Genesis 31
31
Jakop lokkuma aha, Kanan gokkunu heum
1Laban bekkod ag anam anidna amu, ag akka akka Jakopnu inam appig. “Jakop nug ig mamenignu keeke oh awom amunu, nug gemu enub kuɗum ele daatte,” aon appig. Ag anam aegeg, Jakop nug doyom. 2Jakop nug nai anam doya, nug Laban nuhignu ooppa tatam ena doyom bia gemu ii doyom ele anttom. 3Nug anam antte amu, Yawe Nug Jakop amegppa aum. “Na ahan, eɗun na mamenad, na tiin laippu laa ele, na amu oh dilag wan, wan na domeppa goppe, da ippa ehanidmi, amubia appa ele ehanidkkul,” awa aum.
4Yawe Nug anam a amu, Jakop nug doɗ gumattak abenppa dayaya, nug nai me ukke, nug wauuɗ Rahel, Lea ele gumidya uɗipiɗ. 5Aa gumidya uɗieh, nug aa amelahppa aum. “Da aa mamelah nug anukka dahilnu ooppa tatam ena doyom bia gemu ii dootte anidttem, amge da mamelnu Kayak Nug da ele daamuɗ. 6Aa doottep, da aa mamelahnu uɗat dahil ɠagattag ohppa hemi, 7amge nug dahilnu hambuppuak kobol ha, dahil uɗat nob haen kuɗum baoliom. Anam aakku, amge Kayak Nug he, Laban nug dahilnu kobol eheɗ laa ii heum. 8Kayak ehaniɗeɗe, deɗ laa Laban nug aum. ‘Doɗ anig ag nalkad beɗulag otultul ele menuadkkulag amu, na nalkad amuib nahip uɗat nobnu aokkut,’ awa aum. Aria, nug anam a amu, Kayak Nug he, doɗ anig ag nalkad beɗulag otultul eleib menuadppig. Anam be antta amu, deɗ laa Laban nug eɗua, nai nuhig baolia, inam aum. ‘Anam iitta. Doɗ anig ag nalkad beɗulag geɗaɗa elab ele menuadkkulag amu, na nalkad amuib nahip uɗat nobnu aokkut,’ awa aum. Aria, nug anam a amu, Kayak Nug he, doɗ anig nalkad beɗulag geɗaɗa elab eleib menuadppig. 9Kayak Nug anam haaha, Nug aa mamelahnu sipsip, meeme ele kobol anamppa da meɗom.
10Aria, haen laa, upinattak haenppa da tulppa Kayak he, meeme dawai ag beɗulag geɗaɗa elab ele, o ag beɗulag otultul ele, o ag beɗulag geɗaɗa ele, agib doɗ anig papalattegeg anadmi. 11Anatti amu, Kayaknu engel nug da onil diia a, da inam ami. ‘Da ina, aɗitai, appe dookkul,’ awe ami. 12Da anam ai, Kayaknu engel nug aum. ‘Doye! Keeke oh Laban nug nahip-ppa heehe, da anidmi amunu, na neegna, meeme dawai ag beɗulag geɗaɗa elab ele, o ag beɗulag otultul ele, o ag beɗulag geɗaɗa ele, agib doɗ anig pappaladtteb anidkkut.
13Da am Kayak, na Betel uppa aniɗme ele. Na aben amuppa goɗen men qaɗeppa gokkaɗna, keeke laa genabnab hekkutnu nai anan qakkame. Amu na wan imu paha uuna, eɗun na wanen diigppa gokkut.’ Kayak Nug anam da amelppa aum,” awa aum.
14Jakop nai amu mattia male, Rahel, Lea ele aa oɗeppa aoya apiɗ. “I mamenih, nug nuhig en eɗua metaknu am iitta. 15I mamenih nug ihinihnu, i am ah wan laihnu ah bia dooit-tte. Nug ihinihnu en oh awom amu, nug he, iitta meum. 16Amunu i mamenihnu enub oh Kayak na mettom ele, enub amu am ihinih, amu nid naunau ele oh, ag am ihinihib. Anam aakku daatte amunu, na Kayak aɗi hekkutnu aum amu, na anamib hee!” aoya apiɗ.
17Aa anam apiɗ amunu, Jakop nug aha, nuhikkud nid, wauud ele kamel gomelag attan maatta, 18nug sipsip, meeme, doɗ laala ele nug noobppa he ukkaegeg, keeke nug Mesopatemianu diiom ele diie, nug Kanan wanppa, nug mameg Aisak toppa gokkulagnu goppig. 19Amu Laban nug tatam sipsip uɗilag otaɗkkunu ukkom. Aria, haen amuppa Rahel nug mamegnu kayak hambuppuak dottolkad danab ag laulkadppa maatteg daatteb, nug nigul amu yab diiattom. 20Aria, Jakop nug oola gokkunu haenppa nug Aram danab, Laban, nug nug amegppa ii aum. Nug miag atiak ii heum. 21Nug nuhig keeke oh awa, oola ukkom. Nug ukka, Yupretis le mataɗa, Gileat wanppa laih qauko qauko ele, nug appa gokkunu ukkom.
