Mateo 13
13
1Chipan ariꞌ kꞌij xelel ja Jesús pa jay, be chiyaꞌ in triꞌ xetzꞌabeꞌ wiꞌ. 2Congana e qꞌuiy ja winak xequimoloꞌ quiꞌ ruqꞌuin rmalcꞌariꞌ tok arjaꞌ xoc chipan jun lancha in tzꞌabeꞌ chipan. Ja cꞌa winak xepeꞌe can chiyaꞌ canojelal. 3In xumaj tzij cuqꞌuin, qꞌuiy rwach ja xbij chique pa cꞌambal tak tzij, quewaꞌ xbij riꞌ:
—Cꞌo jun ajticolaꞌ be pa ticoj tijcoꞌm pa rchenoj. 4Ja cꞌa tok xekaji xumaj rchicaxic ja rijaꞌtz. Cꞌo cꞌa kaj pa bey in xepeti ja tzꞌiquin, quetij. 5Cꞌo chic juleꞌ kaji ja bar cꞌo wiꞌ abaj, xa xax ja rulew in chanim xelto rmal. 6Pro ja tok xelto ja kꞌij, xcꞌatsaj in tok qꞌuiswani chakij rmal como mta más ja rcꞌamal. 7Cꞌo chic juleꞌ kaj pa tak qꞌuix in tok qꞌuiswani qꞌuiyi ja qꞌuix, xcamsaj ja tijcoꞌm. 8Pro cꞌo chic juleꞌ kaj pan utzlaj ulew in wachini chi utz, ja jun chirwach ijaꞌtz cꞌoli xuyaꞌ jun ciento, cꞌoli xuyaꞌ sesenta in cꞌoli xuyaꞌ treinta. 9Bien cꞌa tewasaj enaꞌoj trij ja cꞌa xinbij chewe riꞌ, neꞌ chique.
* * * * * * * * * *
10Ja cꞌa rdiscípulo ja Jesús ejeꞌeꞌ xeꞌekaj ruqꞌuin in quewaꞌ quibij tre riꞌ:
—¿Nak tre tok xa cꞌambal tak tzij nacoj tok nattzijon cuqꞌuin ja winak? xecheꞌ tre. 11Ja cꞌa Jesús arjaꞌ xbij chique:
—Ja rixix yatajnak chewe chi newotakij nak rbanic ja rawatal jeꞌe tre ja gobierno xin chilaꞌ chicaj pro ja chique ja juleꞌ chic winak leꞌ ejeꞌeꞌ ma yatajnak ta chique. 12Queriꞌ nbij chewe como ja winak ja cꞌo jeꞌe yatajnak chique ejeꞌeꞌ nyataj na más chique in tok nqꞌuiswani nuban qꞌuiy cuqꞌuin. Pro ja cꞌa winak ja mta yatajnak chique pro nquechꞌob chi cꞌoli jariꞌ nlasax chique. 13Xa chewiꞌ tok ncoj cꞌambal tak tzij tok nintzijon cuqꞌuin ja winak leꞌ como ejeꞌeꞌ cꞌo quewach pro maticajoꞌ nquetzꞌat ja ncꞌu̱t chiquewach, cꞌo quixquin pro maticajoꞌ nquicꞌaxaj ja nbix chique in ni matichꞌobtaj wiꞌ cumal. 