मर्कुस 11
11
यरुसलेमै येसुलाइ राजाक् स्वागत कर्ल
(मत्ति २१:१-११; लुका १९:२९-३८; यहुन्ना १२:१२-१५)
1येसु आउँ ओक्राक् चेलालक् जाइलटाकै यरुसलेमक् लज्जिकै रैल्ह जैतुन डाँराइ पुग्लुहुन्। ओछि बेथफागे आउँ बेथानिया बाज्ल गाउँ रैल्हकुन्। तसौ येसुइ आफ्निक् चेलालकमध्येमा दुइजेनालाइ यन्हिं बाजिहिन् पाठालाहा, 2“तोहोराखर्ह्वा ओट्टे ओर्साकक् गाँओइ जाहा, उ गाँओइ पोस्लोटाकै कख्नुहुँ कुन्हुँ मानुसे नहिंचर्ल्ह एक्टा गाडाहाक् बाच्छा तोहोराखर्ह्वाइ भेंटाहोला। ओक्रालाइ फोकाइबानाइ यछि लेहिन् आन्बेहेरा। 3ओछि कुन्-कुने तोहोरानि ‘यक्रालाइ किसा फोकाहोला?’ बाजिहिन् सोर्हिबुनेमा, ‘पर्भुलाइ यि चाइल्ह रहेक्ला, आउँ ओहिं तुरुन्ते फर्काइदेहेर्ला’ बाजिहिन् बोल्बेहेरा।”
4तसौ उखर्ह्वा जाइलुहुन्, आउँ उ गाडाहाक् बाच्छा एक्टा घरक् बाहारक् खौलाइ दिहाँरक् आगारि बार्हिहिन् धर्ल भेंटालुहुन्, आउँ ओक्रालाइ फोक्लाबा ठाल्लुहुन्। 5उ ठाँओइ ठड्ध्याहिन् रैल्ह कुन्हुँ-कुन्हुँ मानुसलके उखर्ह्वानि सोर्ल्हाहा, “यि गाडाहाक् बाच्छा तोहोराखर्ह्वाइ किसा फोकाबा ठाल्ल हाँ?”
6येसुइ बोल्बा लागालहिक् परौ उखर्ह्वाइ बाज्लुहुन्, तसौ मानुसलके उखर्ह्वालाइ उ गाडाहाक् बाच्छा लेगाबा देलाहा। 7उखर्ह्वाइ उ गाडाहाक् बाच्छालाइ येसुक्ठालाइ आन्लुहुन्, आउँ आफ्निक् लुगालक् ओक्राक् उप्रै बिछ्यालुहुन्। तसौ येसु ओक्राक् उप्रै चर्ल्हक्। 8थुप्रोय मानुसलके आफ्निक्-आफ्निक् होर्लो पछौरिलक् पैंदाइ बिछ्यालुहुन्, आउँ ओर्कोलकुहु वरिपोरि रैल्ह गाछक् सेउलालक् काटिबानाइ पैंदाइ बिछ्यालुहुन्। 9तसौ येसुक् आगारि-आगारि हिंठ्लाहार आउँ पाछु-पाछु आइलाहारलके यन्हिं बाजिहिन् जइ-जइकार कर्बा ठाल्लुहुन्, “परमेस्वरक् जइ-जइकार भेउस्! परमपर्भुक् नाँओइ आइलाहार धन्य हो!#भजनसङ्ग्रह ११८:२५-२६ 10हाम्रा पुर्खा दाउदक् आबा ठाल्ल राज्जे आसिसित भेउस्। जम्माहिंसौ उप्रै स्वर्गोइ बस्लाहार परमेस्वरक् जइ-जइकार भेउस्!”