Laban nug Jakop dim lamittom
22Nug anam ugekke, deɗ ewam uue, danab ag Laban amegppa, “Jakop oola ukkom,” aon appig. 23Ag anam aeg, Laban nug baekkudppa diie, ag deɗ eblaih aɗit ele Jakop dim lamidnana, Gileat wanppa, laih qauko qauko eleppa nug gukkuidna teppig. 24Ag anam daaegeg, tuqan amuppa Kayak Nug tulppa Aram danab Laban amegppa aum. “Da na nau aomnanu dabmettak nai imu na amenppa attem. Na Jakopnu eheɗ laa aib heme,” awa aum.
25Amu haen Laban nug Jakop wan amuppa gumitta teum amu, Jakop nug Gileat wanppa, laih qauko qauko eleppa peh lag nuhig qappa dayeye, aakku Laban nuhikkud ele ag ele Gileat qaukoppa, appa haen tutu dayaknu aab kalan daappig. 26Laban nug appa dayaya, nug Jakop toppa ukka, Jakop amegppa aum. “Na aɗi heme? Na aɗinu hambuppuak kobol imu hena, danab ban hena, ah nid ele diin goppig bia na da aɗelaɗ diiatna uɗime? 27Aɗinu na hambuppuak kobol hena, da amel qakkana, lokkumna da amelppa ii anana uɗime? Na da amelppa alom amu, da tambarin, harp ele dilah musik hakppa, ahiettakppa ele oo gamag ahak ele uuidppi uɗilom. 28Na aɗinu da haen nakok ii meɗae, da nid ahin aɗit, amu alai aɗi ele ootuqatte, ‘Enade ukkeg,’ akkulnu ii ai diin uɗime? Na dabmak tutukku iittappa anam heme. 29Da na eheɗ heidkkulnu elele, amge na mamennu Kayak Nug tuqan da amelppa aum. ‘Da na nau aomnanu dabmettak nai imu na amenppa attem. Na Jakopnu eheɗ laa aib heme,’ awa aum. 30Aria, na appanppa gokkutnu oot huanak daatte amunu, na da appal uun uɗime, amge aɗinu na dahilad kayak yab diime?” awa aum. 31Laban anam a amu, Jakop nug oɗeppa awa aum. “Na aɗenaɗ hagakkolah diiatkkut dabmemi amunu, da baɗen, na amenppa uɗignignu ii ami. 32Amge na nahipad kayaknu ame amu, aun laa nug ig oonigppa keeke amu diiom anidppe, nug mauhkkuoitte. I baentadppa imu oh amelagppa na neegna, keeke nahip laa anidna amu aokkut,” awa aum. Jakop nug Rahel nug mamegnu kayak hambuppuak dottolkad yabhoi diiom amu, nug ii doyom. 33Aria, Laban nug digma, nuhikkud kayak hambuppuak dottolkad mattialatta, nug Jakop, Lea, maɗi ah aɗit ele amu, nug ahilkad peh lag anen anen ooppa noum, amge nug ii anattom. Aria, Leanu peh lag ooppanu doa, nug Rahelnu peh lakka ele noum. 34Noa amu, peh lag amuppa ele Laban nug keeke oh elele neekkom, amge nug nuhikkud kayak hambuppuak dottolkad amu ii anattom. Aɗinu? Rahel nug mamegnu kayak hambuppuak dottolkad danab ag laulkadppa maatteg daatteb, nug dottolkad amu kamel gomeppa dayaknu keeke, ag amuppa keeke inatteb ele, nug amuppa inatta, qaɗeppa heɗep na dayom. 35Amunu Rahel nug mameg amegppa aum. “Mama, da gemu ah dilag oɗe ele, diig amunu da ahakkulnu elele iitta amunu, na oot aib nauhom,” awa aum. A amu, Laban nug aben oh neekka oiyom, amge nuhikkud kayak hambuppuak dottolkad amu ii anattom.