14Ja netajini nqueban jariꞌ nbantaj cumplir ja rbin can ja Dios caniꞌ bitajnak can ojer rmal ja profeta Isaías quewariꞌ: —Ruqꞌuin ewxquin necꞌwaxaj na pro ni matichꞌobtaj wiꞌ emwal in ruqꞌuin ewach netzꞌat na pro ni mta wiꞌ nak ta newasaj trij, neꞌe. In jun chic xbij quewariꞌ: 15—Queriꞌ nbij chique ja winak leꞌ como ja canma cowirnak in ja quixquin cꞌayew chi noc chipan ja nbix chique in ja quewach xa quiyupun. Queriꞌ nqueban como mta quigana nquetzꞌat ja ncꞌu̱t chiquewach in nixtacꞌa cꞌo ta quigana nquicꞌaxaj ja nbix chique in nixtacꞌa cꞌo ta quigana nquechꞌob pa tak canma ja nchꞌo̱b chiquewach in nixtacꞌa cꞌo ta quigana chakajaꞌ nemeloj wqꞌuin utzcꞌa chi ncuy ja quil quemac, neꞌe ja Dios. Queriꞌ cꞌa ja bitajnak can. 16Pro ja rixix congana quiꞌil chewe como netzꞌat ja ncꞌu̱t chewach in necꞌwaxaj ja nbix chewe. 17Queriꞌ nbij chewe como ni katzij wiꞌ ja nbij chewe riꞌ, e qꞌuiy ja rojer tak profeta in e qꞌuiy ja juleꞌ chic winak ja utz xetzꞌa̱t rmal ja Dios, ejeꞌeꞌ congana quiyarij quetzꞌat ta ja caniꞌ nixtajini netzꞌat ixix camic in congana quiyarij quicꞌaxaj ta chakajaꞌ ja caniꞌ nixtajini necꞌwaxaj ixix camic.
18Tecꞌwaxaj cꞌa camic, anin nchꞌob chewach nak rcꞌamonto ja cꞌambal tzij ja xinbij chewe tre ja rajticolaꞌ. 19Ja utzlaj tzij ja nucꞌut chikawach nak rbanic ja gobierno xin chilaꞌ chicaj, ja tok nel rbixic in tok cꞌo jun ncꞌwaxaj pro matichꞌobtaj rmal ja cꞌa diablo npeti, nlasajel ja tzij ja ticon pa ranma. Ja cꞌa riꞌ tibij tzij ja rijaꞌtz ja kaj pa bey. 20Ja cꞌa rijaꞌtz ja kaji ja bar cꞌo wiꞌ abaj jariꞌ tibij tzij ja winak ja nquicꞌaxaj ja utzlaj tzij in chanim nquinimaj, congana nequicot rmal. 21Pro ejeꞌeꞌ e caniꞌ juleꞌ tijcoꞌm ja mta rcꞌamal, xa ti jurata nquinimaj. Ja cꞌa tok xterilaꞌ ja cꞌayewalaj tiempo ja tok nmajtaj rbanic pokon chique ja winak rmal ja rtzobal Dios ejeꞌeꞌ chanim nqueyaꞌ can. 22Ja cꞌa rijaꞌtz ja kaj pa tak qꞌuix jariꞌ tibij tzij ja winak ja nquicꞌaxaj ja utzlaj tzij pro tok nqꞌuiswani xa jaꞌ nquibisoj chic ja xin rwachꞌulew in xa neba̱n engañar rmal ja mebaꞌil. Rmalcꞌariꞌ tok xa ncami ja utzlaj tzij ja cꞌo pa tak canma, mta rwach nuyaꞌ. 23Pro ja rijaꞌtz ja kaj pan utzlaj ulew jariꞌ tibij tzij ja winak ja nquicꞌaxaj ja utzlaj tzij in nchꞌobtaj cumal in cꞌoli rwach nuyaꞌ pa tak canma. Ejeꞌeꞌ e caniꞌ juleꞌ chirwach ijaꞌtz cꞌoli xuyaꞌ jun ciento, cꞌoli xuyaꞌ sesenta in cꞌoli xuyaꞌ treinta. Queriꞌ xbij ja Jesús chique.