11येसु यरुसलेम पुग्नेसौ मन्दिरक् अङ्नाइ पोस्लक्। ओहिं मन्दिरक् भिट्रै रैल्ह सेप्थोक् दिठालक्। तर अबेला भेलसैर्हे ओहिं आफ्निक् बार्हजेना चेलालकलाइ सङ्हिं लेइबानाइ बेथानिया गाँओइ फर्किहिन् जाइलक्।
येसुइ फोर नहिंभेल नेभाराक् गाछलाइ साराप देल
(मत्ति २१:१८-१९)
12ओर्को दिन उखर्ह्वा बेथानियाक्भटे यरुसलेम जाइतिहि कर्लटाकै येसुलाइ भुख लाग्लकुन्। 13तसौ येसुइ टार्होहिक्भटे एक्टा झ्याम्म पोर्लो नेभाराक् गाछ देखिबानाइ ओछि फोर फोर्लो रहेला ना बाजिहिन् जाइलक्। तर उ गाछै पाताइसौ उप्रान्त किच्छु नहिंभेंटालक्, किसाबुने उ बेलाइ नेभाराक् फोर फोर्बाक् समइ नहिं रैल्हकुन्। 14तसौ येसुइ उ गाछलाइ बोल्लोकुन्, “अखसौ ओसाक् कुन्हुँहि तोराभटे फोर खाबा बुन् पाउस्।”
यि कहिन् बाज्ल ओक्राक् चेलालके सुन्लुहुन्।
मन्दिरक् अङ्नाक्भटे किनबेच कर्लाहारलकलाइ निस्कालाहा
(मत्ति २१:१२-१७; लुका १९:४५-४८; यहुन्ना २:१३-२२)
15येसु आफ्निक् चेलालकक्सङ्हिं यरुसलेम पुग्नेसौ उ मन्दिरक् अङ्नाइ पोस्लक्। ओहिं ओछि किनबेच कर्लाहार जम्मा मानुसलकलाइ निस्कालाहा, पैसा साट्लाहारलकक् टेबुल आउँ पर्वा बेंच्लाहारलकक् बस्बाक् ठाउँलक् जम्मा पल्टाइदेलाहा। 16तसौ येसुइ कुन्हुँहिलाइ किच्छुय थोक् मन्दिरक्भटे लेहिन् जाबा नहिंदेलाहा। 17ओहिं उखर्ह्वालाइ सिच्छा देइतिहि यन्हिं बोल्लाहा, “किस् यरङ् लेख्ल रहेला बोइने ते, ‘मोरा घर सेब्भ्रोउ जातलकक् लागि पाराथ्नाक् घर भेला।’ तर तोहोराखर्ह्वाइ ता यक्रालाइ डाँकुलकक् ओडार बानाल धरहला।”#यसैया ५६:७; यर्मिया ७:११
18तसौ उ कहिन् बर्के-पुझरि आउँ धर्म-गुरुलके सुन्नेसौ उखर्ह्वाइ येसुलाइ कहने मार्बा बाजिहिन् जुक्ति खोज्बा ठाल्लुहुन्। तर येसुक् सिच्छा सुन्लाहार जम्मा मानुसलक् छक्क पोरिबानाइ उखर्ह्वा ओक्राक्सङ्हिं डराथ्।
19बियार पोर्नेसौ येसु आफ्निक् चेलालकक्सङ्हिं यरुसलेम सहरक्भटे बाहार निस्किबानाइ जाइलक्।
बिस्वासक् सक्तिक् बिसइमा सिच्छा
(मत्ति २१:२०-२२)
20ओर्को दिन बिहानिहि पैल्हा आइल पैंदाय भेहिन् जाइलटाकै उखर्ह्वाइ उ नेभाराक् गाछ जरिहिसौ सुखिहिन् सक्ल देख्लुहुन्। 21तसौ पत्रुसे आगारर्कोक् कहिन् सम्झिबानाइ येसुलाइ बोल्लोकुन्, “अ गुरु, दिठाउ ता! तुँइ साराप देल नेभाराक् गाछ ता सुख्ल।”
