SEEMTIRNAK 6
6
Minung Sualnak
1Leilung pumpuluk ah milai cu an karhzai vivo ih fanu tampi tla an hring. 2Cutikah Pathian ih fapa pawl in acuih fala pawl an mawizia an hmuh tikah an duhmi an hril ih an ṭhit. 3Cutikah Bawipa in, “Milai hnenah ka thlarau cu kumkhua cun ka umter lo pei, ziangahtile taksa neimi an si. Atu thok ihsin kum za le kum kul hnakih tam an nung lo pei,” ti ah a ti. 4A cuih san le cuih hnu san hmanah Pathian ih fapa pawl le milai ih fanu pawl an pawl-aw ih an hrinmi faale pawl cu mikei vekih a tum zetzetmi an si. Anmah tla cu khuahlan san ih mi hminthang le mi ralṭhazet pawl an si.
5Pathian cun leilung par milai hmuahhmuah cu an ṭha lozet ih an thinlung ah ruahnak siava lawnglawng a khat ti kha a hmuh tikah, 6leilung parih milai a tuah cu a sir-aw sal ih a riah a siazet. 7Cuhrangah, “Ka tuah ciami milai pohpoh, khuitawkih an um khalle ka siat thluh ding. Ramsa hmuahhmuah le vate hmuahhmuah khal, a bokvakmi tiangin ka siat thluh ding, ka rak tuah cu ka sir-aw a si,” ti ah a ti. 8Sikhalsehla Noah parah cun Bawipa cu a lung a awi.
9-10Noah ih faale pawl cu hi pawl hi an si: fapa pathum a nei ih Shem, Ham le Jafet an si. Noah cu mi ṭhazet a si ih acuih san ahcun amah pakhat lawnglawng Pathian ih lungkimmi a si. Pathian thawn a umtlangmi a si. 11Sikhalsehla midang hmuahhmuah cu Pathian ih mithmai ah an siavazet ih an siatnak cu khuazakip ah a zai vivo. 12Cun Pathian in leilung cu ṭha lozet in a hmu, ziangahtile mi hmuahhmuah ṭhatlonak in an khat.
Noah In Tangphawlawng A Tuah
13Cun Pathian in Noah hnenah, “Milai cu leilung par ihsin cemter dingah ka ruat zo a si. Ka siatsuah thluh ding, ziangahtile leilung hi an sualtuahnak in a khat. 14Nangmah ih hrangah saipras thing ṭha phun in tangphawlawng tuah aw. A sungah khaan tampi tuah awla, a sunglam le a lenglam hmuahhmuah ah farthling hnih aw. 15A cuih lawng cu pi zali sawmnga sau, pi sawmsarih pi nga kau, pi sawmli pi nga saangin tuah aw. 16A khuh tuah awla a khuh le a phar karlak kha zung hleiriat zuah aw. Cun dot thum in tuah awla a siir-ah sangka tuah aw. 17Leilung parah tilik ka thlenter ding ih a nungmi hmuahhmuah a siatsuah thluh ding. Leilung parih a nungmi hmuahhmuah an thi ṭheh ding. 18Sikhalsehla nangmah thawn thukamnak ka tuah ding. Na nupi le na fapa pawl le an nupi pawl thawn lawng sungah nan lut ding. 19An nun venak dingah ramsa tinkim in a nu le a pa, khuahkhat fingfing, lawng sungah na khum pei. 20Vate phun tinkim sungin pahnih ciar, ramsa sungin a tum siseh a fate siseh pahnih ciar, an nun suaknak dingah lawng sungah na luhpi pei. 21Ei ṭha tirawl phunkim na khawl pei ih, nanmah le an hrangah na ret pei. Himi cu lawng sungih nan ei dingmi a si,” ti ah a ti. 22Pathian ih thupekmi vek cekci in Noah cun a tuah ṭheh.
Tans Gekies:
SEEMTIRNAK 6: FCL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Falam Bible Revision © Bible Society of Myanmar, 2002.
