Mateo 25
25
1Ja cꞌa chipan ariꞌ tiempo ja gobierno xin chilaꞌ chicaj queriꞌ rbanic caniꞌ queban e lajuj xtaniꞌ kꞌapojaꞌ. Ejeꞌeꞌ como cꞌo jun cꞌulbic nbani quecꞌamel quicandil chiquijujunal, xebe chi rcꞌulic ja rachi ja ncꞌuleꞌe. 2E joꞌoꞌ chique congana quinaꞌoj pro ja re joꞌoꞌ chic ma e queriꞌ ta, xa ma chꞌobol ta ja queban 3como mta más aceite quecꞌamel ja nutij ja candil chi ntzijeꞌe. 4Pro ja xtaniꞌ ja congana quinaꞌoj ejeꞌeꞌ quecꞌamel chi na juleꞌ ja raceite rxin ja quicandil. 5Ja rachi ja ncꞌuleꞌe como ma xpi ta chanim rmalcꞌariꞌ xemajtaj ma waram chi e lajuj in xewari. 6Pro ja pa tak ncꞌajakꞌaꞌ cꞌo jun kulaj cꞌaxaxi, quewaꞌ nbij riꞌ: —Camic peti ja rachi ja ncꞌuleꞌe, quixelto, tercꞌuluꞌ, neꞌe. 7Xeyictaji ja xtaniꞌ chi e lajuj, quemaj rchomarsaxic ja quicandil. 8Ja cꞌa xtaniꞌ ja mta más aceite cuqꞌuin ejeꞌeꞌ cꞌoli quibij chique ja cach tak xtaniꞌ ja congana quinaꞌoj quewariꞌ:
—Takaꞌan nchupi ja kacandil, teyaꞌaꞌ juleꞌ kaxin ja raceite, xecheꞌ chique.
9—Ma can ta, matzij ma koruban ta ajoj ja xtikayaꞌ ta jalal tak ewxin. Mejor ja neban, jix ja bar ncꞌayix wiꞌ, triꞌ jelokꞌoꞌ wiꞌ ewxin, xecheꞌxi.
10Queriꞌ queban, xebe chi rlokꞌic ja raceite. Kas cꞌa ebenak ja tok xurkaji ja rachi ja ncꞌuleꞌe, xoc pa jay ja bar nba̱n wiꞌ ja waꞌim xin cꞌulbic e rachbil ja xeqꞌuejeꞌ listo chi rcꞌulic in tzꞌapixi ja chiꞌjay. 11Ja cꞌa juleꞌ chic xtaniꞌ ja rebenak ejeꞌeꞌ xemelojto. Ja cꞌa tok xeꞌurkaji quewaꞌ quibij riꞌ:
—Kajaw, Kajaw, tajakaꞌ chiꞌjay chikawach, xecheꞌe. 12Pro bixto chique rmal ja rachi:
—Ni katzij wiꞌ nbij chewe chi ma wotak ta ewach, xecheꞌxi. 13Rmalcꞌariꞌ nbij chewe, quixcꞌascꞌoti como ma ewotak ta nak kꞌij in nak hora xtipi chic jutij ja Ralcꞌwalaxel ja xoc alaxic cuqꞌuin ja winak.
14In jun chic, ja gobierno xin chilaꞌ chicaj queriꞌ rbanic caniꞌ xuban jun achi tok xajalal majaꞌn tibe pa viaje, arjaꞌ xersiqꞌuij ja rmoso. Ja cꞌa tok xeꞌekaj ruqꞌuin xumaj rjachic ja rmebaꞌil pa quekꞌaꞌ ja nquibanbej can rnegocio. 15Jun, joꞌoꞌ mil quetzal xuyaꞌ can tre, jun chic, caꞌiꞌ mil xuyaꞌ can tre in jun chic, jun mil xuyaꞌ can tre. Janiꞌ necowini nquisamajij xa jariꞌ xuyaꞌ can chique chiquijujunal. Cꞌacꞌariꞌ be pa viaje. 16Ja yaꞌon can joꞌoꞌ mil quetzal tre, arjaꞌ be, xumaj rsamajixic ja pwok, xumaj negocio tre in joꞌoꞌ mil quetzal xuchꞌec trij. 17In queriꞌ xuban chic chakajaꞌ ja yaꞌon caꞌiꞌ mil quetzal tre, caꞌiꞌ mil xuchꞌec trij chakajaꞌ. 18Pro ja cꞌa yaꞌon jun mil quetzal tre, arjaꞌ be, xucꞌot jun jul pa tokꞌulew in triꞌ xwawaj wiꞌ ja pwok ja yaꞌon can tre rmal ja rpatrón.
