1 KONINGS 13:1-6
1 KONINGS 13:1-6 Die Bybel 2020-vertaling (AFR20)
Juis toe kom daar, deur die woord van die HERE, 'n man van God uit Juda in Bet-El aan, terwyl Jerobeam op die altaar staan om die offer te verbrand. Hy het, deur die woord van die HERE, uitgeroep teen die altaar en gesê: “Altaar, altaar, so sê die HERE, ‘Kyk, 'n seun word gebore vir die huis van Dawid; Josia is sy naam. Hy sal op jou die priesters van die offerhoogtes slag, hulle wat offers op jou verbrand, en die beendere van mense sal op jou verbrand word. ’ ” Hy het op dieselfde dag 'n teken aangekondig: “Dit is die teken waarvan die HERE gepraat het, ‘Kyk, die altaar sal uitmekaarskeur, sodat die vetterige as wat daarop is, gestort word.’ ” Toe die koning die woord van die man van God hoor wat hy uitgeroep het teen die altaar in Bet-El, steek Jerobeam sy hand bo van die altaar af uit en sê: “Gryp hom!” Maar sy hand wat hy na hom uitgesteek het, het verstyf en hy kon dit nie weer na hom terugtrek nie. Die altaar het uitmekaargeskeur en die vetterige as het van die altaar af gestort, ooreenkomstig die teken wat die man van God aangekondig het deur die woord van die HERE. Die koning het daarop gereageer deur vir die man van God te sê: “Soek asseblief die guns van die HERE jou God en bid vir my, sodat ek my hand kan terugtrek.” Die man van God het toe die guns van die HERE gesoek, en die koning het sy hand teruggetrek, soos dit voorheen was.
1 KONINGS 13:1-6 Nuwe Lewende Vertaling (NLV)
Skielik daag daar ’n man van God uit Juda by Bet-El op. Dit was op bevel van die HERE. Hy het daar aangekom net toe Jerobeam by die altaar gaan staan het om te offer. Op bevel van die HERE roep hy toe uit: “Altaar, altaar! Dit is wat die HERE sê: ‘’n Seun met die naam Josia sal uit die nageslag van Dawid gebore word. Hier op jou sal hy die priesters van die hoogtes offer wat nou wierookoffers op jou bring. Hier sal mensbene op jou verbrand word.’” Die man van God het ook ’n teken aangekondig om sy boodskap te bevestig. Hy het gesê: “Die HERE het hierdie teken gegee: Hierdie altaar sal uitmekaarbreek en die as daarop sal op die grond val.” Koning Jerobeam was woedend vir die man van God omdat hy teen die altaar gepraat het. Hy het sy hand na die man uitgesteek en gesê: “Gryp hom!” Maar die koning se hand het dadelik styf geword sodat hy dit nie weer kon terugtrek nie. Terselfdertyd het die altaar uitmekaargebreek en die as het op die grond geval. Dit het net so gebeur soos wat die man van God op bevel van die HERE gesê het. Die koning vra toe vir die man van God: “Asseblief, bid tot die HERE jou God om my hand te herstel!” Die man van God het tot die HERE gebid en die koning se hand het herstel soos tevore.
1 KONINGS 13:1-6 Bybel vir almal (ABA)
Toe Jerobeam op die altaar klim om te offer, het 'n man van God daar in Bet-El aangekom. Die man van God het van die land Juda gekom. Die Here het die man gestuur. Jerobeam het op die altaar gestaan om te offer, en die man van God het met die altaar gepraat. Hy het 'n boodskap van die Here gebring en gesê: “Altaar, altaar, die Here sê: ‘Luister na wat Ek sê: Daar sal 'n seun gebore word in die koningshuis van Dawid. Sy naam sal Josia wees. Die priesters van die offer-plekke brand wierook op jou, maar Josia sal daardie priesters hier op jou offer, en hulle sal mense se bene op jou verbrand.’ ” Die man van God het daardie dag gesê die Here sal hierdie teken gee: Die altaar sal oopbars, en die as sal op die grond val. Toe koning Jerobeam hoor wat die man van God sê van die altaar in Bet-El, het hy sy hand uitgesteek van bo-op die altaar en hy het gesê: “Gryp hom!” Maar die hand wat hy uitgesteek het, het styf geword. Hy kon dit nie terugtrek nie. Die altaar het oopgebars, en die as het op die grond geval. Dit was die teken van die Here soos die man van God gesê het. Die koning het vir die man van God gesê: “Praat asseblief mooi met jou God die Here en bid vir my sodat ek my hand kan terugtrek.” Die man van God het dit gedoen, en die koning se hand was weer reg. Dit was weer soos dit voorheen was.
