1 SAMUEL 19:18-24
1 SAMUEL 19:18-24 Afrikaans 1983 (AFR83)
Ondertussen het Dawid gevlug en ontsnap en by Samuel in Rama gekom en hom alles vertel wat Saul hom aangedoen het. Hy en Samuel het in die woonkwartiere van die profete gaan woon. Daarna is aan Saul berig: “Weet u, Dawid is in die profetekwartiere in Rama.” Daarop stuur Saul boodskappers om Dawid gevange te neem. Toe hulle die groep profete sien wat besig was om as profete op te tree onderwyl Samuel hulle voorgaan, het die Gees van God oor die boodskappers van Saul gekom, en hulle het self ook begin om as profete op te tree. Dit is aan Saul vertel, en hy het ander boodskappers gestuur. Ook húlle het self begin om as profete op te tree. Hy het 'n derde groep boodskappers gestuur, en hulle het óók begin om as profete op te tree. Daarop het hy self na Rama toe gegaan en toe hy by die groot opgaardam in Seku kom, vra hy: “Waar is Samuel en Dawid?” Iemand het geantwoord: “Daar in die profetekwartiere in Rama.” Hy het na die profetekwartiere toe gegaan in Rama, en die Gees van God het ook oor hom gekom en hy het so in die loop begin om as profeet op te tree totdat hy by die kwartiere in Rama gekom het. Ook hý het sy klere uitgetrek en self as profeet opgetree in die teenwoordigheid van Samuel. Daardie hele dag en nag het Saul sonder klere op die grond gelê, sodat die mense gevra het: “Is Saul ook onder die profete?”
1 SAMUEL 19:18-24 Die Bybel 2020-vertaling (AFR20)
Dawid het gevlug. Hy het ontsnap en by Samuel in Rama aangekom. Hy het Samuel alles vertel wat Saul aan hom gedoen het. Hy en Samuel het toe gegaan en in Najot gaan bly. Saul is toe meegedeel: “Kyk, Dawid is in Najot in Rama.” Daarop stuur Saul gesante om Dawid te gaan vang. Toe hulle die groep profete in geestesvervoering sien, met Samuel wat daar staan as hulle voorganger, het die Gees van God oor Saul se gesante gekom, en ook hulle het in geestesvervoering geraak. Toe dit aan Saul meegedeel is, het hy ander gesante gestuur, maar ook hulle het in •geestesvervoering geraak. Saul het weer, vir die derde keer, gesante gestuur, en ook hulle het in geestesvervoering geraak. Hy het toe ook self na Rama gegaan. Toe hy aankom by die groot opgaarput wat by Segu is, vra hy: “Waar is Samuel en Dawid?” Iemand het geantwoord: “Daar in Najot in Rama.” Hy gaan toe daarheen, na Najot in Rama. Maar die Gees van God het ook oor hom gekom, en terwyl hy aanstap, het hy in geestesvervoering geraak – totdat hy in Najot in Rama aangekom het. Ook hy het sy klere uitgetrek, en ook hy was in geestesvervoering in Samuel se teenwoordigheid. Daardie hele dag en nag het hy kaal daar gelê. Daarom word daar gesê: “Is Saul ook onder die profete?”
1 SAMUEL 19:18-24 Die Boodskap (DB)
Dawid het intussen gesorg dat hy wegkom. Hy is na Samuel toe in Rama. Hy het vir Samuel alles vertel wat Saul aan hom gedoen het. Hy het toe saam met Samuel in die huis van die profete gaan bly. Toe Saul hoor dat Dawid in die huis van die profete in Rama is, het hy mense gestuur om hom te vang. Hulle kom toe daar af op ’n groep profete wat in profetiese ekstase is. Samuel het hulle gelei. Die Gees van God het in die manne van Saul begin werk sodat hulle ook in profetiese ekstase geraak het. Toe Saul dit hoor, het hy ander manne gestuur, maar ook húlle het in profetiese ekstase geraak. Saul het ’n derde groep gestuur en dieselfde het met hulle gebeur. Saul gaan toe maar self na Rama toe. Toe hy by die groot put in Seku kom, het hy gevra waar Samuel en Dawid is. Die mense het hom beduie na die huis van die profete in Rama. Saul het na die huis van die profete toe gegaan. Die Gees van God het ook in hóm begin werk sodat hy sommer so in die loop al in profetiese ekstase was. Toe hy by die huis van die profete kom, het hý ook sy klere uitgetrek en in profetiese ekstase voor Samuel neergeslaan. Hy het ’n hele dag en ’n nag so kaal bly lê. Daarom sê die spreekwoord: “Hoort Saul dan by die profete?”
