2 TESSALONISENSE 1:11-12
2 TESSALONISENSE 1:11-12 Bybel vir almal (ABA)
Ons bid altyd vir julle dat ons God julle gereed sal maak om te lewe soos Hy wil hê. Hy het julle gekies om aan Hom te behoort. Ons bid dat God die goeie dinge sal klaarmaak wat julle begin doen het, die dinge wat julle doen omdat julle in Hom glo. Want God het die krag, Hy kan dit doen. Ons bid dat God dit sal doen sodat julle ons Here Jesus se Naam kan prys en sodat Hy vir julle ook kan prys. Al hierdie dinge kan net gebeur omdat ons God en die Here Jesus Christus goed is vir julle.
2 TESSALONISENSE 1:11-12 Afrikaans 1933/1953 (AFR53)
Daarom bid ons ook altyd vir julle dat onse God julle die roeping waardig mag ag, en dat Hy alle welgevalle aan wat goed is, en alle werk van die geloof met krag volkome mag maak, sodat die Naam van onse Here Jesus Christus in julle verheerlik kan word en julle in Hom, ooreenkomstig die genade van onse God en die Here Jesus Christus.
2 TESSALONISENSE 1:11-12 Afrikaans 1983 (AFR83)
Daarom bid ons ook altyd vir julle: Mag ons God julle waardig maak vir die lewe waartoe Hy julle geroep het, en mag Hy deur sy krag julle liefde vir die goeie en die werk van die geloof volkome maak. So sal die Naam van ons Here Jesus deur julle verheerlik word, en julle deur Hom, in ooreenstemming met die genade van ons God en van die Here Jesus Christus.
2 TESSALONISENSE 1:11-12 Die Bybel 2020-vertaling (AFR20)
Met die oog hierop bid ons ook altyd vir julle, dat ons God julle vir hierdie roeping waardig sal ag, en dat Hy deur sy krag al julle goeie begeertes en geloofsdade ten volle sal verwesenlik, sodat die Naam van ons Here Jesus onder julle verheerlik kan word, en julle in Hom verheerlik word, op grond van die genade van ons God en die Here Jesus •Christus.
2 TESSALONISENSE 1:11-12 Contemporary Afrikaans Bible 2023 (CAB23)
Daarom bid ons ook altyddeur vir julle, dat onse God julle hierdie roeping waardig sal ag en al die welbehae van sy goedheid en die geloofswerk met krag sal vervul. Sodat die Naam van onse Here Jesus Christus in julle en julle in Hom verheerlik kan word volgens die genade van onse God en die Here Jesus Christus.
2 TESSALONISENSE 1:11-12 Die Boodskap (DB)
Ek bid dag en nag vir julle. Ek bid dat God julle in staat sal stel om die soort lewe te leef wat Hy vir julle in gedagte het. Ek bid dat Hy deur sy krag in julle sal werk sodat dit vir julle al hoe lekkerder word om daardie dinge te doen wat sy hart blymaak. Mag Hy heeltemal tevrede wees met die manier waarop julle elke dag julle geloof uitleef. Dan sal julle ons Here Jesus se heerlikheid uitdra soos nog nooit tevore nie. Ander mense sal sien hoe groot en belangrik Hy regtig is. Op julle beurt sal julle met eer beklee word deur die Here. Dit is presies hoe die goedheid van ons wonderlike God en die Here Jesus Christus in julle lewens werk.
2 TESSALONISENSE 1:11-12 Nuwe Lewende Vertaling (NLV)
Met dit in gedagte bid ons altyd vir julle. Mag ons God julle waardig maak vir die lewe waartoe Hy julle geroep het. Mag Hy elke goeie voorneme en geloofsdaad met krag tot volkome uitvoering bring. So sal die Naam van ons Here Jesus verheerlik word deur wat julle doen. En júlle sal deur Hom verheerlik word op grond van die genade van ons God en die Here Jesus Christus.