1 SAMUEL 13:16-23
1 SAMUEL 13:16-23 Afrikaans 1983 (AFR83)
En terwyl Saul en sy seun Jonatan en die manskappe by hulle in Gibea in Benjamin was, was die Filistynse kamp nog steeds by Mikmas. Daar het toe 'n roofbende in drie afdelings uit die kamp van die Filistyne uitgegaan. Die een afdeling het in die rigting van Ofra na die Sualstreek toe gedraai. Die tweede het in die rigting van Bet-Goron gedraai, en nog 'n afdeling het gedraai in die rigting van die gebied wat afkyk op die Seboïmdal na die woestyn se kant toe. Daar was geen smid in die hele Israel nie, want die Filistyne het gesê die Hebreërs sal swaarde of spiese maak. Daarom moes elke Israeliet na die Filistyne toe gaan om sy ploegskaar of skoffelpik of byl of ander gereedskap te laat slyp. Dit was die geval met die skerpmaak van ploegskare, skoffelpikke, drietandvurke en byle en ook met die regmaak van osprikkels. So het dit dan gebeur dat in die oorlogstyd nie een van die manskappe by Saul en Jonatan 'n swaard of 'n spies gehad het nie; net Saul en sy seun Jonatan het wapens gehad. In daardie tyd het 'n patrollie van die Filistyne die pas by Mikmas beset.
1 SAMUEL 13:16-23 Die Bybel 2020-vertaling (AFR20)
Terwyl Saul en sy seun Jonatan en die manskappe wat nog by hom was, in Geba in Benjamin gebly het, het die Filistyne kamp opgeslaan in Migmas. Stroperbendes het in drie eenhede uit die Filistyne se kamp uitgetrek. Een eenheid het weggedraai in die rigting van Ofra, in die Sualstreek, 'n ander eenheid het weggedraai in die rigting van Bet-Goron, en nog 'n eenheid in die rigting van die grensgebied wat uitkyk oor die vallei van Seboïm, na die woestyn se kant. Daar was nie 'n enkele grofsmid te vinde in die hele land Israel nie, want die Filistyne het gesê: “Anders maak die Hebreërs swaarde of vegspiese.” Die hele Israel moes na die Filistyne afgaan, elkeen om sy ploegskaar, sy bylpik, sy dissel of sy sekel te laat slyp. Die fooi daarvoor was 'n pim vir 'n ploegskaar, 'n bylpik en 'n drietandvurk, asook vir byle en die herstel van 'n osdrywerstok. So kom dit dat, in 'n tyd van oorlog, daar nie 'n swaard of vegspies te vinde was in die hande van enige van die manskappe wat by Saul en Jonatan was nie. Saul en sy seun Jonatan het wel wapens gehad. 'n Garnisoen van die Filistyne het uitgegaan na die bergpas by Migmas.
1 SAMUEL 13:16-23 Die Boodskap (DB)
Saul en sy seun Jonatan en die manskappe het in Gibea in Benjamin gebly. Die Filistyne se kamp was nog in Mikmas. Daar het drie afdelings uit die kamp van die Filistyne gegaan om die gewone Israeliete se goed te roof. Een groep was besig om dit te doen na Ofra se kant toe, in die omgewing van Sual; die ander groep was besig om dit na Bet-Horon se kant toe te doen, en die derde groep het na die kop toe gegaan wat na die woestyn se kant toe uitkyk op die Seboïmvallei. In die hele gebied van Israel was daar niemand wat met yster kon werk nie, want die Filistyne het gesê: “Ons laat dit nie toe nie, anders maak die Hebreërs swaarde en spiese.” Die Israeliete moes maar elke keer na die Filistyne toe gaan om hulle ploegskare, pikke, byle of sekels te laat regmaak. Die prys was twee stukkies silwer vir die regmaak van ’n ploegskaar en ’n pik, en een stukkie silwer vir ’n vurk en ’n byl en die ysterpunt van ’n osdrywerstok. Toe die oorlog uitbreek, het nie een van die burgers wat by Saul en Jonatan aangesluit het, ’n swaard of ’n spies gehad nie. Net Saul en sy seun Jonatan het elkeen ’n swaard en ’n spies gehad. Die Filistyne se wagte was in die bergpas van Mikmas.
