SEEMTIRNAK 11
11
Babel Lungdawl
1Hlanah cun leilung tlun mi hmuahhmuah in ṭong phunkhat lawng an nei ih ṭongfang bangrep an hmang. 2Nisuahnak lamah an vai ih Babilonia nelrawn an thleng ih cutawkah khua an to. 3Cutikah, “Rahnik uh, phahlei tuah in meisa ah rawh uhsi,” ti ah pakhat le pakhat an ti-aw. Cutiin inn saknak ah tlakrawh an nei ih a erhnak ah ṭhung an tuah. 4Cuṭheh in, “Ra uh; Kan hrangah khawpi kan tuah pei ih van dai in lungdawl kan tuah pei. Kanmah ih hrangah hmin nei ve seh; cule leilung khuazakip ah darhdai loin kan um ding a si,” ti ah an ti-aw.
5Cutikah milai ih an tuahmi khawpi le lungdawl zoh dingah Bawipa cu a rung ih, 6“Zohhnik uh, hi pawl hi an zatein miphun phunkhat an si ih ṭong pakhat an hmang. An tuahmi hi thil tuah an tummi a hramthawhnak lawng a si lai. A rei hlanah tuah an duhmi hmuahhmuah an tuahsuak thei ding. 7Curuangah kan vung feh pei ih pakhat le pakhat an aan ciing-aw lo dingin an ṭong kan cokrawi thluh pei,” ti ah a ti. 8Cutiin Bawipa in milai pawl cu leilung khuazakip ah a ṭhekdarh thluh ih khawpi cu an sak ṭheh suak lo. 9A cuih khawpi cu Babel#11.9 Babel: ti cu Babilon tican a si ih Hebru ṭong in balal an ti ih cokrawi ṭheh ti thawn a aw suah a bang aw. ti ah an ti, ziangahtile cutawkah milai ih ṭong cu Bawipa in a cokrawi sak thluh ih, leilung tlun khuazakip ah a ṭhekdarh thluh hai a si.
Shem Ih Tesinfa Pawl
10Shem ih tesinfa cu a hnuailam pawl hi an si. Tilik a tlun hnu kum hnih ah, Shem cu kum zakhat a ti ih, fapa pakhat Arpakshad a nei. 11Cuih hnuah kum zanga a nung ih fapa dang le fanu dang khal a nei.
12Arpakshad cu kum sawmthum le kum nga a si tikah fapa Shelah a nei. 13Cuih hnuah kum zali le kum thum a nung ih fapa dang le fanu dang tla a nei.
14Shelah cu kum sawmthum a kim tikah fapa Eber a nei. 15Cuih hnuah kum zali le kum thum a nung ih fapa dang le fanu dang tla a nei.
16Cun Eber cu kum sawmthum le kum li a si tikah fapa Peleg a nei. 17Cuih hnuah kum zali le sawmthum a nung ih fapa dang le fanu dang tla a nei.
18Peleg cu kum sawmthum a si tikah fapa Reu a nei. 19Cuih hnuah kum zahnih le kum kua a nung ih fapa dang le fanu dang tla a nei.
20Reu cu kum sawmthum le kum hnih a si tikah fapa Serug a nei 21Cuih hnuah kum zahnih le kum sarih a nung ih fapa dang le fanu dang tla a nei.
22Serug cu kum sawmthum a si tikah fapa Nahor a nei. 23Cuih hnuah kum zahnih a nung ih fapa dang le fanu dang tla a nei.
24Nahor cu kum kul hluankua a si tikah fapa Terah a nei. 25Cuih hnuah kum za le hleikua a nung ih fapa dang le fanu dang tla a nei.
26Cule Terah cu kum sawmsarih a si tikah fapa pathum Abram, Nahor le Haran a nei hai.
Terah Ih Tesinfa Pawl
27Terah ih tesinfa pawl cu Abram, Nahor le Haran an si. Haran cu Lot ih pa a si. 28Haran cu a pa Terah a nun laiah Khaldea ram, a suahnak Ur khua ah a thi. 29Cun Abram in Sarai a ṭhit ih Nahor in Haran ih fanu Milkah a ṭhit. Haran cu Iskah ih pa khal a si. 30Sarai cu faate a nei lo, ziangahtile nucing a si.
31Cule Terah cun a fapa Abram le a fasuan, Haran ih fa, Lot le Abram ih nupi Sarai cu a lak hai ih Kanaan ram feh dingah Khaldea ram Ur khua cun a pok. Asinain Haran khua tiang an feh ih cutawkah cun umhmun an khuar. 32Terah cu kum zahnih le kum nga a si tikah Haran khua ahcun a thita.
Tans Gekies:
SEEMTIRNAK 11: FCL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Falam Bible Revision © Bible Society of Myanmar, 2002.