* * * * * * * * * *
24In cꞌo chic jun ja cꞌambal tzij xbij chique quewariꞌ:
—Ja gobierno xin chilaꞌ chicaj queriꞌ rbanic caniꞌ xuban jun achi xutic juleꞌ utzlaj ijaꞌtz xin trigo pa rchenoj. 25Pro ja winak ja tok ekajnak chic chi waram peti ja rcꞌulel ja rachi, xurticaꞌ juleꞌ itzel ijaꞌtz chicojol ja trigo. Ja cꞌa tok tictaj can rmal meloji. 26Ja cꞌa trigo xumaj qꞌuiyem in tok xumaj kꞌenaric ja rwach triꞌ xotakix wiꞌ chakajaꞌ ja juleꞌ chic ja ticon chicojol chi xa itzel tijcoꞌm. 27Ja cꞌa rajsamajelaꞌ ejeꞌeꞌ xebe ruqꞌuin ja quipatrón ja ticowi ja utzlaj ijaꞌtz, xequibij tre:
—Kajaw ¿la ma utzlaj ijaꞌtz ta cꞌa ja xatic chipan ja rachenoj? ¿Nak moda tok cꞌo juleꞌ itzel tijcoꞌm chicojol camic? xecheꞌ tre. 28In bix chique:
—Jariꞌ cꞌo jun ncꞌulel ticowi, xecheꞌxi. Ja cꞌa rajsamajelaꞌ ejeꞌeꞌ quibij chic jutij tre:
—¿La matawajoꞌ cꞌa nokbe camic nekabokoꞌ? xecheꞌ tre. 29In bix chic jutij chique:
—Jariꞌ ma can ta, ma tebok ta, matzij tucꞌamto ja trigo tok xtebok. 30Mejor chꞌenchilaꞌ, tiqꞌuiy na chi caꞌiꞌ como ja tok xterilaꞌ ja tiempo xin cosecha anin nbij na chique ja xquesamaj chipan ja tiempo xin cosecha: —Temoloꞌ ruchiꞌ nabey ja ritzel tijcoꞌm in teximaꞌ rpan pa tak manoja utzcꞌa chi nporoxi. Pro ja trigo temoloꞌ ruchiꞌ chakajaꞌ in tecꞌoloꞌ, nincheꞌ na chique. Queriꞌ ja cꞌambal tzij xbij chique.
* * * * * * * * * *
31In cꞌo chi cꞌa jun ja cꞌambal tzij xbij chique quewariꞌ:
—Ja gobierno xin chilaꞌ chicaj queriꞌ rbanic caniꞌ jun ti chirwach mostaza cꞌamarel rmal jun achi, xutic pa rchenoj. 32Jun ti chirwach mostaza más na tinoꞌy chwach ja juleꞌ chic ijaꞌtz pro ja tok nqꞌuiyi más na nqꞌuiyi chwach juleꞌ chic tijcoꞌm, noqui caniꞌ jun mocaj cheꞌ. Rmalcꞌariꞌ ja tak tzꞌiquin ejeꞌeꞌ nepeti, nurquibanaꞌ quesoc pa tak rukꞌaꞌ. Queriꞌ ja cꞌambal tzij xbij chique.
* * * * * * * * * *
33In cꞌo chic jun ja cꞌambal tzij xbij chique quewariꞌ:
—Ja gobierno xin chilaꞌ chicaj queriꞌ rbanic caniꞌ nuban juleꞌ levadura ja nsapoji caxlanway rmal in cꞌo jun ixok xucꞌam, xuyaꞌ chipan juleꞌ kꞌor, oxiꞌ pajbal harina ocnak. Ja cꞌa tok qꞌuiswani ja levadura mta ja maquita xekaj wiꞌ tre ja kꞌor, congana samaj chipan. Queriꞌ ja cꞌambal tzij xbij chique.
* * * * * * * * * *
34Ja Jesús, nojel ja tzij xbij chique ja winak xucoj cꞌambal tak tzij chi rbixic chique. Ni majun nak ta xbij ta chique ja maquita xucoj cꞌambal tak tzij chi rbixic chique. 35Queriꞌ xuban utzcꞌa chi triꞌ bantaj wiꞌ cumplir ja bitajnak can ojer rmal ja profeta quewariꞌ: —Ja tok xquintzijoni, cꞌambal tak tzij ncoj. Ja rawatalto jeꞌe ja tok majaꞌn titzꞌucarto ja rwachꞌulew anin nkꞌalasaj na. Queriꞌ ja bitajnak can.
