Matyiu 10
10
1O Mâ‐a bekidi ndiyango jomu jaju ja beyokwedi na beyokwedi bebale, a věki bâ ngudi e vengěkidě malina mabe, na e yongakě mehiyo meěhěpi, na bebědi beěhěpi.
2Ndi mina ma jomu ja metodu na metodu mebale ndi ekama; ua bohoboho ndi Saimân, a tubakwě na Pitě, na mwana nyangwě Andru; Jems ja Zěbadi, na mwana nyangwě Jân; 3Filip, na Bartholomi; Tomas, na Matyiu ma uyoli pago; Jems ja Alfios, na Lěbios, a diyaki tepě na dina ’pâkwě na Tadios; 4Saimân ya Kenan, na Judas Iskariot, e kândâkiyi Mâ.
5Ba jomu na babale ekaba ndi ba Jisus ba lomakidi, ka Mâ‐a vâ na bâ, na, O kěkeni o njiya ya Betomba, n‘ inyěni o pâkeni o mamboka ma ba Sameria; 6ndi kěkěngěni o medâmbě mea nyangango mea ndabo ya Israěl me jadi. 7Ndi inyěni o kěkěni, o ka kalakiyani, na, Ipangiya ja Hěvěn ja bě ndi o mata. 8Yongakěni mebědi, tanakěni begâlani, pumbwakiděni bekengo, věngěkiděni děvil; o ndini pahiyango bověkwě, věke tepěni bověkě. 9O kenjakeni hika ya veyiveyi tombe na etano, tombe nyěnyě, o belandi beanyu; 10tombe ’landi ya kola o ’kendâ ’anyu, na ngâi ibale, na makogo, na metumbe: (ikabojana ua ’havu a weyango beja beaju.) 11O mbok‘ ’anyu tombe ibâkâ janyu i ka pâyě jěhěpi, batakěni a didi omě weyango; o ka diyakani omě diya, kwanga n‘ inyěni o ka valěni. 12O pângěni o ndabo, homaki yâni. 13Oningě ndabo tě e didi weyango, jonga janyu i diyak‘ omě; ndi oningě e diye weyango, jonga janyu i timbake n‘ inyěni. 14A ka měndě a ngidě ’nyěni, na mâ‐a yoke ndaga janyu, o inyěni o ka věngěměni o ndabo těně na ba mboka těně, pupwakani mahě ma beko beanyu. 15Mbi vâkândi n‘ inyěni pâkwěpâkwě, na, E ka diyandi bobâbu wa na ehe ya Sâdâm na Gomâra o buhwa boa yěkě, wa na ya mboka těně.
16Umbwakiyate, Mbi lomakandi ’nyeni panika medâmbě o ngalakabo ya njâ; diyakani na bokele ka mbamba, hwěyi ona mbenga. 17Ndi bandamakiděni opěla bato; ikabojana ba ka věndi ’nyěni o behoka, na bâ‐ba ka bomaka ’nyěni o ndabo jabu ja Anyambě; 18o ka vanwěndini o meoho mea Gâven na mepolo, o nyang‘ ’amě, ka tali o bâ na Betomba be jadi. 19Ndi o nakakeni nyang‘ ’anyu e ka kalě, o bâ‐ba ka vě ’nyěni; ikabojana nyang‘ ’anyu e ka kalě e ka věwěndi ’nyěni o iwěla tědině. 20Ikabojana, ba ’bě inyěni o kalakě, ndi Ilina ja Hangw‘ ’anyu ndi i kalakě inyěni o jadi. 21Ba nyangwě pâkâ ba ka věněndi ka weywě, na hangwě a věkě mwana; na bana ba ka těmiyi ba hangwě na ba nyangwě na ba weyakwě. 22O ka binwěndini na běhěpi o nyanga ya dina jamě: ndi a ka lilimidě nala ihuku mâ ndi a ka hunginwě. 23Oningě ba ha inyěni njuke o mboka těkaně, kweyakani o epâkwě: ikabojana Mbi vâki n‘ inyěni pâkwěpâkwě na, Wa maděni ivala o mamboka ma Israěl, ndi Mwana moto a pâye.
24O ibě na eyokwedi e di wa na uyokwidi muaju, tombe uhayi wa na a pangakiyě mâ. 25E twětwě na eyokwedi e diyaka ka uyokwidi muaju, na uhayi ka a pangakiyě mâ. O pě lě ba tuba lě hangwe ya ndabo, na, Biělsibub, ndi na kumbakidě ibaju ba ndabo. 26Nandi, o bangaki bâni: ikabojana o ibě n‘ elombo e di vihamango e ka měndě e saliye; na ya kutamango, e ka měndě e yowaně. 27Nyang‘ ’amě e langwakiyě ’nyěni o ikutakuta, kalaki yâni o bwe; na nyang‘ ’anyu e yokakě o ditâ, kalaki yâni o menyuwa. 28O bangakeni ba weyakě nyolo, ndi ba yâlě o weya ilina; ndi bangakani a didi a yâlâkě o weya n‘ ilina na nyolo ta o Hěl. 29Těmbělěmbě ibale ja hambakwě farthing pâkâ? ndi na ya pâkâ ya kwe o he Hangw‘ ’anyu aa diye. 30Ndi, na howe janyu ja molo jěhěpi i ndi langwěngo. 31O bangakeni, o ndini ihambe wa na těmbělěmbě iitě. 32Uěhěpi a ka měmě ’Mba o boho boa bato mâ tepě uuamě a ka měmiyě o boho boa Paia a jad‘ o Hěvěn. 33Ndi uěhěpi a ka hâhiyě ’Mba o boho boa bato, mâ tepě uamě a ka hâhiyě o boho boa Paia a jad‘ o Hěvěn.
34O piviyakeni na Mbi viyi ka vě jonga o he; Mbu vaka ka vě jonga, kabo ukwala mu‘ ibâtâ. 35Ikabojana Mbi pândi ka hihidě momo na hangwě, na mwa mwajo na nyangwě, na ubâmbi na nyangwě ya ua momo. 36Baloni ba moto ba te ba ndabo ’aju mětě. 37A tândâkě ba hangwě na ba nyangwě wa n‘ Umba a ’bě weyango o diya uamě; na a tândâkě ba mwa momo na ba mwa mwajo wa n‘ Umba a ’bě weyango o diya uamě. 38Tepě a ka měndě a nânge krâs ’aju, na mâ‐a vitě ’Mba, a ’bě weyango o diya uamě. 39A duwakě eměnâ ’aju a ka nyangi yâ; ndi a nyangakě eměnâ ’aju o nyang‘ ’amě a ka duwi yâ.
40A pahiyandi ’nyěni, a pahiyandi ’Mba; a pahiyandi ’Mba a pahiyandi a lomaki ’Mba. 41A pahiyandi usâki na dina ja usâki a ka pahiyi mahomano ma usâki; a pahiyandi mot‘ uyamu na dina ja mot‘ uyamu a ka pahiyi mahomano ma mot‘ uyamu. 42Tepě, uěhěpi a ka mâtidě ua bahâlě ekaba umbâkâ imâgi ja miba ma vâdu pu, o dina ja eyokwedi, Mbi vâki n‘ inyěni na pâkwěpâkwě, na, A nyangě mahomano maju na vilolombo.
Tans Gekies:
Matyiu 10: BNG1895
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Published by the American Bible Society in 1895.
