyd. Die skaapram met horings wat jy gesien het, staan vir die koninkryk van Medië en Persië. Die harige bokram staan vir die koninkryk van Griekeland, en die groot horing tussen sy oë is die eerste koning. Dat dit afgebreek is en dat daar vier in sy plek gekom het, beteken dat daar vier koninkryke uit daardie nasie sal ontstaan, maar hulle sal nie so sterk soos die eerste wees nie. Teen die einde van hulle heerskappy, wanneer die sonde sy hoogtepunt bereik het, sal 'n hardvogtige en slinkse koning op die toneel verskyn. Hy sal baie sterk word, maar nie deur eie krag nie. Hy sal ongelooflike verwoesting aanrig en sal voorspoedig wees in alles wat hy doen. Hy sal magtiges vernietig, ook die heilige volk. Deur sy vindingrykheid sal hy slaag met sy sluwe optrede. In sy verwaandheid sal hy baie mense goedsmoeds om die lewe bring. Hy sal selfs die hoogste Regeerder uitdaag, maar sal vernietig word sonder die toedoen van 'n mens. Wat oor die aande en oggende aan jou geopenbaar is, sal werklik gebeur. Maar jy moet die visioen geheim hou, want dit sien op die verre toekoms.” Ek, Daniël, was gedaan en het lank siek gelê. Daarna het ek opgestaan en weer my werk in die koning se diens gedoen. Ek was egter ontsteld oor die visioen, en niemand het geweet wat met my aangaan nie.

DANIËL 8:15-27 Die Bybel 2020-vertaling (AFR20)

Terwyl ek, Daniël, die visioen sien, en dit probeer verstaan, staan daar skielik voor my iemand wat soos 'n man lyk. Ek hoor toe die stem van 'n mens oor die Ulai wat roep en sê: “Gabriël, laat hierdie een die verskyning verstaan.” Hy het nader gekom na die plek waar ek staan. Toe hy nader kom, is ek deur vrees oorweldig, en het met my gesig teen die grond neergeval. Hy sê toe vir my: “Jy moet verstaan, mensekind, dat die visioen geld vir die tyd van die einde.” Terwyl hy met my praat, was ek in 'n beswyming, met my gesig teen die grond, maar hy het my aangeraak, my weer op my plek laat staan, en gesê: “Kyk, ek gaan aan jou bekend maak wat sal gebeur aan die einde van die vervloeking, want dit verwys na die vasgestelde tyd aan die einde. Die ram wat jy gesien het met die twee horings, is die konings van Medië en Persië. En die harige bokram is die koning van Jawan. Die groot horing tussen sy oë, dit is die eerste koning. Die een wat gebreek is, in die plek waarvan vier opgestaan het, beteken: Vier koninkryke sal uit die nasie opstaan, maar nie met dieselfde krag nie. “Aan die einde van hulle heerskappy, as die oortreders volle geleentheid gehad het, sal 'n koning met 'n ongenaakbare gesig opstaan, een bedrewe in knoeiery. Hy sal groot mag hê, maar nie deur eie krag nie. Hy sal ongehoorde verwoesting aanrig, en voorspoedig wees in wat hy doen. Hy sal sterkes en die volk van die heiliges vernietig. Deur sy vernuf sal hy slaag met die bedrog wat hy aanrig. In sy hart is hy vol eiewaan, en onverhoeds sal hy baie mense vernietig. Selfs teen die Vors van vorste sal hy opstaan, maar sonder mensehand sal hy vernietig word. “Die openbaring in verband met die aand en die oggend waaroor daar gepraat is, dit is waar. En jy, hou die visioen geheim, want daar moet nog baie dae verloop.” Ek, Daniël, was uitgeput en dae lank ongesteld. Toe het ek opgestaan en die koning se werk gedoen. Ek was verslae oor die openbaring, en kon dit nie begryp nie.

DANIËL 8:15-27 Contemporary Afrikaans Bible 2023 (CAB23)

En toe ek, ek Daniël, die gesig gesien en die betekenis gesoek het, kyk, daar staan voor my soos die voorkoms van 'n man. En ek het 'n man se stem tussen die walle van Ulai gehoor wat roep en sê: Gabriël, laat hierdie man die gesig verstaan. En hy het nader gekom waar ek gestaan het, en toe hy kom, het ek bang geword en op my aangesig geval; maar hy het vir my gesê: Verstaan, o mensekind, want in die tyd van die einde sal die gesig wees. En terwyl hy met my praat, was ek in 'n diepe slaap op my aangesig na die grond toe, maar hy het my aangeraak en my regop gesit. En hy sê: Kyk, Ek maak jou bekend wat aan die einde van die grimmigheid sal wees, want op die vasgestelde tyd sal die einde wees. Die ram wat jy gesien het met twee horings, is die konings van Medië en Persië. En die growwe bok is die koning van Griekeland, en die groot horing wat tussen sy oë is, is die eerste koning. Noudat dit gebreek is, terwyl vier daarvoor opgestaan het, sal vier koninkryke uit die nasie opstaan, maar nie in sy mag nie. En in die laaste tyd van hulle koninkryk, wanneer die oortreders tot volle oortreding gekom het, sal 'n koning opstaan met 'n wrede aangesig en verstandige duistere sinne. En sy krag sal sterk wees, maar nie deur sy eie krag nie; en hy sal wonderlik vernietig en voorspoedig wees en praktiseer en die magtiges en die heilige volk vernietig. En ook deur sy beleid sal hy die kuns in sy hand laat voorspoedig; en hy sal homself groot maak in sy hart en baie deur vrede vernietig; maar hy sal gebreek word sonder hand. En die gesig van die aand en die môre wat vertel is, is waar; want dit sal baie dae wees. En ek, Daniël, het beswyk en was sekere dae siek; daarna het ek opgestaan en die sake van die koning gedoen; en ek was verbaas oor die gesig, maar niemand het dit verstaan nie.

