यहून्ना 18
18
ईसु कै पकड़बाओ जानो
(मत्ती 26:47–56; मरकुस 14:43–50; लूका 22:47–53)
1जब ईसु जे बात कैह चुको तौ बौ अपने चेलौ के संग छोटी खाई किदरौन के पार गओ जहाँ एक बगीचा हो, जिसमै ईसु और बाके चेला भीतर गए। 2धोके सै पकड़बानै बारो यहूदा बी बा जघै कै जानै हो, कैसेकै ईसु अपने चेलौ के संग बहाँ जाऐ करै हो। 3तब यहूदा, रोमी सैना के एक दल कै, और मुक्ख पुजारिऔं और फरीसिऔं की ओर सै सिपाईऔं कै लेकै बहाँ लालटैनौ, मसालौं और हतियारौं के संग आओ।
4तब ईसु उन सब बातौं कै जो बाके ऊपर आनै बारी हीं जानकै अग्गे बढ़ो और उनसै कैई, “तुम किसकै ढूंड़ौ हौ?”
5उनौनै जबाब दओ, “नासरत के ईसु कै।” बानै उनसै कैई, “बौ मैं हौं।” और यहूदा बी जो बाकै पकड़बानै बारो हो उनके संग खड़ो हो। 6जब बानै उनसै कैई, “मैं हौं” तौ बे पिच्छे हटे और जमीन मै गिर पड़े। 7तब उनसै फिर पूँछी, “तुम किसकै ढूंड़ौ हौ?” और उनौनै कैई, “नासरत के ईसु कै।”
8ईसु नै जबाब दओ, “मैं तुमकै कैह चुको कै मैं बौई हौं, इसताँई अगर तुम मैंकै ढूंड़ौ हौ तौ इनकै जान दो।” 9जिस्सै कै बौ बचन पूरो होए जो बानै कैओ हो, “जो तैनै मैंकै दए बामै सै मैंनै एक कै बी ना खोओ।”
10फिर समौन पतरस नै, जिसके धौंरे तरवार ही, अपनी तरवार लिकारी और बड़े पुजारी के नौकर को दाँय लंग को कान काट दओ, और बा नौकर को नाम मलखुस हो। 11#मत्ती 26:39; मरकु 14:36; लूका 22:42तब ईसु नै पतरस सै कैई, “तरवार मिआन मै रख! जो कटोरा अब्बा नै मैंकै दओ, का मैं बाकै ना पिऔं?”
12तब सिपाईऔं और उनके सूबेदार और यहूदिऔं के मन्दर के पैहरेदारौ नै ईसु कै पकड़कै बांध लओ, 13और पैले बाकै हन्नास के धौंरे ले गए, कैसेकै बौ बा साल के बड़े पुजारी कैफा को सुसर हो। 14#यहून 11:49,50बौ कैफा हो, जिसनै यहूदिऔं कै सला दई ही कै सब लोगौ के ताँई एक आदमी को मरनो अच्छो है।
पतरस के दुआरा ईसु को इनकार
(मत्ती 26:69,70; मरकुस 14:66–68; लूका 22:55–57)
15समौन पतरस और एक दूसरो चेला ईसु के पीछे चल पड़ो। जौ चेला बड़े पुजारी की जान पैचान को हो और बौ ईसु के संग बड़े पुजारी के दारे के भीतर बरो, 16पर पतरस बाहार मौहड़े मैई खड़ो रैहओ। और बौ दूसरो चेला जो बड़े पुजारी की जान पैचान को हो, बाहार लिकरो और चौकीदारनी सै कैई कै पतरस कै भीतर लिआ। 17तब नौकरानी नै जो चौकीदारनी ही, पतरस सै कैई, “कहीं तू बी बाके चेलौ मै सै तौ ना है?” बानै कैई, “मैं ना हौं।” 18बहाँ नौकर और मन्दर के सिपाई कौला की आग पजारकै खड़े होकै ताप रऐ हे कैसेकै ठंड ही और पतरस बी उनके संग खड़ो होकै आग ताप रओ हो।
बड़े पुजारी की ईसु सै पूँछताँछ
(मत्ती 26:59–66; मरकुस 14:55–64; लूका 22:66–71)
19फिर बड़े पुजारी नै ईसु सै बाके चेलौ और बाकी सिक्छा के बारे मै पूँछी। 20ईसु नै बाकै जबाब दओ, “मैंनै दुनिया सै खुल कै बात करी हैं। मैंनै हमेसा पिराथना घरौं और मन्दर मै जहाँ सब यहूदी इखट्टे होवै हैं सिक्छा दई है, और मैंनै कबी बी चुपके सै कुछ ना कैई है। 21तू मैंसै का पूँछै है? सुन्नै बारौ सै पूँछ कै मैंनै उनसै का कैई। देख, जे जानै हैं कै मैंनै का का कैई है।”
22जब ईसु नै जौ कैई, तौ धौंरे खड़े सिपाईऔं मै सै एक नै जौ कैते भए बाके चाँट मारो, “का तू बड़े पुजारी कै ऐंसे जबाब देवै है?”