* * * * * * * * * *
36Cꞌacꞌariꞌ ja Jesús xeruban can despedir ja winak, be, xoc pa jay. Ja cꞌa rdiscípulo ejeꞌeꞌ xeꞌekaj ruqꞌuin in quibij tre:
—Tachꞌoboꞌ chikawach nak rcꞌamonto ja cꞌambal tzij ja xabij tre ja ritzel tijcoꞌm ja tic chicojol ja trigo, xecheꞌ tre. 37Ja cꞌa Jesús quewaꞌ xbij chique riꞌ:
—Ja nticowi ja utzlaj ijaꞌtz jariꞌ anin ja rin Alcꞌwalaxel ja xinoc alaxic cuqꞌuin ja winak. 38Ja chenoj jariꞌ ja rwachꞌulew. Ja utzlaj ijaꞌtz jariꞌ ja recꞌo pa rcuenta ja gobierno xin chilaꞌ chicaj. Ja ritzel tijcoꞌm jariꞌ ja recꞌo pa rcuenta ja diablo. 39Ja ticowi ja ritzel tijcoꞌm ja rcꞌulel ja rachi jariꞌ ja diablo. Ja tiempo xin cosecha jariꞌ ja qꞌuisbal tak kꞌij ja tok xquinpi chic jutij. Ja nebanowi ja cosecha jariꞌ ja ángel. 40Caniꞌ nba̱n tre ja ritzel tijcoꞌm nmo̱l ruchiꞌ in nporox pa kꞌakꞌ queriꞌ cꞌa xtibantaj chique ja winak chakajaꞌ chipan ja qꞌuisbal tak kꞌij. 41Ja cꞌa ranin ja rin Alcꞌwalaxel ja xinoc alaxic cuqꞌuin ja winak xquenutakto ja ángel wxin, neꞌurquichapaꞌ canojel ja winak ja recꞌo chipan ja ngobierno ja xa nequitakchiꞌij ja cach tak winak chi rbanic ja il mac, neꞌurquichapaꞌ chakajaꞌ canojel ja juleꞌ chic winak ja xa e banol tak itzelal. 42Ja cꞌa tok nechaptaj cumal nequichꞌakijel chipan jun nimlaj kꞌakꞌ. Ja cꞌa winak janila chi okꞌej xtiqueban chipan ariꞌ lugar in xtiquicachꞌachꞌej cakꞌ. 43Tokocꞌariꞌ ja winak ja utz netzꞌa̱t rmal ja Dios ejeꞌeꞌ nyataj na chique chi nqueban ja caniꞌ nuban ja kꞌij, nechꞌaꞌan chipan ja gobierno xin Dios ja Tatixel quixin. Bien cꞌa tewasaj enaꞌoj trij ja cꞌa xinbij chewe riꞌ.
* * * * * * * * * *
44In jun chic, ja gobierno xin chilaꞌ chicaj queriꞌ rbanic caniꞌ jun nimlaj mebaꞌil wawan, mukun chipan jun chenoj in chaka jalal tok xiltaj rmal jun achi. Ja cꞌa rachi xumuk can chic jutij, nmeloji, congana nquicoti, nojel ja cꞌo ruqꞌuin ncꞌayij in nulokꞌ ja chenoj ja bar cꞌo wiꞌ ja nimlaj mebaꞌil.
* * * * * * * * * *
45In jun chic, ja gobierno xin chilaꞌ chicaj queriꞌ rbanic caniꞌ nuban jun comerciante ntajini ncanoj juleꞌ abaj perla neꞌxi, nimak rjil. 46Ja cꞌa tok xuwil jun ja perla ja más chi na nim rjil be, in nojel ja cꞌo ruqꞌuin xcꞌayij in xulokꞌ ja perla.