DANIËL 8:15-27 Die Boodskap (DB)

Ek was nog besig om te dink wat die visioen beteken toe daar skielik iemand wat soos ’n man lyk, voor my staan. Toe hoor ek ’n stem uit die Ulairivier wat sê: “Gabriël, sê vir Daniël wat die visioen beteken wat hy gesien het!” Gabriël het langs my kom staan, maar ek het so bang geword dat ek op die grond neergeval het. Hy sê toe vir my: “Klein mensie, jy moet verstaan dat die dinge wat jy gesien het, te make het met die laaste dae op aarde.” Ek het bewusteloos geraak en inmekaargesak terwyl hy met my gepraat het. Maar hy het aan my geraak en ek kon weer regop staan. Toe sê hy vir my: “Ek is hier om jou te wys hoe God se oordeel gaan wees, want wat jy gesien het, het te make met die laaste dae op aarde. “Die skaapram met die twee horings verwys na die koninkryke van Medië en Persië. Die bokram is die koninkryk van Griekeland en die groot horing tussen sy oë die eerste koning. Die vier horings wat in die plek van die afgebreekte groot horing gekom het, wys dat die Griekse Ryk in vier dele gaan verdeel, elkeen met ’n eie koning, maar nie een van hulle sal so sterk soos die eerste koning wees nie. Teen die einde van hulle regeringstyd, wanneer hulle sonde ’n hoogtepunt bereik het, sal daar ’n ander hardkoppige, barbaarse en slinkse koning op die toneel verskyn. Hy sal baie sterk word, maar nie deur sy eie krag nie. Hy sal verskriklike verwoesting aanrig en suksesvol wees in alles wat hy aanpak. Hy sal magtige leiers verslaan en God se heilige volk onder sy voete stukkend trap. Omdat hy mense maklik bedrieg, sal hy baie volke oorwin omdat hy hulle met sy skelm optrede onkant sal vang. Omdat hy verskriklik vol is van homself, sal hy baie volke heeltemal vernietig. Hy sal selfs uitdagend voor die Opperregeerder gaan staan. Dan sal hy vernietig word, maar nie deur ’n mens nie. Wat die visioen oor die aande en die oggende aan jou gewys het, is waar. Maar jy moet dit vir eers geheim hou, want dit is nog baie lank voordat hierdie dinge gaan gebeur.” Hierna het ek weer my bewussyn verloor. Ek was vir ’n hele paar dae siek. Na ’n ruk het ek weer opgestaan en aangegaan met my werk. Ek was egter nog steeds ontsteld oor die visioen omdat ek dit nie heeltemal verstaan het nie.

DANIËL 8:15-27 Nuwe Lewende Vertaling (NLV)

Terwyl ek, Daniël, nagedink het oor die visioen wat ek gesien het, het daar skielik iemand voor my kom staan wat soos ’n man lyk. Ek het langs die Ulairivier ’n mens se stem hoor roep wat sê: “Gabriël, verduidelik tog vir hierdie man wat die gesig beteken!” Hy het na die plek toe gekom waar ek gestaan het. Toe hy naderkom, het ek so bang geword dat ek vooroor geval het. Hy het vir my gesê: “Jy moet verstaan, mens, dat die visioen te doen het met die eindtyd.” Terwyl hy besig was om met my te praat, het ek flou op die grond neergeval. Hy het aan my gevat en my op my voete gehelp. Hy sê toe vir my: “Ek lig jou in oor waarheen God se verontwaardiging gaan lei. Dit gaan oor die eindtyd. Die ram wat jy gesien het met die twee horings is die konings van Medië en Persië. Die bok is die koning van Griekeland. Die groot horing tussen sy oë is die eerste Griekse koning. Die vier horings wat in sy plek gekom het toe dit afgebreek het, is vier Griekse ryke wat na vore sal kom. Hulle sal nie dieselfde mag as hy hê nie. “Aan die einde van hulle regeertyd, wanneer hulle verkeerde dade ’n hoogtepunt bereik het, sal daar ’n hardvogtige koning na vore kom wat die kuns ken om te bedrieg. Sonder dat hy self daarvoor werk, sal hy baie magtig word. Hy sal baie skade aanrig. Hy sal regkry wat hy beplan. Hy sal magtige leiers, asook die heilige volk vernietig. Deur sy sluheid en die bedrog wat hy pleeg, sal hy sukses behaal. Hy sal in sy eie oë belangrik wees. Hy sal stil-stil baie mense uitroei. Hy sal ook veg teen die Leier van al die leiers. Maar sonder dat ’n mens dit aan hom doen, sal hy vernietig word. “Die gesig wat jy oor die 2 300 dae gesien het, is waar. Jy moet egter stilbly oor wat jy gesien het, want dit gaan nog baie lank neem voor dit gebeur.” Ek, Daniël, was toe dae lank siek. Daarna het ek opgestaan en aangegaan in die koning se diens. Ek was ontsteld oor wat ek gesien het. Ek het dit glad nie verstaan nie.