1 SAMUEL 13:16-23 Bybel vir almal (ABA)
Hy en sy seun Jonatan en die manne by hulle het in Gibea in die land Benjamin gebly. Die Filistyne se tente was in Mikmas. Drie groepe Filistyne het uit hulle kamp gekom om alles te vat wat hulle kon kry. Een groep het met die Ofra-pad na die distrik Sual gegaan, een groep het met die Bet-Goron-pad gegaan, en een groep het gegaan na die plekke bokant die Seboïm-vallei naby die woestyn. In die hele land Israel was daar nie een ambagsman nie, want die Filistyne het gesê: “As hier ambagsmanne is, dan sal die Hebreërs swaarde en spiese laat maak.” Al die Israeliete moes na die Filistyne toe gaan om hulle ploeg-ysters en pikke en byle te laat skerpmaak. Hulle moes vir die Filistyne een derde sikkel silwer gee vir elke ploeg-yster en pik en vurk en byl wat hulle skerpgemaak het, ook vir die punte van die stokke waarmee hulle die beeste aangejaag het. Daarom het nie een van die manne by Saul en Jonatan 'n swaard of 'n spies gehad toe die oorlog begin het nie. Net Saul en sy seun Jonatan het 'n swaard en 'n spies gehad. 'n Groep Filistyne het na die bergpas by die stad Mikmas gegaan.
1 SAMUEL 13:16-23 Afrikaans 1933/1953 (AFR53)
Terwyl Saul en sy seun Jónatan en die manskappe wat by hulle aanwesig was, in Geba in Benjamin bly en die Filistyne by Migmas laer opslaan, het die roofkommando uitgetrek uit die laer van die Filistyne in drie afdelings: een deel het weggedraai op pad na Ofra, na die land Sual toe; en een deel het weggedraai op pad na Bet-Horon, en een deel het weggedraai op pad na die grens wat oor die dal Sebóim na die woestyn uitkyk. En daar was geen smid te vinde in die hele land van Israel nie, want die Filistyne het gesê: Anders kan die Hebreërs swaarde of spiese maak. Daarom moes al die Israeliete na die Filistyne afgaan om elkeen sy kluitbreker of sy pik of sy byl of sy ploegskaar skerp te maak — so dikwels as die snykant stomp was aan ploegskare en pikke en drietandvurke en byle; en om die osprikkels reg te maak. So het dit gekom dat daar in oorlogstyd geen swaard of spies te vinde was in die hand van al die manskappe wat by Saul en Jónatan was nie; maar by Saul en sy seun Jónatan was dit wel te vinde. En 'n wagpos van die Filistyne het uitgetrek na die pas van Migmas.
1 SAMUEL 13:16-23 Contemporary Afrikaans Bible 2023 (CAB23)
En Saul en sy seun Jónatan en die manskappe wat by hulle was, het in Gíbea in Benjamin gebly, maar die Filistyne het laer opgeslaan in Migmas. En die verwoesters het uit die laer van die Filistyne gekom in drie dele: een bende het gedraai na die pad wat na Ofra lei, na die land Sual. En 'n ander menigte het die pad na Bet-Horon gedraai, en 'n ander menigte het gedraai na die pad van die grens wat uitkyk na die dal van Seboim na die woestyn. En daar was geen smid in die hele land van Israel te vinde nie, want die Filistyne het gesê: Dat die Hebreërs nie vir hulle swaarde of spiese maak nie. Maar al die Israeliete het afgegaan na die Filistyne om elkeen sy deel en sy skuts en sy byl en sy stok skerp te maak. Maar hulle het 'n vyl gehad vir die stokke en vir die kouters en vir die vurke en vir die byle en om die stokke skerp te maak. En op die dag van die geveg was daar geen swaard of spies in die hand van enige van die manskappe wat by Saul en Jónatan was nie; maar by Saul en by sy seun Jónatan is daar gevind. En die wagpos van die Filistyne het uitgetrek na die deurgang van Migmas.
1 SAMUEL 13:16-23 Nuwe Lewende Vertaling (NLV)
Saul en sy seun Jonatan met die manskappe by hulle was in Gibea, in Benjamin. Die Filistyne se kamp was nog steeds by Mikmas. Uit die kamp van die Filistyne het drie roofbendes opgetrek. Die een het na Ofra in die omgewing van Sual gegaan, ’n ander na Bet-Goron, en die derde na die grens wat uitkyk op die vallei van Seboïm in die rigting van die woestyn. In daardie dae was daar geen smede in Israel nie, want die Filistyne het gesê: “Dalk maak die Hebreërs swaarde of spiese!” Gevolglik, wanneer die Israeliete hulle ploegskare, skoffelpikke, byle of ander gereedskap moes skerp maak, moes hulle dit na die Filistyne toe neem om skerp gemaak te word. Die prys was een derde sikkel silwer vir ploegskare, pikbyle, drietandvurke, byle en so ook om osprikkels skerp te maak. Dis hoe dit gekom het dat niemand in Israel ’n swaard of ’n spies in oorlogtyd gehad het nie, behalwe Saul en Jonatan. Die bergpas by Mikmas is intussen deur ’n afdeling Filistyne beset.