1 SAMUEL 19:18-24 Nuwe Lewende Vertaling (NLV)
Dawid het gevlug en by Samuel in Rama aangekom. Hy het hom alles vertel wat Saul aan hom gedoen het. Samuel en Dawid het toe in die profetekwartiere gaan woon. Dis aan Saul vertel: “Dawid is in die profetekwartiere in Rama!” Toe stuur Saul van sy mense om Dawid gevange te neem. Daar aangekom, sien hulle die groep mense wat met Samuel as leier soos profete optree. Die Gees van God kom toe oor Saul se boodskappers en hulle het self soos profete begin optree. Dit is aan Saul meegedeel sodat hy ander boodskappers gestuur het. Hulle het egter ook soos profete opgetree. Saul het weer mense gestuur, maar dieselfde het ook met hulle gebeur. Toe gaan hy self na Rama toe. By die groot opgaardam in Seku aangekom, vra hy: “Waar is Samuel en Dawid?” “Hulle is in die profetekwartiere in Rama,” was die antwoord. Op pad daarheen het die Gees van God oor Saul gekom sodat hy tot in Rama soos ’n profeet opgetree het. Hy het selfs sy klere uitgetrek terwyl hy soos ’n profeet voor Samuel opgetree het. Die hele dag en nag het hy daar sonder klere gelê sodat die mense gevra het: “Wat, is Saul ook tussen die profete?”
1 SAMUEL 19:18-24 Bybel vir almal (ABA)
Dawid het gevlug en weggekom. Hy het by Samuel in Rama gekom en hy het vir Samuel alles vertel wat Saul aan hom gedoen het. Hy en Samuel het toe in die profete-kamp gaan bly. Saul het gehoor dat Dawid in die profete-kamp by Rama is, en hy het manne gestuur om vir Dawid te vang. Maar toe die manne die groep profete sien, en hulle hoor hoe die profete praat en hulle sien Samuel is die leier, het die Gees van God in Saul se manne gekom, en hulle het ook soos profete begin praat. Die mense het dit vir Saul gaan vertel, en hy het ander manne gestuur. Maar hulle het ook soos profete begin praat. Saul het die derde maal manne gestuur, en hulle het ook soos profete gepraat. Toe gaan Saul self na Rama, en toe hy by die groot watergat kom wat by Seku is, vra hy: “Waar is Samuel en Dawid?” Iemand het vir hom gesê: “Hulle is hier by Rama in die profete-kamp.” Saul het na die profete-kamp by Rama gegaan, en die Gees van God het ook in Saul gekom. Hy het ook soos 'n profeet geloop en praat totdat hy in die profete-kamp by Rama gekom het. Hy het sy klere uitgetrek en hy het daar by Samuel soos 'n profeet gepraat. Hy het daardie hele dag en nag daar kaal gelê. Dit is hoekom die mense sê: “Is Saul ook by die profete?”
1 SAMUEL 19:18-24 Afrikaans 1933/1953 (AFR53)
Intussen het Dawid gevlug en vrygeraak en by Samuel in Rama gekom en hom meegedeel alles wat Saul hom aangedoen het. Toe het hy saam met Samuel weggegaan, en hulle het in Najot gebly. En aan Saul is meegedeel en gesê: Kyk, Dawid is in Najot by Rama. Daarop stuur Saul boodskappers om Dawid te gaan haal. Maar toe hulle die skare profete sien profeteer, met Samuel as leier aan hulle hoof, het die Gees van God oor die boodskappers van Saul gekom, sodat hulle ook geprofeteer het. Toe hulle dit aan Saul meedeel, het hy ander boodskappers gestuur, maar hulle het ook geprofeteer; en Saul het die derde keer weer boodskappers gestuur, maar hulle het ook geprofeteer. En hy het self ook na Rama gegaan en by die groot put gekom wat by Segu is, en gevra en gesê: Waar is Samuel en Dawid? En hulle antwoord: Daar in Najot by Rama. Hierop gaan hy daarheen, na Najot by Rama; en die Gees van God het ook oor hom gekom, sodat hy aldeur geloop en profeteer het totdat hy in Najot by Rama aangekom het. Hy het ook self sy klere uitgetrek en ook voor Samuel geprofeteer en ontbloot neergeval daardie hele dag en die hele nag. Daarom sê hulle: Is Saul ook onder die profete?
1 SAMUEL 19:18-24 Contemporary Afrikaans Bible 2023 (CAB23)
Dawid het toe gevlug en ontvlug en by Samuel in Rama gekom en hom alles vertel wat Saul hom aangedoen het. En hy en Samuel het gegaan en in Najot gaan woon. En daar is aan Saul meegedeel en gesê: Kyk, Dawid is in Najot in Rama. En Saul het boodskappers gestuur om Dawid te gaan haal; en toe hulle die skare profete sien profeteer en Samuel wat oor hulle aangestel is, staan, was die Gees van God op die boodskappers van Saul, en hulle het ook geprofeteer. En toe dit aan Saul meegedeel is, het hy ander boodskappers gestuur, en hulle het net so geprofeteer. En Saul het vir die derde keer weer boodskappers gestuur, en hulle het ook geprofeteer. Toe het hy ook na Rama gegaan en by 'n groot put gekom wat in Segu is; en hy het gevra en gesê: Waar is Samuel en Dawid? En een het gesê: Kyk, hulle is by Najot in Rama. En hy het daarheen gegaan na Najot in Rama, en die Gees van God was ook op hom, en hy het voortgegaan en geprofeteer totdat hy by Najot in Rama gekom het. En hy het ook sy klere uitgetrek en op dieselfde manier voor Samuel geprofeteer en naak gaan lê die hele dag en die hele nag. Daarom sê hulle: Is Saul ook onder die profete?