Эхин 11
11
Вавилооной самхаг
1Тэрэ үедэ дэлхэйн бүхы зон нэгэ түрэлхи хэлэтэй, нэгэн адляар хөөрэлдэдэг һэн. 2Олон зон зүүн зүгһөө нүүжэ, Шинаар ороной нюрууда ерэжэ һуурижаба.
3Тиигээд өөһэд хоорондоо тэдэ иигэжэ хөөрэлдэбэ:
– Һууринай барилга ябуулха хэрэгтэй. Шабараар хирпиисэнүүдые хээд, бүхэ шанартай байхынь тула тэдэнээ галда шатаая.
Тиигээд тэдэ барилгада шулуунай орондо хирпиисэ, хирпиисэнүүдые барисалдуулхын тула сагаан шохойн орондо дабирхай хэрэглэдэг болобо.
4Хоорондоо тэдэ дахин хэлсэбэ:
– Газар дэлхэйгээр таража бутархагүйн тула бидэ асари хүсэтэй, алдар солотой, һүр ехэтэй улас түрэ болохо ёһотойбди. Тиимэһээ тэнгэри тулама үндэр самхаг, бата найдамтай хэрэмтэй хото бария.
5Эзэн хүн түрэлтэнэй барижа байһан хото самхаг хоёрые харахаяа буужа, 6иимэ зарлиг буулгаба:
– Харыт, эдэ зон иишэ-тиишээ зөөжэ ябахын орондо нэгэ газарта обооржо, нэгэ хэлэтэй нэгэ арад болохоёо һэдэнэл. Иигэжэ суг хамта барилга эхилбэл, саашадаа тэдэ юушье хэжэ магад. 7Тиимэһээ бэе бэеэ ойлгохоо болиторнь хэлыень худхан холиё!
8Иигэжэ зон хотоёо барижа дүүргэнгүй, орон дайдаар зайгуултаба.
9Тэрэ хотын зоной нэгэн хэлые бэе бэеэ ойлгохоёо болиторнь Эзэнэй худхаһан ушарһаа хото «худхаха» гэһэн удхатай, еврей хэлээр «Вавилоон» гэдэг нэрэтэй болоһон байна. Тэндэһээ Эзэн зониие бүхы түби дэлхэйгээр тараан сасаа.
Абраһаамай урда үенүүд
10Шээмэй угай бэшэг эндэһээ эхилнэ.
Үерэй һүүлээр хоёр жэл үнгэрөөд байхада, Шээм зуу наһатайдаа Арпахшаад гэжэ хүбүүтэй болобо. 11Арпахшаадай гараһанай һүүлээр хэдэн хүбүүд, басагадтай болоод, Шээм үшөө табан зуун жэл ажаһуугаад, наһа бараа бэлэй.
12Арпахшаад гушан табатай байхадаа, Шээлах гэжэ хүбүүтэй болобо. 13Шээлахэй түрэһэнэй һүүлээр Арпахшаад үшөө дүрбэн зуун гурбан жэл ажаһуугаад, хэдэн хүбүүд, басагадтай болоод, гээгдэбэ.
14Шээлах гушатай байхадаа, Ээбэр гэжэ хүбүүтэй болобо. 15Ээбэрэй түрэһэнэй һүүлээр Шээлах үшөө хэдэн хүүгэдтэй болоод, дүрбэн зуун гурбан жэл ажаһууһанай удаа наһа бараа һэн.
16Ээбэр гушан дүрбэтэй байхадаа, Пээлэг гэжэ нэрэтэй хүбүүтэй болобо. 17Ээбэр энээнһээ гадна хэдэн хүүгэдтэй болоод, Пээлэгэй түрэһэнэй һүүлээр үшөө дүрбэн зуун гушан жэл ажаһуугаад, наһа бараа бэлэй.
18Пээлэг гуша наһатай байхадаа, Рэһүү гэжэ хүбүүтэй болобо. 19Энээнэй һүүлээр тэрэ хоёр зуун юһэн жэл ажаһуугаад, хэдэн хүүгэдтэй болоод, гээгдэбэ.
20Рэһүү гушан хоёртойдоо Сэрүүг гэжэ хүбүүтэй болобо. 21Сэрүүг хүбүүнэй түрэһэнэй хойно Рэһүү хоёр зуун долоон жэл ажаһуужа, хэдэн хүбүүд, басагадтай болоод, наһа бараа һэн.
22Сэрүүг гушатай байхадаа, Нахоор гэжэ хүбүүтэй болобо. 23Энээнэй удаа Сэрүүг үшөө хэдэн хүбүүд, басагадтай болоод, үшөө хоёр зуун жэл ажаһуугаад, гээгдээ бэлэй.
24Нахоор хорин юһэтэй байхадаа, Тээраа гэжэ хүбүүтэй болобо. 25Тэрэ сагһаа хойшо Нахоор зуун арба юһэн жэл ажаһуугаад, үшөө хэдэн хүбүүд, басагадтай болоод, нүгшэбэ.
26Тээраа далатай байхадаа, Абрам, Нахоор ба Һараан гэдэг гурбан хүбүүтэй болобо.
27-28Энэ болбол Тээраагай угай бэшэг юм. Абрам, Нахоор, Һараан гэгшэд Тээраагай гурбан хүбүүд болоно. Һараан Лоот гэдэг хүбүүтэй байгаа. Тээраа эсэгынгээ үшөө амиды байхада Һараан тоонто нютагтаа – халдейн Үүртэ наһа бараа бэлэй.
29Абрам ба Нахоор һамга абабад. Абрам Сара гэжэ нэрэтэй басагые, Нахоор Һараанай басаган Милкаае һамга абаба. Һараан хадаа Милкаа ба Искаа гэдэг басагадтай байгаа.
30Сара үхибүү түрэдэггүй, хээлитэй боложо шададаггүй һэн.
31Тээраа Абрам хүбүүгээ, аша хүбүүгээ – Һараанай Лоот гэжэ хүбүүе, бэриеэ – Абрамай һамган Сарые абаад, Ханаһаан орон руу нүүжэ ошохоёо халдейн Үүр хотоһоо гараба. Гэбэшье тэдэнэр замдаа тогтожо, Месопотамиин Харраан хото хүрөөд, тэндээ байрлаа һэн. 32Тээраа тэндэ ажаһуужа, хоёр зуун табан наһатайдаа нүгшэһэн юм.
Tans Gekies:
Эхин 11: BurBBL2024
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