* * * * * * * * * *
47In jun chic, ja gobierno xin chilaꞌ chicaj queriꞌ rbanic caniꞌ jun cꞌam nqꞌuia̱k pa mar in neꞌoqui ja chꞌuꞌ chipan pro nojel quewach ja chꞌuꞌ neꞌoc chipan. 48Ja cꞌa tok xenoji ja chꞌuꞌ chipan lasaxto chiyaꞌ. Ja cꞌa xewasanto ejeꞌeꞌ xetzꞌabeꞌe, quemaj quichaꞌic ja chꞌuꞌ. Ja buen tak chꞌuꞌ jariꞌ xequecꞌol pro ja mta neꞌoc wiꞌ xa xequichꞌakijel. 49In queriꞌ cꞌa xtibantaji chakajaꞌ chipan ja qꞌuisbal tak kꞌij, nepeti ja ángel, neꞌurquiwasajel ja ritzel tak winak chiquicojol ja re utz 50in nequichꞌakijel chipan ja nimlaj kꞌakꞌ. Ja cꞌa winak janila chi okꞌej xtiqueban chipan ariꞌ lugar in xtiquicachꞌachꞌej cakꞌ, neꞌe ja Jesús chique ja rdiscípulo. 51Cꞌacꞌariꞌ xbij chic chique:
—¿La nchꞌobtaj emwal nojel ja xinbij chewe? neꞌ chique.
—Nchꞌobtaji Kajaw, xecheꞌ tre. 52In xbij chic jutij chique:
—Como nchꞌobtaj emwal rmalcꞌariꞌ nbij chewe chi canojel ja maestro ja nquitijoj quiꞌ tre ja gobierno xin chilaꞌ chicaj ejeꞌeꞌ e junan ruqꞌuin jun rajaw jay ja cꞌoli nojel ruqꞌuin ja ncꞌatzini, cꞌo cꞌacꞌa, cꞌo ma cꞌacꞌa ta chakajaꞌ in arjaꞌ nlasajto xa nak ta ncꞌatzin tre chi caꞌiꞌ. Queriꞌ ja xbij chique.
* * * * * * * * * *
53Ja cꞌa Jesús ja tok bitaj can rmal nojel awaꞌ ja cꞌambal tak tzij riꞌ arjaꞌ xelel 54in be chipan ja rtinamit arjaꞌ. Ja cꞌa tok xekaji xoc chipan ja jay xin molbal riꞌil in xumaj quitijoxic ja winak. Ja cꞌa winak congana cꞌascꞌoꞌi quicꞌaxaj ja tijonem ja xuyaꞌ chique in quewaꞌ quibij chibil tak quiꞌ riꞌ:
—¿Bar cꞌa penak walaꞌ ja rocnak tre jalaꞌ jun achi leꞌ? congana takaꞌan rnaꞌoj in congana nimak tak milagro nuban chakajaꞌ. 55Pro ¿la ma arjaꞌ ta cꞌalaꞌ ja rcꞌajol ja josol cheꞌ? In ja ruteꞌ ¿la ma arjaꞌ ta cꞌa ja rbinaꞌan María? In ja rchꞌalal ¿la ma ejeꞌeꞌ ta cꞌa ja Jacobo, José, Simón in Judas? 56In canojel ja ranaꞌ ¿la ma ecꞌo ta cꞌa chikacojol chakajaꞌ? ¿Bar cꞌa penak wiꞌ nojel ja ntajini nuban? 57Queriꞌ quibij, ni majun quigana ruqꞌuin, xa pokon nquenaꞌ. Ja cꞌa Jesús arjaꞌ xbij chique:
—Ni majun profeta xin Dios ja maquita lokꞌ nnaꞌi xarwariꞌ ma lokꞌ ta nnaꞌi cumal ja rach aj tinamit in nixtacꞌa cumal ta ja recꞌo pa rochoch chakajaꞌ, neꞌ chique. 58In xa ma nim ta ja milagro xuban triꞌ rumac ja ma xyukeꞌ ta quecꞌuꞌx ruqꞌuin.
Tans Gekies:
Mateo 13: tzjW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2010, Wycliffe Bible Translators, Inc. All rights reserved.
