Zaŋ 19

1Akẽh na, Pilat a ɓi ɓa a ram ti Yesu, ɓa a slikiɗakaŋ. 2Naɓa sojehey a fuɗam loppol ngi hadaw le zleˀe, a cakaŋ di kulaˀ a hirnga, waɗ a gijuwakaŋ zana gagaza avu vu. 3A kirohoko ng'avaŋ, a ɓakaŋ: «Zuy zuy aya, Buy ngi Yudehey!» Joˀ a zlaka a kiɗakaŋ.

4Pilat a bo ma, a ɓa Yudeheye: «Cinam, y'ani bukum di ng'avra aka, anja ki sinaka sin le, ko yi lum ɓi ava ɓa ngi jaŋ ti kiita ta.» 5Yesu a bo ng'avra, loppol ngi hadaw kulaˀ a hirnga, waɗ zana gagaza gijaw avu vu. Pilat a ɓa taŋ: «Mbur tuwa n'anihĩ!» 6Amma masay madiɗahay ati mizli taŋhaya mupuraka keɗ na, a zlaka a tilam mi, a ɓam: «Dira avu dum mizliraŋ! Dira avu dum mizliraŋ!» Pilat a ɓa taŋ: «Kum vuna, aram di, dirakaŋ. Da avu ya na, ko yi lum ɓi ava ɓa ngi jaŋ ti kiita ta.» 7Yudehey a mbiɗakaŋ di: «Ndrˀada ti ɓimujuwa. Kaɓa ɓi nah miɓi na, sey a mucu, asi a wa vu naŋ i Mangal ngi Buymisemuŋ.» 8Pilat micina mingiɓi hana na, a gaŋ zluwun fineˀ misi zleˀe ma. 9A mi ngi hay a muŋ, a ɓa Yesu: «Ka vuna, ki so ti dama kpak ka?» Amma ko Yesu a mbiɗaŋ di neˀ ta. 10Joˀ Pilat a ɓaŋ: «Ki ngum ɓi ta na, avu ya vuna kwa? Ya ti gidaŋ ngi puluw, yo ya ti gidaŋ ɓa a dirukuw ma gar na, ki si na ta kwa?» 11Amma Yesu a mbiɗaŋ di: «Da Bumbulvuŋ a puluw jiviɗ nah zleˀe ta na, k'anta ti gidaŋ ar ya ko neˀ ta. Vurˀe, mbur muvuliy ɓa ki jiy na, mungra nga naŋ a funa ngi ɗike le.»

12Zle ti nah na, Pilat a pur jiviɗ ɓa a pula Yesu. Amma Yudehey a zlaka a tilam mi, a ɓam: «Da ki pula le na, ɓa ki ngama ngi buy mimadiɗa#19.12 Buy mimadiɗa i Sezar a Roma muwa buy madiɗa ngi si ruwuy Romahay gar. ta! Asi ko wa gar mawa vu naŋ ka buy madiɗa na, naɓa i mesene ngi buy mimadiɗa.» 13Pilat micina mingiɓi hana cin na, a bi ti Yesu ng'avra, naŋ vuna a cifi ar janga ngi gi kiita, ar li mazilaka «midirkaka ti ɗugur». A zilaka ti mi Hebere: «Gabata»#19.13 Gabata: ti mi arama, mbiɗeˀvra li mislikiɗa jiɗngwil.. 14Naɓa i hin ngi juwa vu vur muguzlum ngi Pak, hirak ngrˀavu wuzla papas. Pilat a ɓa Yudeheye: «Buy kumo n'ani!» 15Amma a zlaka a tilam mi, a ɓam: «Kiɗa vagay! Kiɗa vagay! Dira avu dum mizliraŋ!» Pilat a mbiɗa taŋ di: «Ɓa yi dira buy kum madiɗa avu dum sukwa?» Masay madiɗahay a mbiɗakaŋ di: «Buy ndra mekelem anta, sey buy mimadiɗa tewle!» 16Dar Pilat a vula taŋ Yesu ɓa a dirakaŋ avu dum mizlira so.

Taŋ midiraka Yesu avu dum mizliraŋ

(Yo pura Mat 27.32-44; Mark 15.21-32; Luk 23.26-43)

Dar a ram ti Yesu so. 17Yesu ti haŋ naŋ a zuɓa dum naŋ mizlira, a bi, a ndil di angi li mazilaka guduguzluŋ hirngaŋ «Golgota» ti mi Hebere. 18A dirakaŋ a diga waɗ mizli mekelemey cuw angi dum mizlirahay vuna ya, pal ti ka pal ti ka, Yesu naŋ a wuzla. 19Pilat a tuh gwat le avu dum misliprakka zleˀe, a ɓi a luwaka law a hirnga dum mizlira tuwa. A tohoko na: «Yesu mbur Nazaret, Buy madiɗa ngi Yudehey.» 20Yudehey haɗa a slufaka ɓimutoho nah le, vur li taŋ midiraka Yesu anga na, naŋ gweˀ avu walahay madiɗaŋ. Yo a tohoko ti mi Heber, ti mi Grek waɗ ti mi Lateŋ. 21Joˀ masay madiɗa ngi Yudehey a ɓaka Pilata: «Anja ki toho: ‹Buy madiɗa ngi Yudehey› ta, amma toho na: ‹Mbur hana a ɓi, yi Buy ngi Yudehey.›» 22Pilat a mbiɗa taŋ di: «Gwat ya mutoho le na, i toho le si.»

