Mateo 10
10
1Ja cꞌa Jesús arjaꞌ xersiqꞌuij ja cablajuj discípulo in xuyaꞌ chique chi cꞌo quekꞌaꞌ chique ja ritzel tak espíritu chi necowini nequiwasajel chique ja winak in xuyaꞌ chique chakajaꞌ chi necowini nequitzursaj yawaꞌiꞌ xa nak ta ntiꞌon chique. 2Ja quebiꞌ ja cablajuj apóstol quewariꞌ, ja nabey, Simón ja cꞌo chic jun rubiꞌ Pedro, Andrés ja rchꞌalal Simón, Jacobo ja rcꞌajol Zebedeo, Juan ja rchꞌalal Jacobo, 3Felipe, Bartolomé, Tomás, Mateo ja molol impuesto, Jacobo ja rcꞌajol Alfeo, Lebeo ja cꞌo chic jun rubiꞌ Tadeo, 4Simón, jun chique ja partido rbinaꞌan cananita, in Judas Iscariote ja jachowi ja Jesús pa quekꞌaꞌ ja xetzelan rxin.
* * * * * * * * * *
5Ja cꞌa Jesús arjaꞌ xerutakel ja cablajuj discípulo in bien xuchꞌobel chiquewach nak ja xtequibanaꞌ:
—Ma tecꞌamel ta jeꞌe ja bey ja nbe cuqꞌuin ja winak ja ma e aj Israel ta in chakajaꞌ ni majun tinamit quixin aj Samaria xquixoc ta chipan. 6Ja nixbe wiꞌ, jix cuqꞌuin ja raj Israel ja re caniꞌ juleꞌ tak carnelo etzaknak. 7Chipan ja viaje xteban nijawawaꞌ xteyaꞌ rbixic chique ja winak riꞌ: —Xa nnakajinto ja gobierno xin chilaꞌ chicaj, quixcheꞌ chique. 8Queꞌetzursaj yawaꞌiꞌ in queꞌetzursaj ja cꞌo itzel tak chꞌaꞌc chiquij chakajaꞌ, queꞌeyicaꞌ camnakiꞌ chipan ja camíc in queꞌewasajel itzel tak espíritu chique ja winak. Como ja poder xinyaꞌ chewe riꞌ xa xecochij chwe rmalcꞌariꞌ nbij chewe, maxta tecꞌutuj pwok chique winak tok necoj ja poder chi quitoꞌic. 9Ni majun pwok necꞌamel tok xquixbe. 10Nixtacꞌa necꞌamel ta emaleta in ni xa ja wariꞌ ja recamisa necꞌamel ja recojon, ma caꞌiꞌ ta, in ma caꞌiꞌ cꞌulaj ta exajab in ma caꞌiꞌ ta echꞌameꞌy. Queriꞌ nbij chewe como jun ajsamajel yatal tre chi nya̱ꞌ tre ja ntzukbej riꞌ. 11Xa nak ta chi tinamital nixoc wiꞌ in xa nak ta chi aldeaꞌil, triꞌ necanoj wiꞌ jun winak ja yatal trij chi ixix nixqꞌuejeꞌ ruqꞌuin in triꞌ nixqꞌuejeꞌ wiꞌ, cꞌa tokoriꞌ nixelel ruqꞌuin ja tok nixbe chic cha jun chic tinamit. 12Ja tok nixoc chipan ja jay quewaꞌ nebij riꞌ: —Ja quicotemal xin Dios tiqꞌuejeꞌ pan ewochoch, quixcheꞌ chique. 13Ja winak wi yatal chiquij chi nixqꞌuejeꞌ cuqꞌuin xtiqꞌuejeꞌ ta cuqꞌuin ja quicotemal xin Dios ja recꞌamonel chique. Nowi ma yatal ta chiquij chi nixqꞌuejeꞌ cuqꞌuin matiqꞌuejeꞌ cꞌariꞌ chakajaꞌ ja quicotemal xin Dios cuqꞌuin. 14In xa nak ta ja maquecꞌulu ewxin, xa nak ta ja mta quigana nquicꞌaxaj ja nebij chique, ja cꞌa tok nixelto pa jay cuqꞌuin owi pa tinamit tequiraj can ja pokok ja cꞌo pan ewakan. 15Ni katzij wiꞌ ja nbij chewe riꞌ, ja tok xterilaꞌ ja nimlaj kꞌij xin juicio congana lawuloꞌ tre ja tinamit ja maquecꞌulu ewxin, más na lawuloꞌ ja rpokonal xtiquetij chwach ja xtiquetij ja ritzel tak winak ja raj Sodoma in Gomorra ojer.
