Zaŋ 10

Ɓi ngi mijigin ati tumuŋhoy

1«Gisiŋ gisiŋ, yi ɓukum na: mbur maci ng'ar gezleŋ ngi tumuŋhoy tir mi naŋ ta, amma matuwuɗ tir li mekelem pal na, i muhul, yo i mufuyovu. 2Amma mbur maci tir mi naŋ na, naŋ i mijigina tumuŋhoy. 3Mijigina gezleŋ, a wunaŋ mi naŋ, tumuŋhoy kwana, a cinaka ˀay naŋ. A zila tumuŋ naŋhaya purla purla gar ti slimiɗ taŋ ti slimiɗ taŋ, a bi taŋ ng'avra. 4Da a bi taŋ le gar ng'avra na, a ki ɓaˀ a mbuŋ, joˀ tumuŋhoy a sipakaŋ, asi a sinaka ˀay naŋ le. 5Amma tumuŋhoy a sipaka mbur mulaka ta ndiɗaˀ, a kilam di jak, vur a sinaka ˀay naŋ ta.»

6Yesu a slufa taŋ ɓi miweˀ ti wi misenna, amma a slaka wala ngi ɓi naŋ maɓa vuna ta.

Yesu i mijigin mezle

7Dar Yesu a ɓi ma: «Gisiŋ gisiŋ, yi ɓukum na: Yi mi ngi gezleŋ ngi tumuŋhoy. 8Mizli musoko dumbuŋ ar ya gar na, i muhuloy, yo i mufuyovuhoy, amma tumuŋhoy a cinaka taŋ mi ta. 9Yi mi ngi gezleŋ. Da mbur mici le tir ya na, a sa lihi. A sa bi, a sa mawa, a sa lum gwat ngi zumo ma kini. 10Muhulo, a so sey ngi hul, ngi sli ˀay ngi gwat, yo ngi hirya gwat tewle. Ya i so ɓa mizli a lumam siifa, ɓa a lumam haɗa hã fineˀ gidaŋ.

11Ya i mijigin mezleŋ. Mijigin mezle a vula hirnga naŋ vur tumuŋ naŋhay. 12Mbur majigin ngi luuma migir na, i mijigin migisiŋ gisiŋ ta, asi tumuŋhoy inga naŋhay ta. Da a pura le kiriɓuh ara so ng'ava na, a pula tumuŋhoyo, a kil. Joˀ kiriɓuh a ja taŋ, a zliɗa hirnga taŋ. 13A kil vur a jigin ngi luuma migir tewle, ɓi ngi tumuŋhoy a caŋ neˀ le ta. 14Ya i mijigin mezle, i si na tumuŋ ɗuwoyo le, yo tumuŋ ɗuwoy kwana, a sinikiy le. 15Baha a siniy le, yo ya kwana, i sinaŋ le ya, naŋ kine, yi vula hirnga ɗu vur tumuŋ ɗuwoy aya. 16Y'ada ti tumuŋ mekelemey ma, t'anta ar gezleŋ misenna ta. Taŋ kwana, sey yi so ti taŋ, a sa cinam ˀay ɗu, yo gezleŋ a sa tiri purla waɗ mijigin purla. 17Baha a wuɗiy, asi ya mavula siifa ɗu, ɓa i sa luuma a muŋ. 18Mbur maziziy hirnga gu anta, amma i ya mavula ti haŋ ɗu. Y'ada ti gidaŋ ngi vul naŋ, yo y'ada ti gidaŋ ɓa i luuma a muŋ. Ɓi Baha miɓiy di ɗaˀ le, ɓa yi ga na, i nah so.»

19Yudehey a wunkam ˀay ar wala taŋ asi mingiɓi hana ma. 20Mizli haɗa ar wala taŋ a ɓam: «Setene ada a hirnga! I mibirngaŋ! Ki cinaka mingiɓi naŋ vur mike?»

21Amma mekelemey a ɓam: «Mbur misi setene a hirnga a ɓi ɓi kahana ta. Setene a wuna hiri ngi dangara gu kwa?»