19Ja tok be jun tiempo tre pro jun tiempo nim, jariꞌ moso melojto ja quipatrón in xumaj rbanic cuenta cuqꞌuin. 20Ja cꞌa yaꞌon can joꞌoꞌ mil quetzal tre, arjaꞌ peti, rcꞌamonto chic joꞌoꞌ mil quetzal in xbij tre ja rpatrón:
—Wajaw, atat joꞌoꞌ mil quetzal ayaꞌon can chwe, tatzꞌataꞌ mpeꞌ, xinchꞌec joꞌoꞌ mil trij, neꞌ tre. 21In bix tre rmal ja rpatrón:
—Utz xaban tre ja samaj, atat at jun utzlaj moso, janila naban cumplir ruqꞌuin ja rasamaj. Xa ti ma nim ta ja xinyaꞌ can chawe pro xaban cumplir. Camic, más chi na qꞌuiy xtinyaꞌ chawe chi nasamajij. Camic catajoꞌ, ninawachbilaj chipan ja quicotemal, neꞌxi. 22Ja cꞌa yaꞌon can caꞌiꞌ mil quetzal tre, arjaꞌ peti chakajaꞌ in xbij tre ja rpatrón:
—Wajaw, atat caꞌiꞌ mil quetzal ayaꞌon can chwe, tatzꞌataꞌ mpeꞌ, xinchꞌec caꞌiꞌ mil quetzal trij, neꞌ tre. 23In bix tre rmal ja rpatrón:
—Utz xaban tre ja samaj, atat at jun utzlaj moso, janila naban cumplir ruqꞌuin ja rasamaj. Xa ti ma nim ta ja xinyaꞌ can chawe pro xaban cumplir. Camic, más chi na qꞌuiy xtinyaꞌ chawe chi nasamajij. Camic catajoꞌ, ninawachbilaj chipan ja quicotemal, neꞌxi. 24In chakajaꞌ ja yaꞌon can jun mil quetzal tre, arjaꞌ peti in xbij tre ja rpatrón:
—Wajaw, anin bien chꞌobtaj mwal chi atat at jun achi at cꞌaꞌn in wotak chi xa chꞌecoj nawajoꞌ tre ja rapwok pro mta samaj naban. 25Rmalcꞌariꞌ xinxbej wiꞌ, ja jun mil quetzal ayaꞌon chwe, xinbe, xenmukuꞌ can pa tokꞌulew. Camic ncꞌamonto ja rapwok riꞌ, tacꞌamaꞌ pon, neꞌ tre. 26Pro bix tre rmal ja rpatrón:
—Atat xa at jun itzel moso, xa at sakꞌor. Ja wi queriꞌ xachꞌob chwij chi anin xa chꞌecoj nwajoꞌ tre ja npwok in mta samaj nban 27ja ta cꞌa xaban xayaꞌ ta ja npwok pa banco. Ja wixta queriꞌ xaban, ja cꞌa tok xinpeti jach ta cꞌariꞌ ja npwok chwe rachbil ta ral, neꞌxi. 28Cꞌacꞌariꞌ ja patrón xbij chique juleꞌ chic rmoso:
—Camic, temajaꞌ ja jun mil quetzal tre in teyaꞌaꞌ tre ja cꞌo lajuj mil quetzal ruqꞌuin. 29Queriꞌ neban tre como ja winak ja cꞌo jeꞌe yatajnak chique in wi nquisamajij jariꞌ xa janiꞌ nyataj más chique in tok xtiqꞌuiswani congana nqꞌuiyi, nuban qꞌuiy cuqꞌuin. Pro ja winak ja matiquisamajij ja yatajnak chique ejeꞌeꞌ nlasax chique ja yatajnak chique. 30Jalaꞌ jun moso leꞌ xa mta noc wiꞌ, camic techapaꞌ, teqꞌuiakel chipan ja nimlaj kꞌekumal. Ja cꞌa winak janila chi okꞌej xtiqueban chipan ariꞌ lugar in xtiquicachꞌachꞌej cakꞌ. Queriꞌ xbij ja patrón chique.