23A dirba sojehey mikiɗaka mi ngi dira Yesu avu dum mizlira na, a hilaka zana naŋhaya, a wunkaka taŋ taˀ taˀ mufaɗa, da mburo da mburo. Mindir i zana naŋ madiɗaŋ, tuf anta ava ta, i gabaga mijaka kifilih kine, zle a muŋ hã a ruwuy. 24Sojehey a ɓam ar wala taŋ: «I ngiraka zana madiɗa hana ta, zuwen kuɗukum caca, da masa zuma i waka na.» Ɓa gwat Ɓimutoho miɓa na a gi muduba, a ɓi:

«A wunkaka zana ɗuwoyo le ar wala taŋ,

yo a kiɗam caca le ti zana ɗu madiɗa.»

Gwat sojehey migam na, i nah so.

25Mumuŋ ngi Yesu, sukum ngi mumuŋ, Mariya ngwas ngi Klopas waɗ Mariya ngi Magdala, a roko dedeŋ gweˀ avu dum mizlira midiraka Yesu anga tuwa. 26Yesu mupura mumuŋ waɗ mbur ngi seˀe, naŋ mawuɗ haɗa tuwa deŋ acikeˀe na, a ɓa mumuŋ: «Ngwasa, mangal ɗik anihĩ.» 27Yo a ɓa mbur ngi seˀe tuwa kwana: «Munuk anihĩ.» Zle tapasa na, mbur ngi si Yesu tuwa, aru ti Mariya ngi hay naŋ.

Muc ngi Yesu

(Yo pura Mat 27.45-56; Mark 15.33-41; Luk 23.44-49)

28A dirba nah, Yesu a si na le, zle angi nah na, gwat gar a kiɗ mi le muduba. Ɓa Ɓimutoho a gi hã avu kiɗa mi naŋ muduba na, Yesu a ɓi: «Yam ara giy.» 29Kukulum ada akẽh zleˀe mbaf ti mbaazla mikwereke. A yupom gugumay angi mbaazla tuwa, a ngikaka avu dum, a tilakaŋ di ng'avi mi. 30Yesu mititila titileˀ si na, a ɓi: «Gwat gar a kiɗ mi le!» A ga hirnga gangal, a mucu.

Mbur soje mizliga Yesu ar cakay

31Tapasa, naɓa i hin ngi juwa vu vur hin ngi sabat. Yudehey anta a wuɗam vagay ngi mizli a ndiram ar dum mizlira tapas sabata ta, asi sabata, i hin madiɗa wãˀ. Vurˀe, a cufuɗaka Pilata ɓa a pula taŋ jiviɗ a ngila taŋ saraya, ɓa a pam taŋ sar avra. 32Dar sojehey a soko, a ngilaka sar ngi mizli midiraka taŋ ati Yesu tuwa, ngi mudumbuŋ ati ngi mucuw naŋ. 33Sojehey mindilam avu Yesu na, a puraka a muc le si, a ngilakaŋ saraya mata. 34Amma mbur soje pal a zligaŋ ar cakaya ti ziwit, pumbus lahaɗ ati yam a bo a haŋhaŋ si. 35Mbur mupur naŋ na, a ga sedewo nah le, yo sedewo naŋ kaslsla. Na zle, mbur nah a si na le, a ɓi di i ɓi mikaslsla gisiŋ, ɓa kumo kwana, ki tiɓam aya. 36Naŋ kine, gwat hana gar migi na, ɓa Ɓimutoho a gi mi muduba: «Anta sa ngilakaŋ tesle ko pal ta.» 37Ar li mekeleme, Ɓimutoho a ɓi ma: «A sa puraka mbur taŋ mizligakaŋ ti ziwite.»

Mikaka vagay ngi Yesu ar vigiɗi

(Yo pura Mat 27.57-61; Mark 15.42-47; Luk 23.50-56)

38A dirba gwat migi nah na, Zozef ngir walahay Arimate, a cufuɗa Pilata, ɓa a pulaŋ jiviɗ nga zuɓa vagay ngi Yesu. Zozef i mbur ngi si Yesu, amma anta bidas ta ɓula, vur a zluwun ti Yudeheye. Pilat a pulaŋ jiviɗe, joˀ Zozef ara zuɓa vagay ngi Yesu. 39Nikodem, mbur muru ada zleˀe nga pura Yesu ngi duvuɗ tuwa, a ndilawa ya. A so ti mukuturɓuy mir ati alowe lahaɗ lahaɗ, gwat ngi kilo kukur makir. 40Taŋ cuw taŋ a zuɓaka vagay ngi Yesu tuwa, a tuwuɗaka ti gabaga, a pakaŋ urdi tuwa kaɓa mezegwel ngi Yudehey magaka da vagay ngi mburo. 41Angi li taŋ midiraka Yesu avu dum na, jarne ada akẽh. Zivi nawaya ada angi jarne nah vuna, a kam vagay ngi mbur ɗaˀ ara t'aruŋ. 42A kaka vagay ngi Yesu ar zivi nah, asi naŋ gweˀ, yo i hin ngi juwa vu ngi sabat ngi Yudehey ma.

Tans Gekies:

Zaŋ 19: BEGDC

Kleurmerk

Deel

Kopieer