Yudehey a tiɓaka Yesu ta

22A Zeruzaleme, naɓa i kiya ngihimiɗi, ara gam muguzlum ngi vula hay ngi Bumbulvuŋ a muŋ#10.22 Muguzlun ngi vula hay ngi Bumbulvuŋ na, i muguzlum migaka a Zeruzalem ng'ar kiɗa mi ngi kiya desambre, ngi wulka ɗiya hay ngi Bumbulvuŋ hiri naŋ a muŋ, Antiyokus Epifan mihirya zleˀe, waɗ ngi vula li gi mikuli a mbuŋ Buymisemuŋ. Miga i Yudas Makabe, mbur Yude ar wala ngi vi skat ti kukur merkeɗ nga zlum malla skat ti kukur merkeɗ nga mufaɗ, naɓa a ya ka Yesu Kristu t'aruŋ . 23Yesu ara liˀi asi palak ngi Salomoŋ ar hay ngi Bumbulvuŋ vuna. 24Yudehey a gunom gun a hirnga naŋ, a ɓakaŋ: «Ki pula ndra ar li ngila mi hã ti vunaka? Da ki Mesi na, inga ɓa ndra di njah so.»

25Yesu a mbiɗa taŋ di: «Yi ɓukum di le zlezle si, amma kum anta tiɓaka ta. Gwat ya maga ti slimiɗ ngi Baha na, ara ga sedewo ngi hirnga ɗu. 26Amma kum anta tiɓikiy di ta, asi kum anta a wuzla tumuŋ ɗuwoyo ta. 27Tumuŋ ɗuwoy a cinam ˀay ɗu. Yi si na taŋ le, yo a sipikiy. 28Ya i vula taŋ siifa ngi sete, t'anta sa micam ta ndiɗaˀ. Yo mbur matiɓa taŋ gu tisi haŋ ɗu, anta. 29Baha muvuliy taŋ na, naŋ madiɗa fineˀ gwatay gar, yo ko mbur misi ti gidaŋ ngi tiɓa gwat tisi haŋ ngi Baha gu, anta. 30Ya ati Baha, ndra purla.»

31Yudehey a hilam ɗugur ma, ɓa a kuyupakaŋ. 32Dar Yesu a ɓa taŋ: «Yi bugukum slra mezlehey le haɗa, ya miga taŋ ti gidaŋ ngi Baha. Na, ki wuɗo kuyupikiy na, asi slra wana a wuzla taŋ ka?»

33Yudehey a mbiɗakaŋ di: «I wuɗam kuyup ɗike na, asi slra mezle ta, amma vur ka maza Buymisemuŋ na! Asi ka mbur ma na, ki ga vu ɗike ka Buymisemuŋ mbrike?»

34Yesu a mbiɗa taŋ di: «A tohoko ar Ɓimujuwa kumo na: ‹Yi ɓi: kum i Buymisemuŋhoy ta wal kwa?› 35Mizli Buymisemuŋ miɓa taŋ mingiɓi naŋ na, a zila taŋ buymisemuŋhoy. Na, mbur makiɗa Ɓimutoho avra gu, anta. 36Mbur Buymisemuŋ muwunaŋ, yo mislino di ng'ar duniya na, ki ɓakaŋ: ‹ki ra za Buymisemuŋ›, asi ya miɓi yi Mangal ngi Buymisemuŋ na. 37Da ya magi na, i slra ngi Baha ta na, kum ndiram manja ki tiɓaka ɓi ɗu! 38Amma da ya magi na, i nah na, ko da ki tiɓikiy ta tekeɗe kwana, tiɓaka gwat ngi gi ɗu na, kanah na, kisa puraka, yo kisa sinaka, Baha naŋ jom ati ya, kaɓa ya mujom ati naŋ na.»

39Dar a sipakaŋ ɓa a jakaŋ si ma, amma a lih tisi haŋ taŋ. 40Yesu a mi nga dubazaw Zurdeŋ, ar li Zaŋ mizla ci mizli ar yam na, a cifi a diga. 41Mizli haɗa a ram ng'avaŋ, a ɓam: «Ko Zaŋ a gi cekene loŋ ta, amma ɓi naŋ miɓa vur mbur hana gar na, naŋ kaslsla gisiŋ.»

42Dar mizli haɗa a tiɓakaŋ.

Tans Gekies:

Zaŋ 10: BEGDC

Kleurmerk

Deel

Kopieer