* * * * * * * * * *
31Ja Ralcꞌwalaxel ja xoc alaxic cuqꞌuin ja winak arjaꞌ npi chi na jutij, janila nim chic rukꞌij, erachbilanto canojel ja ángel. Tokocꞌariꞌ xtitzꞌabeꞌ chipan ja rtzꞌulibal, jariꞌ tzꞌulbal xin Rey in janila nim rukꞌij. 32In nojel tinamit nemo̱l chwach, cꞌacꞌariꞌ nuban caꞌiꞌ chique caniꞌ nuban jun yukꞌul carnelo, junwiꞌ neruyaꞌ wiꞌ ja tak carnelo in junwiꞌ neruyaꞌ wiꞌ ja tak qꞌuisicꞌ. 33Ja re caniꞌ tak carnelo ejeꞌeꞌ pa riquikꞌaꞌ neruyaꞌ wiꞌ, ja cꞌa re caniꞌ tak qꞌuisicꞌ pa rxcon neruyaꞌ wiꞌ. Queriꞌ xtuban ja Rey. 34Ja cꞌa recꞌo pa riquikꞌaꞌ quewaꞌ xtibij chique riꞌ:
—Ixix utz ixtzꞌaton rmal ja nataꞌ Dios, camic quixajoꞌ cꞌa, quixoc chipan ja gobierno xin chilaꞌ chicaj, jariꞌ ja herencia ewxin chominto ojer ja tok majaꞌn titzꞌucarsaxi ja rwachꞌulew. 35Queriꞌ nbij chewe como ja tok xinmajtaj ma waꞌal xeyaꞌ nway in tok chakij nuchiꞌ xeyaꞌ nuyaꞌ. Ja tok xinqꞌuejeꞌ checojol xinecꞌul pa tak ewochoch masqui ma ewotak ta nwach. 36Ja tok lawuloꞌ chic ntziak chwij xeyaꞌ wxin chi ncoj in tok xinyawaji xinekꞌijlaꞌ. Ja tok xinqꞌuejeꞌ pa cheꞌ xinetzꞌataꞌ. Queriꞌ ja nbij chique. 37Ja cꞌa utz netzꞌa̱t rmal ja Dios ejeꞌeꞌ tok nquicꞌaxaj chi queriꞌ nbix chique quewaꞌ xtiquibij tre riꞌ:
—Kajaw ¿nak kꞌij xatkatzꞌat atmajtajnak ma waꞌal in kayaꞌ away owi nak kꞌij xatkatzꞌat atmajtajnak ma chakichiꞌ in kayaꞌ ayaꞌ? 38In ¿nak kꞌij xatkatzꞌat ja ma kotak ta awach in xatkacꞌul owi nak kꞌij xatkatzꞌat ja lawuloꞌ chic atziak chawij in kayaꞌ awxin chi xacoj? 39In ¿nak kꞌij xatkatzꞌat at yawaꞌ owi atcꞌo pa cheꞌ in xatekakꞌijlaꞌ? Queriꞌ ja xtiquibij tre. 40Ja cꞌa Rey quewaꞌ xtibij chic chique riꞌ:
—Ni katzij wiꞌ ja xtinbij chewe riꞌ, ja tok xeꞌetoꞌ ja tak wachꞌalal, anin cꞌariꞌ ja xinetoꞌ. Queriꞌ rbanic masqui xa más sencillo jun ti wachꞌalal ja xetoꞌ. Queriꞌ ja xtibij chic chique. 41Ja cꞌa recꞌo pa rxcon quewaꞌ xtibij chique riꞌ:
—Ixix ja xa itzel ixtzꞌaton rmal ja Dios quixel chinwach, camic nixbe chipan ja kꞌakꞌ ja mta qꞌuisic trij, jariꞌ kꞌakꞌ xa rmal ja diablo tok chomin chi nta̱kel arjaꞌ chipan e rachbil ja ángel rxin. 42Camic, quixel chinwach como ja tok xinmajtaj ma waꞌal ma xeyaꞌ ta nway in tok chakij nuchiꞌ ma xeyaꞌ ta nuyaꞌ. 43Ja tok xinqꞌuejeꞌ checojol xa ma ewotak ta nwach in ma xinecꞌul ta pa tak ewochoch. Ja tok lawuloꞌ chic ntziak chwij ma xeyaꞌ ta wxin chi xincoj ta in tok xinyawaji in tok xinqꞌuejeꞌ pa cheꞌ ma xinekꞌijlaꞌ ta. Queriꞌ ja nbij chique. 44Ja cꞌa rejeꞌeꞌ tok nquicꞌaxaj chi queriꞌ nbix chique quewaꞌ xtiquibij tre riꞌ:
—Kajaw ¿nak kꞌij xatkatzꞌat atmajtajnak ma waꞌal owi rmal chakichiꞌ owi atcꞌo chikacojol owi lawuloꞌ chic atziak chawij owi at yawaꞌ owi atcꞌo pa cheꞌ in ma xatkatoꞌ ta? Queriꞌ ja xtiquibij tre. 45Ja cꞌa rarjaꞌ quewaꞌ xtibij chic chique riꞌ:
—Ni katzij wiꞌ ja xtinbij chewe riꞌ, ja tok ma xeꞌetoꞌ ta ja tak wachꞌalal, anin cꞌariꞌ ja ma xinetoꞌ ta. Queriꞌ rbanic masqui xa más sencillo jun ti wachꞌalal ja ma xetoꞌ ta. Queriꞌ ja xtibij chic chique. 46Ejeꞌeꞌ riꞌ nebe na chipan ja nimlaj rpokonal ja mta qꞌuisic trij pro ja utz netzꞌa̱t rmal ja Dios ejeꞌeꞌ nebe na chipan ja utzlaj cꞌaslemal ja mta qꞌuisic trij. Queriꞌ xbij ja Jesús chique ja rdiscípulo.
Tans Gekies:
Mateo 25: tzjW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2010, Wycliffe Bible Translators, Inc. All rights reserved.