* * * * * * * * * *
16Camic tecꞌamaꞌel ja bey, bien tewotakijel chi ixix ix caniꞌ juleꞌ tak carnelo in ja winak ja bar nixnutakel wiꞌ ejeꞌeꞌ e caniꞌ utiwaꞌ. Quixqꞌuejeꞌ listo caniꞌ nuban jun cumatz ncowini nutoꞌ riꞌ xarwariꞌ tebanaꞌ ix manso caniꞌ nuban jun palomax. 17Tebanaꞌ jutzꞌit cuenta ewiꞌ chiquewach ja winak como ejeꞌeꞌ nixquecꞌamel na pa tak kꞌetbaltzij in nixquirapaj chakajaꞌ pa tak jay xin molbal riꞌil quixin. 18Nixquecꞌamel chiquewach gobernador, nixquecꞌamel chiquewach rey pro mwal anin tok xtiban queriꞌ chewe. Queriꞌ xtiban chewe utzcꞌa chi nel ntzijoxic chiquewach ejeꞌeꞌ in chiquewach ja winak ja ma e aj Israel ta. 19Pro ja cꞌa tok xquixcꞌamarel chiquewach maxta quixoclaꞌ il tre ja nebij ja netobej ewiꞌ chiquewach como jariꞌ hora nyataj chewe nak ja nebij chique. 20Queriꞌ nbij chewe como ma ixix ta nixtzijoni triꞌ pro ja rEspíritu Santo arjaꞌ nyoꞌ chewe nak ja xtebij chique, jariꞌ Espíritu rxin ja Dios ja Tatixel ewxin.
21Ja xtiqueban ja ralaxic chique ja cach tak alaxic nequejach na pa camíc in queriꞌ xtiqueban ja tatixelaꞌ chakajaꞌ chique ja calcꞌwal in chakajaꞌ ja ralcꞌwalaxelaꞌ ejeꞌeꞌ neyictaj na chiquij ja tatixelaꞌ in nequejach na pa camíc. 22Ja cꞌa rixix xa itzel nixtzꞌat na cumal canojel ja winak pro mwal anin ja tok xtiban queriꞌ chewe. Pro canojel ja xtiquecochꞌ quewach chipan ja rpokonal in ni matiqueyaꞌ can wiꞌ ja yukulbal quecꞌuꞌx wqꞌuin ejeꞌeꞌ riꞌ nquewil na ja totajem xin Dios. 23Ja cꞌa tok nba̱n pokon chewe chipan jun tinamit quixanmaji, jix chic cha jun chic tinamit. Queriꞌ nbij chewe como ni katzij wiꞌ ja xtinbij chewe riꞌ, ja tok majaꞌn quixkꞌax chipan nojel ja tinamit ja cꞌo pa rcuenta Israel can ninpi chic jutij, anin ja rin Alcꞌwalaxel ja xinoc alaxic cuqꞌuin ja winak.
24Mta jun discípulo nim ta rukꞌij chwach ja rmaestro in chakajaꞌ mta jun ajsamajel nim ta rukꞌij chwach ja rpatrón. 25Ja cꞌa nuban ja discípulo mejor, queqꞌuejeꞌ conforme chi nba̱n chique ja caniꞌ nba̱n tre ja quimaestro, in ja rajsamajelaꞌ chakajaꞌ mejor, queqꞌuejeꞌ conforme chi nba̱n chique ja caniꞌ nba̱n tre ja quipatrón. Anin in Epatrón in como quibij chwe chi anin in jefe quixin ja demonio pior cꞌa ja chewe ixix, congana nixquitzelaj na chakajaꞌ ja rix ajsamajelaꞌ wxin.
* * * * * * * * * *
26Rmalcꞌariꞌ nbij chewe, ma texbej ta ewiꞌ chiquewach. Queriꞌ nbij chewe como nojel ja ma kꞌalajinnak ta jeꞌe jariꞌ nerilaꞌ na jun kꞌij tok xtikꞌalajini in nojel ja rawatal jeꞌe jariꞌ nel na pa sakil, notakix na. 27Nojel ja nbij chewe tok xa kayon kaj jariꞌ tekꞌalasaj, tewasaj pa sakil, teyaꞌaꞌ rbixic chiquewach ja winak. 28Ma texbej ta ewiꞌ chiquewach ja winak ja xa ruyon ecuerpo necowini nquicamsaj pro ja rewanma jariꞌ maquecowini nquicamsaj. Pro ja nexbej wiꞌ ewiꞌ, chwach ja ncowini nuyaꞌ ja rewanma chipan ja nimlaj rpokonal pa kꞌakꞌ rachbil ecuerpo.
