GÉNESIS 9
9
Tumpa oyapo Noé ndive morogüɨrökuavee päve
1Tumpa iñee kavi Noé pe jare taɨ reta pe, jei chupe reta körai: “Peñemuña jeta, pemotɨnɨe vaerä ɨvɨ.#Gn 1.28. 2Opaete mbaemɨmba ɨvɨ pegua tokɨɨye pegüi, güɨra reta, opaete oikove vae, jare opaete jevae reta ɨguasu pe ñogüɨnoi vae. Pepo pe ko oñemee. 3Opaete mbaemɨmba toiko perembiurä, jökorai opaete temitɨ amee peve rami. 4Ërei agüɨyeta peu soo jugüɨ reve. Echa jugüɨ re ko oï jekove.#Lv 7.26-27; 17.10-14; 19.26; Dt 12.16,23; 15.23. 5Echa che añetete ayepɨta ko perugüɨ re; opaete mbaemɨmba re jare kuimbae re. Kuimbae ñavo re ayepɨta japicha jekove re chupe.”
6“Kia ñavo japicha oyuka yave,#Ex 20.13.
jae tomano vi japicha ipo pe.
Echa kuimbae, Tumpa rami ko ayapo.#Gn 1.26.
7Ërei pe reta, peñemuña jeta kuae ɨvɨ pe.
Pemotɨnɨe kuae ɨvɨ.”#Gn 1.28.
8Tumpa omomiari Noé jare taɨ reta, jei reve: 9“Mase, kuae morogüɨrökuavee päve añonota peve, jökorai vi peñemuña reta peraɨkue rupigua peguarä; 10jare opaete oikove vae ñogüɨnoi pe ndive vae reta: Güɨra reta, opaete mbaemɨmba arca güi oë pe ndive vae güive opaete mbaemɨmba ɨvɨ pegua. 11Cheporogüɨrökuavee päve ngaraa ye ma aipoepɨ pegüi: Ngaraa ye ma amokañɨtei opaete oikove vae ɨporu guasu pe. Ngaraa ye ma oime ïru ɨporu guasu omboai vaerä ɨvɨ. 12Jare jei ye: Kuae kañɨmaa rupi peikuaata morogüɨrökuavee päve ayapo peve vae, jare opaete oikove vae reta, pe ndive ñogüɨnoi vae, kuae oikota jekuae avei rupi: 13Cheyɨɨ añono amapɨtu re, kuae kañɨmaa rupi peikuaata ayapo ko morogüɨrökuavee päve ɨvɨ pegua reta ndive vae. 14Ambou yave ɨvɨ iárambo amapɨtu, cheyɨɨ oyekuaata amapɨtu re. 15Jayave chemaenduata cheporogüɨrökuavee päve amee peve vae re, jare opaete oikove vae pe. Jare ngaraa ye ma oime ɨporu guasu omboai vaerä opaete oikove vae. 16Jökorai yɨɨ oyekuaa yave amapɨtu re, aechata jare chemaenduata morogüɨrökuavee päve jekuae avei pegua ayapo yandeve vae re, jare opaete oikove vae, ɨvɨ iárambo ñogüɨnoi vae reta ndive. 17Körai Tumpa jei Noé pe: ‘Kuae ko jae kañɨmaa morogüɨrökuavee päve pegua, kuae añono cheyeupe opaete ɨvɨ iárambo oikove vae reta ndive.’ ”
Noé jare taɨ reta
18Noé taɨ reta, arca güi oë vae reta jae ko: Sem, Cam jare Jafet; Cam jae ko Canaán tu. 19Kuae mboapɨ reta jae ko Noé taɨ reta. Kuae reta güi oñemuña opaete ɨvɨ rupi.
20Jayave Noé omboɨpɨ oparavɨkɨ kó pe, jare oñono metei uvarupa. 21Jou vino jókuae uva güi oyeapogüe, osavaɨpo, jare inandi etei oyepɨso oï jo guakapi pegua mbɨte pe. 22Jare Cam, Canaán tu, oecha tu Noé inandi ko oï vae, jare omombeu tɨkeɨ jare tɨvɨ ikatu pe ñogüɨnoi vae pe. 23Jayave Sem jare Jafet oeka reta temimonde, jare oñono reta iyatiɨ re, jare jaɨkue kotɨ oguata reta reve yogüɨraja omboyasoi tu inandi oï vae, ïkotɨa omae reta reve, jökorai mbaetɨ oecha reta tu inandi ko oï vae.
24Noé okuera ma isavaɨpo güi yave, oikuaa taɨ mbɨte pegua oyapo chupe vae. 25Jare jei:
“¡Cheyepopeyu toï Canaán re!
¡Tembiokuaiasɨ katu toiko tɨkeɨ reta pe!”
26Javoi jei ye:
“CheYa Tumpa iporerekua toiko Sem ndive,
jare Canaán toiko jembiokuairä.
27Tumpa tombotuicha Jafet,
Sem toiko o guakapi pegua pe,
jare Canaán toiko jembiokuairä.”
28Noé oiko ye tresciento cincuenta año ɨporu guasu oasa güire. 29Opaete ara Noé oikove oiko vae noveciento cincuenta año jare omano.
Tans Gekies:
GÉNESIS 9: GUABD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia DC Guaraní Bolivia © Bolivian Bible Society, 2001.