23ईसु नै बाकै जबाब दओ, “अगर मैंनै कुछ बुरो कैई है तौ साबित कर और बता कै बामै बुरो का हो, और अगर ठीक कैई है तौ तू मैंकै काए मारै है?”
24तब हन्नास नै बाकै बड़े पुजारी कैफा के धौंरे बंधो भओई भेज दओ।
पतरस को ईसु कै पैचान्नै सै फिर इनकार
(मत्ती 26:71–75; मरकुस 14:69–72; लूका 22:58–62)
25जब समौन पतरस खड़ो होकै आग ताप रओ हो तब उनौनै बासै कैई, “कहीं तू बी तौ बाके चेलौ मै सै ना है?” बानै मनैह करी, “मैं ना हौं।” 26बड़े पुजारी के एक नौकर नै जो बा आदमी को रिस्तेदार हो जिसको पतरस नै कान काटो हो, पूँछी, “बता का मैंनै तेकै बाके संग बगीचा मै ना देखो हो?” 27तब पतरस नै एक दफै फिर मनैह कर दई। और तबई मुरगा बोल पड़ो।
ईसु कै पीलातुस के धौंरे लेजानो
(मत्ती 27:1,2,11–14; मरकुस 15:1–5; लूका 23:1–5)
28और बे ईसु कै कैफा के धौंरे सै पीलातुस के महल मै ले गए, जौ तड़केई को टैम हो, और बे खुद पीलातुस के महल ना गए, कै कहीं असुद्द ना हो जाँय#18:28 यहूदी लोग ऐंसे मानै हे कै बे किसी गैर यहूदी के घर जांगे तौ असुद्द हो जांगे कैसेकै पीलातुस गैर यहूदी हो।, जिस्सै फसै के तौहार की रोटी खा सकैं। 29तब पीलातुस बाहार लिकरकै आओ, और कैई, “तुम जा आदमी मै का इलजाम लगाबौ हौ?” 30उनौनै बाकै जबाब देते भए कैई, “अगर जौ आदमी दोसी ना होतो तौ हम जाकै तेरे धौंरे काए लाते?” 31इसताँई पीलातुस नै उनसै कैई, “तुमई जाकै ले जा कै अपने नियम के अनुसार जाको नियाय करौ।” यहूदिऔं नै बासै कैई, “हमकै किसी कै मौत की सजा दैनै को हक ना है।” 32#यहून 3:14; 12:32जौ इसताँई भओ, कै ईसु को बौ बचन पूरो हो, जो बानै जौ बताते भए कैई ही, कै बाकी मौत कैसे होगी।
33तब पीलातुस महल मै फिर बापस गओ और ईसु कै बुलाओ और बासै कैई, “का तू यहूदिऔं को राजा है?”
34ईसु नै जबाब दओ, “का तू जौ बात अपनी ओर सै कैरओ है, या औरौं नै मेरे बारे मै तेकै बताई?”
35पीलातुस नै जबाब दओ, “का मैं यहूदी हौं? तेरे लोगौ और मुक्ख पुजारिऔं नै तू मेरे हातौ मै दे दओ है। तैनै का करो है?”
36ईसु नै जबाब दओ, “मेरो राज जा दुनिया को ना है। अगर मेरो राज जा दुनिया को होतो तौ मेरी परजा मैंकै यहूदिऔं सै बचानै के ताँई लड़ाई करती। पर मेरो राज जा दुनिया को ना है।”
37इसताँई पीलातुस नै बासै कैई, “तौ का तू राजा है?” ईसु नै जबाब दओ, “तू ठीक कैबै है कै मैं राजा हौं। मैंनै इसताँई जलम लेओ और इसताँई दुनिया मै आओ हौं कै सच की गभाई दौं। हर एक बौ जो सच को है, मेरी अबाज सुनै है।”
38पीलातुस नै बासै कैई, “सच का है?” और जब जौ कैह चुको तौ बौ फिर यहूदिऔं के धौंरे बाहार गओ और उनसै कैई, “मैं बामै कोई दोस ना देखौ हौं।
(मत्ती 27:15–31; मरकुस 15:6–20; लूका 23:13–25)
39“पर तुमरो एक रिबाज है, कै फसै के तौहार के दिन मैं तुमरे ताँई एक कैदी कै छोड़ दौं, का तुम चाँहौ हौ कै मैं तुमरे ताँई यहूदिऔं के राजा कै छोड़ दौं?”
40तब उनौनै फिर चिल्लाकै कैई, “जा आदमी कै ना, पर बरअब्बा कै छोड़ दो।” और बरअब्बा एक दंगा फसाद कन्नै बारो आदमी हो।
Tans Gekies:
यहून्ना 18: TKB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
New Life Compute Institute [NLCI] - CC BY-NC-ND 4.0
