Genesis 6
6
Dune huye untsiꞌ-i ꞌinkꞌez be buba nahisda
1ꞋEt ꞌuhooja, ndi yun kꞌut dune ꞌawet nus za ꞌuhuniltsuk whe ꞌinkꞌez tsꞌekoo bubuzkeh suliꞌ. 2Yakꞌusda (Elohim) ooyeꞌke ꞌenne ndunne tsꞌekoo dune ootseꞌkene huhinzoo hubonilhꞌen. ꞋInkꞌez mbene la bukaꞌ huninzunne ꞌenne tsꞌekoo bubu hilhchoot, buꞌatke holeꞌ ha. 3ꞋEt Moodihti (Yahweh) ꞌutni, “Syoghi ꞌaw ꞌilhiz wheni dune bulh buchꞌaz dotni ꞌaitꞌoh. ꞋAlha ndi yun kꞌut dune unli ꞌet hoontsꞌi whunizyat whunizyai ꞌinkꞌez nat whunizyai (120) be yus kꞌut tileh whe ndi yun kꞌut tidalh.”
4ꞋEt ꞌoh daꞌ njan yun kꞌut dunechone hanleꞌ. ꞋEt hukwꞌelhꞌaz Yakꞌusda (Elohim) ooyeꞌke ꞌenne ndi yun kꞌut dune butseꞌke buzisda ꞌinkꞌez bubuzkehke yahonleꞌ. ꞋEt ndunne dune whuzdliꞌne, ꞌenne dune lhtuscho ꞌinkꞌez nchane ꞌuhintꞌoh.
5ꞋEt Moodihti (Yahweh) bunilhꞌen ndi yun kꞌut dune huye untsiꞌ tube ncha suliꞌ. Tsꞌiyawh ꞌahoolhyiz wheni ndune bubeni untsiꞌ, ꞌet whunilhꞌen. 6ꞋEt Moodihti (Yahweh) tube huwu dzi unduda ndi yun kꞌut dune ꞌinla-un, oodzi yo tube whunduda suliꞌ. 7ꞋEt Moodihti (Yahweh) ꞌutni, “Mbene la dune ndi yun kꞌut wheni ꞌubuslane, soo tsꞌiyawh gak hubutiselh. Ndi dune ꞌinkꞌez khuna-i, yun kꞌut nulhꞌas-i ꞌinkꞌez ndo dutꞌai nudilh-i cha, ꞌi tsꞌiyawh. ꞋEt tube huwu sdzi unduda ꞌubusdla ꞌet huwa.” 8ꞋEt hoontsꞌi Nowe ꞌen Moodihti (Yahweh) oonalh ndi ye netsꞌun unzoo-i ꞌet nahoonꞌai.
Nowe ꞌen Yakꞌusda (Elohim) yuba soo nduja
9Nowe tsꞌu haindene hukwꞌeguz ꞌet ꞌuhoontꞌoh. Nowe ꞌen tsꞌihꞌun dune unli, khuna daꞌ whe ꞌaw ookꞌeholtsꞌit hooloh. Nowe ꞌen Yakꞌusda (Elohim) bulh nuya inleꞌ.
10Nowe tane ooyeꞌke suliꞌ: Shem, Ham, ꞌinkꞌez Japheth.
11Yakꞌusda (Elohim) oonalh ndi yun kꞌut ndulcho dune nintaꞌhonilhꞌen ꞌinkꞌez dune lhezudla-un, dulcho whe whudizbun. 12ꞋEt Yakꞌusda (Elohim) njan yun kꞌut ꞌet whunilhꞌen whe ꞌalha tube nintaꞌwhuntꞌen. Dunene, ꞌenne tsꞌiyawh soo tsꞌihꞌun ꞌantsꞌi halhjut leꞌ hintꞌoh suliꞌ.
Tsꞌi cho ꞌulya
13Yakꞌusda (Elohim) ꞌen Nowe ꞌuyulhni, “Njan tsꞌiyawh ndai la ꞌusjiz-i, ꞌawet sba whula toh suliꞌ. Dunene ꞌenne bulagha tsꞌe ndi yun kꞌut tsꞌiyawh be lhezudla-i be hodilhbun. ꞋEt whunilhꞌen, ndi yun ndulcho whe ndi khuna tsꞌiyawh yun kꞌut husjiz-i, tsꞌiyawh bulh gak whutiselh. 14Ndi duchun gopher hiyulhni, ꞌi be tsꞌi cho ꞌónleh. ꞋInkꞌez bez tsꞌe ꞌet lhelhdun whulai holhtselh. Dzeh ꞌi be bez tsꞌe ꞌinkꞌez yoo ꞌaz tsꞌe cha be ondzeh. 15ꞋInkꞌez ꞌet ndiz unꞌa ndi tsꞌi cho ꞌi ꞌonleh: 450 feet ꞌet ꞌuhoolyiz, ꞌinkꞌez 75 feet ꞌet ꞌuhooltel, ꞌinkꞌez 45 feet naoodalhzaꞌ. 16Dadintꞌaz cho ooba ꞌonleh. ꞋIlho cubit ndo ooban whutsꞌun, ꞌet neninꞌa holhtselh. Oozih kꞌut ꞌet dati-un ꞌonleh. ꞋUdeyo-un yun cha ꞌonleh ꞌinkꞌez ꞌon do cha ꞌudun ꞌuhoonleh, ꞌinkꞌez bulh tat-un yun ꞌet ꞌuhonleh. 17ꞋEt whunilhꞌen ꞌet si ꞌutisnelh, yun kꞌut ndulhcho too ha tadutisbilh. Yat whutah ꞌet gak whutiselh. Tsꞌiyawh ndai ndi ꞌusjiz be tsꞌukhuna bulh ꞌuntꞌoh, ꞌi gak tileh. Ndi yun kꞌut ꞌet tsꞌiyai yatadlah. 18ꞋEt hoontsꞌi nyun ntsꞌun sghuni ntlꞌa dutisꞌalh. ꞋInkꞌez ndi tsꞌi cho bez tonyaꞌ, nyun, nyeꞌke, nꞌat, ꞌinkꞌez nyeꞌkeh buꞌatke cha, ꞌen dulh ꞌúbolneh. 19ꞋInkꞌez ndai la ndi yun kꞌut ꞌusjiz-i, lhawh didoh ꞌilho whe nawh didoh-i, ꞌi ndi ꞌi tsꞌi cho be ꞌonlelh. ꞋEt tsꞌiyawh hutinalh wheni tsꞌeke cha ꞌinkꞌez dune cha unli-i didoh-i tsꞌiyawh. 20Ndai la ndo nudilh-i dundultꞌoh-i, yun nulhꞌas-i dundultꞌoh-i cha, ꞌinkꞌez yun nutsꞌeh-i dundultꞌoh-i cha, nanki dundultꞌoh-i tsꞌiyawh ntsꞌun tidulh, hutinalh wheni. 21ꞋInkꞌez ndai la ꞌutꞌalh-i tsꞌiyawh, tanꞌulh-i tsꞌiyawh be ꞌonlelh, ꞌi tsꞌiyawh ꞌulhonlelh. ꞋI la oohꞌalh nyun ꞌinkꞌez ndi khuna-i cha.”
22ꞋEt Nowe ꞌet nduja, ntsꞌenꞌa Yakꞌusda (Elohim) yuba nahizya, ꞌet tsꞌiyawh nduja.
Tans Gekies:
Genesis 6: crx
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2019, Wycliffe Bible Translators, Inc. All rights reserved.