36Laban anam he amu, Jakop nug oo nauhe, Laban amegppa aum. “Da aɗi eheɗ hemi? Da nahip-ppa aɗi hipunin hemi amunu na inam huana dim lamiɗme? 37Na keeke dahil oh qeɗuna amu, na nahip keeke aɗi anidme? Na nahip keeke laa anidme amu, na keeke amu da baeladppa, na baenadppa ele gamalagppa meppe, ag ihinihnu melemel mekkulag. 38Maɗ 20 imu amu, da uɗat nahip hei, nahipad sipsip, meeme anig ele ag ii hiwakkattappig. Laa ele amu, da sipsip dawai nahip laippu laa ii lami. 39Doɗ dakkuɗ laa nug doɗ nahip laa qe mauhom amu, da na ii ippunidttami. Da dakka nob eɗuttami. Amu amunppate, o iitta tuqanppate yab danab ag doɗ yab aoeg amu, na da nob eɗukkulnu wagai meme. 40Da amunppa ele aam iuttom, amu tuqanppa ele ulah iuttom; ena ii niittami. 41Maɗ 20 amu da na lautppa daami. Maɗ amu ooppa, maɗ 14 laa amu, da na aɗenaɗ diiatkkulnu nahip uɗat hemi. Maɗ eblaih laippu ele laa amu, da doɗ imu nahip doɗ amegppanu diiadkkulnu nahip doɗ gumak uɗat hemi. Anam aakku, amge na dahil uɗat nob amu haen 10 baolime. 42Kayak, Nug Abrahamnu Kayak, Nug da mamel, Aisak, Nug nuhig Kayak, danab ah ag nuhignu ebehilag oh bodoetta le mette ele amu, Kayak amu Nug da ii ehaniɗlo amu, na da hamu uuiɗppe uɗilom. Kayak Nug dahil uɗat nahipnu hemi, nahip kobol dahilppa heme amu, Nug amu oh ele antta, Nug tumai tuqan na daut batom,” awa aum.
Jakop, Laban ele nug tituanpiɗ
43Jakop nug anam a amu, Laban nug oɗeppa awa aum. “Nid ahin aɗit am da aɗelaɗ; nid naunau ele am da alalad; doɗ imu oh ele am dahilad. Keeke oh na anadttem, amu oh am dahiladib, amge da aɗelaɗ, amu alalad ele eɗue diiadkkulnu elele iitta. 44Elele iitta amunu, i nug tituanɗa nai qakkagnih. I nug tituanɗa nai qakkagnih amu, nug tituana nai qakkak amuam i oonihppa laa aɗi heehe anttomnu mattiak danab bia daakku,” awa aum.
45Laban nug anam a amu, Jakop nug men laa awa, at daakkunu qappom. 46Qappowa, nug laa ele ag nug ele tiilag laippu amu, nug ag men laa ele diin qagmeppeg, hume tak daaglagnu aum. Ag men anam qagmeeg, hume tak daaeg amu, Laban, Jakop ele baeltippa oh ag men ameg amu guguittak daanna ee lappig. 47Laban nug nuhig naippa aben amu onig, “Yega Sahaduta,” ataɗom, amge Jakop nug Hibru naippa onig, “Galid,” ataɗom. 48Anam daye amu, Laban nug aum. “Men qagma hume tak imu, amuam i nug tituanɗa, nai qakkamuɗnu at ihinih daatte,” awa aum. Diig amunu ag aben amu onig, “Galid,” ataɗppig. 49Aben amunu ag ele onig Mispa appig. Aɗinu? Laban nug nai laa imu ele aum. “I laih piɗe piɗe daagnih amu, haen amuppa Yawe Nug anitkkunu ool daatte. 50Na da aɗelaɗppa kobol eheɗ laa hekkuttai, o na ah laala diiadkkuttai, da anidkkulnu elele iitta, amge Kayak Nug anidkku dabmenan oiye!” awa aum.
51Amu Laban nug Jakop amegppa imu ele aum. “Na neegna, men qagma hume tak, men qappak imu ele da na ele gamanihppa memi amu anidttem. 52Men qagma hume tak, amu men qappak imu ele amu ihinih nug tituana nai qakkak nainu at daattep. Da nahip-ppa kobol eheɗ hekkulnu men qagma hume tak imu na daattemppa ukkaknu ii tippalpa. Na ele men qagma hume tak, men qappak imu ele dahilppa eheɗ hekkutnu da daattemppa uɗiaknu ii tippalmana. 53Amu Abrahamnu Kayak, Nahornu Kayak, amu aa mamelahnu Kayak ele Nug i epeɗitkku,” awa aum. Nug anam aum amunu, Jakop nug anam hekkunu nug mamegnu Kayak, danab ah ag nuhignu ebehilag oh bodoetta le mette ele amu, nug Nug onigppa nuhig nai ɠagattag qetta aum. 54Jakop anam ha malowa, laih qauko qauko ele amuppa nug doɗ laa mana, Kayak mettowa, nug baekkudppa, amu Laban aɗi ele ee lakkulagnu onilagppa e uɗieg, ee lawona, ag aben amuppa niippig.
55Aria, wagɗe buttuanab Laban aha, aɗekuɗ, alakkud ele ootuqatta, itittak ena mattowa, nug eɗua appagppa ukkom.
Tans Gekies:
Genesis 31: NB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2022, Wycliffe Bible Translators, Inc. All rights reserved.