1 KONINGS 13:1-6 Afrikaans 1933/1953 (AFR53)
TOE kom daar 'n man van God uit Juda deur die woord van die HERE in Bet-el aan, terwyl Jeróbeam op die altaar staan om offerrook te laat opgaan; en hy het uitgeroep teen die altaar deur die woord van die HERE en gesê: Altaar, altaar, so spreek die HERE: Kyk, 'n seun sal gebore word vir die huis van Dawid met die naam van Josía, en hy sal op jou slag die priesters van die hoogtes wat op jou offerrook laat opgaan, en op jou sal mensbene verbrand word. En hy het dieselfde dag 'n wonderteken aangekondig en gesê: Dit is die wonderteken dát die HERE gespreek het: Kyk, die altaar sal uitmekaarskeur en die as wat daarop is, afgegooi word. En net toe die koning die woord van die man van God hoor wat hy teen die altaar in Bet-el uitgeroep het, steek Jeróbeam sy hand uit bo van die altaar af en sê: Gryp hom! Maar sy hand wat hy teen hom uitgesteek het, het styf geword, sodat hy dit nie weer kon terugtrek nie. En die altaar is uitmekaargeskeur, en die as is van die altaar afgegooi volgens die wonderteken wat die man van God aangekondig het deur die woord van die HERE. Toe begin die koning om aan die man van God te sê: Smeek tog die aangesig van die HERE jou God om genade en bid vir my, dat my hand tot my terugkeer. En die man van God het die aangesig van die HERE om genade gesmeek, sodat die hand van die koning tot hom teruggekeer het en dit soos tevore was.
1 KONINGS 13:1-6 Afrikaans 1983 (AFR83)
kom daar 'n man van God uit Juda aan wat op bevel van die Here na Bet-El toe gekom het. Jerobeam het nog by die altaar gestaan om die offer aan te steek, toe die man van God op bevel van die Here teen die altaar uitroep: “Altaar, altaar, so sê die Here: Daar sal uit die nageslag van Dawid 'n seun gebore word met die naam Josia, en hier op jou sal hy die priesters van die hoogtes slag wat op jou offers bring, en hier op jou sal mensbene verbrand word!” Terselfdertyd het hy 'n wonderteken aangekondig: “Dit is die teken wat die Here gee: hierdie altaar sal uitmekaar ruk sodat die as wat daarop is, op die grond val.” Toe koning Jerobeam hoor wat die man van God uitroep teen die altaar van Bet-El, het hy daar van die altaar af sy hand uitgesteek en gesê: “Gryp hom!” Maar die hand wat hy uitgesteek het, het styf geword, en hy kon hom nie weer terugtrek nie. Die altaar het uitmekaar geruk, en die as het afgeval. Dit was die wonderteken wat die man van God aangekondig het op bevel van die Here. Toe sê die koning vir die man van God: “Bid tog tot die Here jou God om genade vir my sodat my hand weer kan reg word.” Nadat die man van God tot die Here gebid het om genade, het die hand van die koning herstel net soos dit tevore was.
1 KONINGS 13:1-6 Contemporary Afrikaans Bible 2023 (CAB23)
En kyk, daar het 'n man van God uit Juda deur die woord van die HERE na Bet-el gekom, en Jeróbeam het by die altaar gaan staan om reukwerk te laat opgaan. En hy het teen die altaar geroep in die woord van die HERE en gesê: O altaar, altaar, so spreek die HERE; Kyk, vir die huis van Dawid sal 'n kind gebore word met die naam van Josia; en op jou moet hy die priesters van die hoogtes offer wat op jou rook laat opgaan, en mensebeendere moet op jou verbrand word. En hy het dieselfde dag 'n teken gegee en gesê: Dit is die teken wat die HERE gespreek het; Kyk, die altaar sal geskeur word, en die as wat daarop is, moet uitgegooi word. En toe koning Jeróbeam die woord hoor van die man van God wat teen die altaar in Bet-el geroep het, het hy sy hand van die altaar uitgesteek en gesê: Gryp hom vas. En sy hand wat hy teen hom uitgesteek het, het opgedroog, sodat hy dit nie weer na hom kon intrek nie. Ook het die altaar geskeur, en die as het van die altaar af gegooi, volgens die teken wat die man van God deur die woord van die HERE gegee het. En die koning het geantwoord en aan die man van God gesê: Bid tog die aangesig van die HERE jou God en bid vir my, dat my hand my weer herstel kan word. En die man van God het die HERE gesmeek, en die koning se hand het hom weer herstel en geword soos tevore.
1 KONINGS 13:1-6 Die Boodskap (DB)
Die Here het ’n profeet uit Juda na Israel gestuur. Toe hy Bet-El binnekom, het Jerobeam net by die altaar gaan staan en die offervuur aangesteek. Die profeet het toe op bevel van die Here vir die altaar gesê: “Altaar, die Here sê daar sal op jou nog verskriklike dinge gebeur. Uit Dawid se nageslag sal iemand gebore word met die naam Josia. En op jou sal hy die priesters doodmaak wat hier geoffer het. Op jou sal hy ook die bene van baie mense verbrand.” Die profeet het verder gesê: “Iets ergers gaan nog gebeur. Dit sal die teken wees dat die Here gepraat het. Hierdie altaar sal in ’n klomp stukke breek en die as van al die offers sal oral deur die wind verstrooi word.” Toe Jerobeam dit hoor, was hy woedend en het gesê: “Gryp die man.” Op daardie oomblik het die koning se hand heeltemal styf geword. Hy kon dit nie weer terugtrek nie. Skielik het die altaar ineengestort en die as van die offers is oral versprei, net soos die profeet op bevel van die Here gesê het. Jerobeam het benoud vir die profeet gesê: “Vra asseblief die Here jou God om my hand gesond te maak.” Die profeet het die Here gesmeek en die koning se hand was weer normaal.