22येसुइ उखर्ह्वानि बोल्लाहा, “परमेस्वरक् उप्रै बिस्वास करह। 23साँच्चिय मुँइ तोहोराखर्ह्वालाइ बोल्मेहेंर्ला, यदि कुन्हुँइ आफ्निक् मनै सङ्खा नाकरै आउँ आफ्नि बाज्ल कहिन् पुरा भेला बाजिहिन् बिस्वास करिहिन् यि डाँरालाइ ‘यछिसौ हटिबानाइ समुन्रै खस्’ बाजिबुने ओक्राक् लागि ओहोरङे भेक्ला।#मत्ति १७:२०; १ कोरिन्थि १३:२ 24उहेसिहिरे मुँइ तोहोराखर्ह्वालाइ बोल्मेहेंर्ला, तोहोराखर्ह्वाइ पाराथ्ना कर्लटाकै जेहे माङ्हला, मुँइ पाहिन् सक्ल धरम्ना बाजिहिन् बिस्वास करह, आउँ उ तोहोराखर्ह्वाइ पाहोला। 25जख्नि तोहोराखर्ह्वा पाराथ्ना करहला, कुन्हुँक् बिरोधै रिस रहेर्ला भेनेमा पैल्हा उखर्ह्वानि छेमा देहो। तसौ स्वर्गोइ रैल्ह तोहोराखर्ह्वाक् परमेस्वर पिताइ तोहोराखर्ह्वाक् पाप छेमा करिदेहेर्ला।#मत्ति ६:१४-१५ 26[तर तोहोराखर्ह्वाइ ओर्कोलाइ छेमा नहिंकरिगलेहे बुनेमा स्वर्गोइ बस्लाहार तोहोराखर्ह्वाक् परमेस्वर पिताइ तोहोराखर्ह्वाक् पापलक् छेमा नाकरिदेहार।”]
येसुक् अधिकारक् उप्रै पर्स्न
(मत्ति २१:२३-२७; लुका २०:१-८)
27येसु आफ्निक् चेलालकक्सङ्हिं फेरि यरुसलेमै फर्किहिन् आइलक्। ओछि येसु मन्दिरक् अङ्नाइ यर्साक्-ओर्साक् हिंठ्लटाकै बर्के-पुझरिलक्, धर्म-गुरुलक् आउँ अगुवालक् ओक्रानि भेंटाबा आइलिहिंक्। 28आउँ उखर्ह्वाइ येसुलाइ यन्हिं बाजिहिन् सोर्ल्होकुन्, “तुँइ कुनाहाँक् अधिकारे यि कामलक् करस्ला? यरङ् कामलक् कर्बाक् तोरानि कुने अधिकार देवास्?”
29येसुइ जुबाप देलाहा, “मुँइ तोहोराखर्ह्वालाइ एक्टा पर्स्न सोर्मेहेंर्ला, आउँ तोहोराखर्ह्वाइ ओक्राक् जुबाप देहो, तसौ मुँइ यि काम कुनाहाँक् अधिकारक्भटे कर्ल बाजिहिन् मुँइ तोहोराखर्ह्वालाइ जानामेहेंर्ला। 30लु बाजह, यहुन्नाइ बप्तिस्मा देबाक् अधिकार स्वर्गोक्भटे पाइल ना मानुसक्भटे?”
31यि कहिन् सुनिबानाइ उखर्ह्वा एक्टाइ ओर्कोक्सङ्हिं यन्हिं बाज्बा ठाल्लुहुन्, “असौ हामि किवा बाज्बा भेका, ‘स्वर्गोक्भटे’ बाजौबुने ‘तोहोराखर्ह्वाइ किसा यहुन्नालाइ बिस्वास नहिंकर्लेहेक्ते?’ बाजिहिन् ओहिं सोर्हिहालैस्। 32‘मानुसक्भटे’ बाजौबुने, कहने बाज्बा” बाजिहिन् उखर्ह्वा मानुसलकक्सङ्हिं डराल रैल्हुहुन्, किसाबुने जम्माहिं यहुन्नालाइ साँच्चिहिंकक् अगमबक्ताय बाजिहिन् ठान्हथ्। 33उहेसिहिरे उखर्ह्वाइ येसुलाइ जुबाप देलुहुन्, “हाम्रानि ता थाहा बोइनें।”
तसौ येसुइ उखर्ह्वानि बोल्लाहा, “ओरोङ् भेनेमा मुँइ आको कुनाहाँक् अधिकारक्भटे यि काम कर्बा ठाल्ल धरम्ना, मुँहु तोहोराखर्ह्वालाइ नाबोल्मेहार।”
Tans Gekies:
मर्कुस 11: DEWZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Mother Tongue Translators Society and Wycliffe Bible Translators, Inc. All rights reserved.
