Kejadian 7
7
1Nuh birye apil dopra ulamuka ani, aminyan talak ara, Allah el si Yahweh arye, nyabuk. “Winira akunuma. An ap, an mapu silip nirya ap, anggun nirya adopmalum mek lia yo aik wekelbilulume. Wini talak ulamak ninye nirya kum bukni, an tonok ara dipdekisiba, diksukumnye ulyama ati, anyaik weklyame. 2Anyaik wekminye talak ara, narye, “Aning ara, telebe,” nyapkise ning, tuku deice balamle kam ulye ning tekbarye nukuka kil ap, yim ap kibuka bulupnulyame. Tonda narye, “Aning ara, malye ning,” nyapkise ning, tuku deice balamlarye kam ulamle ning yala nirya ara, bitinye-bitinye kibuka kil ap, yim ap bulupnulyame.
3Tonda maka ayala-yala nirya ara, yim ap, kil ap, bitinye-bitinye kibuka, tekbarye (pasang) nukuka bulupnulyame. Aning nirya ara, ‘Aminyan talak tukwak mutuku noutam kam unamak’ tenen, amek lia yo deice domlum aik pum tam dongopnalyame. 4Winipminyopura, asum arye, nukuka tek sum akunum uplyopura, narye nyapdeipniba, weik mok cepnamle. Pia weika arye, celamliba, mok celamlye ani, keting noutam ap, lukunyan ap, yupa weik, 40 sum deice arye, akunum ceplyopura, weik mekwen deipliba, narye kwepdeiamse kam ulye ning, ayala-yala nirya dipliba, pia kum upnamle. Tukwak mutuku ara, mutuku diamuk upnamle,” Allah arye, nyabuk. 5Allah el si Yahweh arye nyabuk touk, Nuh bira, aninguk winibuk.
6Allah arye, nyapdeibukba, tukwak mutuku deice weik mekwen dopkwetebuk talak ara, Nuh bira el keting tamun yupa weik, 600 tahun akunum ulamuk. 7Nuh ap, el kil ap, elce deiamuk mapu ap, sikce domik kilapu ap, ‘Weik mekwen dipsilyak’ tenen, Nuh birye dobuk mek lia yo aik pum tam wekelbiyik. 8Allah arye, Nuh biti, “Winipnamake, winipnamake,” nyapdeibuk touk, atalak ara, tukwak mutuku deice yanibuka balamik ning ap, maka ap, aning-aning ayala-yala nirya ara, Nuh damuk yayik.
9Yayikce, Allah arye nyabuk touk, yim ap, kil ap kibuka amek lia yo dobuk aik pum tam wekelbiyik. 10Wekelbiyikura, Allah arye nyabuk touk, like tekbarye akunum ubukba, aweik mekwen deiyok koubuka deipnin welebuk.
11Atalak ara, Nuh el keting tamun yupa weik, 600 tahun akunum ubuk talak, tonda wala bitinye ning noutamak tujuhbelas (17) hari ubuk sum arye, deiyok koubuk. Asum dem aryuk laut mekwen pum tam ara, weik mek pu dobuka panabuka welebuk. Tonda, im noutamak danirye pia weik mok celamuk. 12Deiyok koubukce, yupa weik keting noutam ap, lukunyan ap ara, yupa weik, 40 sum deice arye, mok pia celamuk.
13Asum dem aryuk, Nuh ap, el mapu ap winilye, Sem ap, Ham ap, Yapet ap ara, Nuh el kil ap, tonda el mapu arye domik kilapu ap, adiparyuk amek lia yo deice dobuk aik pum tam wekik. 14Nuh ap, el mapu silip ap, mek lia yo aik wekik talak ara, sik ap, talye bai tam kam ulye ning ayala-yala nirya ap, ninye arye weinyak ning ayala-yala nirya ap, tukwak deice yanibuka balamle ning ayala-yala nirya ap, maka ayala-yala nirya ap, neika wekik.
15Yata ning do nirya, isin uplirye, tukwak mutuku kam ulye ning nirya ara, bitinye-bitinye kibuka, Nuh dam yanganmekce, weik mek lia yo deice domuk aik pum wekik. 16Allah el si Yahweh arye, Nuh biti, “Winipnulyame,” nyabuk touk, akam ulye ning nirya ara, yim ap, kil ap bitinye kibuka wekik. Nirya akunum wekikopura, Allah arye amek lia yo deice domuk aik bublan tirikdongobuk.
17Asum arye, deiyok koubuk sum yupa weik 40 sum deice arye, mok cena ap, mek pu dobuka bana ap, pia ulamukba, mekwen ara, weik deibuka ereipnin yangalamuk. Mekwen weik arye, deipnin yanganmoka ani, amek lia yo deice domuk aik erepdakuka, tukwak deice bukni, mekwen deice erebuka bukmok. 18Amekwen tuba-tuba pia deipnin yanganmoka ani, amek lia yo ereb welepnin banmokce, mekwen deiceuk bolkekenmok.
19-20Mekwen pia weika arye, deibuka welebukba, yata tukwak tam, mutuku dup do nirya, im noutamak amu tam mutuku dup-dupak nirya signipdongobukba, mekwen pum bisikuk kibuk. Weik mutuku dup deice tam babye, mekwen deibisibukba, tekbarye meter kibuk. 21Ubukopura, tukwak mutuku im sirya, mutuku sirya nirya uamuk kam un ning nirya, mekwen arye dibukba, nirya dibuk. Ara, maka ap, ninye weilamik ning ap, bai tam talye ulamuk ning ap, tukwak yanibuka balamuk ning ap, ayala-ayala nirya dibik. Ninye tukwak ninye nirya babye dibik.
22Tukwak mutuku im sirya, mutuku sirya nirya, isin uamuk ning kam ulamuk ning nirya dibuk. 23Tukwak mutuku im sirya, mutuku sirya nirya, kam ulamuk ning nirya, pia kum dayuk. Tukwak ninye ap, tuku deice yanibuka balamuk ning ayala-ayala nirya ap, im deice lakuka balamik mek ayala-ayala nirya ap, aning nirya kum ubuk. Nuh ap, el mapu silip ap, sik ap mek lia yo deice domuk aik pum bisik wekik ninguk ara, kam unmek. Yuk ning ton tonok babye, pia kume. 24Weik mekwen akunum deibukopura, tukwak mutuku im sirya, mutuku sirya nirya signipdongobukce, like yupa weik, 150 sum deice arye, uwamuk.
Tans Gekies:
Kejadian 7: EIPA
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2023, Wycliffe Bible Translators, Inc. All rights reserved.