29Ja tak tzꞌiquin ja tok necꞌayixi xa jun ti centavo neya̱ꞌ wiꞌ ja re caꞌiꞌ. Pro masqui xa e tak barata pro nixtacꞌa cꞌo ta jun chique ja chaka ta ncami, ni maquecam wiꞌ ja maquita rvoluntad Dios chi necami in jariꞌ Dios arjaꞌ Tatixel ewxin. 30In ja cꞌa chewe ixix mta moda xquixrmestaj ta ja Dios, ja rsamal ewíꞌ rajlan chijujunal. 31Rmalcꞌariꞌ nbij chewe, ma texbej ta ewiꞌ, más na ix vale chiquewach jun nimlaj moc tzꞌiquin.
* * * * * * * * * *
32Ja winak xa nak ta chi winakil wi matiquipokonaj nquibij chi wqꞌuin anin yukul wiꞌ quecꞌuꞌx pro wi ni chiquewach ja winak nquibij wiꞌ, anin chakajaꞌ can nbij na chique chi ecꞌo pan ncuenta pro ni chwach ja Nataꞌ ja cꞌo chilaꞌ chicaj xtinbij wiꞌ. 33Pro ja winak xa nak ta chi winakil wi nquipokonaj nquibij chiquewach ja winak chi wqꞌuin anin yukul wiꞌ quecꞌuꞌx, anin chakajaꞌ nbij na chique chi ma ecꞌo ta pa ncuenta pro ni chwach ja Nataꞌ ja cꞌo chilaꞌ chicaj xtinbij wiꞌ.
* * * * * * * * * *
34Maxta techꞌob chwij chi anin xa quicotemal ncꞌamonto waweꞌ chwachꞌulew. Mni, ma rmal tariꞌ tok inpenak. Ma rmal ta chi xa xquequicoti ja winak chibil tak quiꞌ tok inpenak pro rmal chi nqueban chꞌaꞌoj mwal. 35Ja ralaꞌiꞌ ejeꞌeꞌ nechꞌojin na cuqꞌuin ja quitataꞌ in ja xtaniꞌ ejeꞌeꞌ nechꞌojin na cuqꞌuin ja queteꞌ in ja ralibotz ejeꞌeꞌ nechꞌojin na cuqꞌuin ja caliteꞌ. 36Queriꞌ ja nbantaj na, ja rcꞌulel jun winak ni pa rochoch arjaꞌ neyictaj wiꞌ. 37Ja winak ja más na necajoꞌ ja quitataꞌ chinwach anin owi queteꞌ, ejeꞌeꞌ ma yatal ta chique xqueꞌoc ta ndiscípulo. Ja winak ja cꞌo jun calcꞌwal ja más na ncajoꞌ chinwach anin, ejeꞌeꞌ ma yatal ta chique xqueꞌoc ta ndiscípulo chakajaꞌ. 38Ja winak ja nquipokonaj netreꞌel chwij, ja nquipokonaj nquetij rpokonal ja caniꞌ nutij rpokonal jun achi rmajon rijkaxic jun cruz, ejeꞌeꞌ ma yatal ta chique xqueꞌoc ta ndiscípulo chakajaꞌ. 39Ja winak ja nquipokonaj nqueyaꞌ can ja quicꞌaslemal jariꞌ nquitzꞌilaꞌ ja utzlaj cꞌaslemal ja mta qꞌuisic trij. Pro ja winak ja matiquipokonaj nqueyaꞌ can ja quicꞌaslemal mwal anin jariꞌ nquewil na ja utzlaj cꞌaslemal ja mta qꞌuisic trij.
* * * * * * * * * *
40Ja winak ja necꞌulu ewxin, anin cꞌariꞌ ja ninquecꞌul in ja winak ja necꞌulu wxin, Nataꞌ cꞌariꞌ ja takyonto wxin ja nquecꞌul. 41Ja winak ja cꞌo jun profeta xin Dios nekaj cuqꞌuin, wi nquecꞌul in wi rumac chi profeta xin Dios chewiꞌ tok nquecꞌul, jariꞌ nyataj na chique jun rtojbalil ja caniꞌ nyataj chique ja profeta. In chakajaꞌ ja winak ja cꞌo jun utzlaj winak nekaj cuqꞌuin, wi nquecꞌul in wi rumac chi utzlaj winak chewiꞌ tok nquecꞌul, jariꞌ nyataj na chique jun rtojbalil ja caniꞌ nyataj chique ja utzlaj tak winak. 42In wi cꞌo jun winak xa nak ta chi winakil, wi cꞌo jun chique waꞌ ja tak ndiscípulo riꞌ nekaj ruqꞌuin, wi nsipaj tre jun vaso raxyaꞌ in wi rumac chi ndiscípulo chewiꞌ tok nsipaj, jariꞌ ni katzij wiꞌ nbij chewe, arjaꞌ mta moda ja maquita xtiyataji ja rtojbalil tre, neꞌe ja Jesús chique.
Tans Gekies:
Mateo 10: tzjW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2010, Wycliffe Bible Translators, Inc. All rights reserved.
