Matiusu 1
1
O Yesusu ai totofora manga roma-romanga de manga lape-lapeuku
Lukasa 3:23-38
1Ahi gogianongoru, ahi demoino naa de tinihingahu nginika ma titi o Yesusu Kristusu ai totofora. Abe Una to Dautu nanga koano ma dihiraino ai toforauku, de ngaro o Abarahaama abe una gea nanga tofora duru ma dodihiraka, masara o Yesusu Unangoo to Abarahaama ai toforauku. De ma dodihirainohi de Ma Jou wonahibehehongoka ngoneino wato wohidingoto nanga Koano ngoneuku, de naa ma duru de wihidingotoka o Yesusu la wodadi nanga Koano gea. Ho naa tinihingahu ma titi to Una ai totofora la ngini duru nihioriki abe Una to Abarahaama de to Dautu manga toforauku idodutu.
2De hokonaa ai totofora manga roma-romanga abe o Abarahaamoka de auku yolape-lapeuku ka hiadono nanga koano o Dautuku.
O Abarahaama to una ai ngofaka ai romanga o Isaka,
de ipahaino o Isaka ai ngofaka o Yakubu.
De ukuoli o Yakubu to una ai ngofaka gea o Yehuda de ai roria-dodoto.
3De ukuoli o Yehuda ai ngofaka o Perese de o Sera, abe ona gea to ona manga meme o ngo Tamara.
De ukuoli to Perese ai ngofaka gea o Heserono,
de ukuoli to Heserono ai ngofaka o Rama.
4De ukuoli to Rama ai ngofaka o Aminadaba,
de ukuoli to Aminadaba ai ngofaka gea o Nahasono,
de ukuoli to Nahasono ai ngofaka o Salamono.
5De ukuoli to Salamono ai ngofaka o Boasa, abe ai ngofaka ngoi meme gea o ngo Rahaba.
De ukuoli to Boasa ai ngofaka o Obede, abe ai ngofaka ngoi meme o ngo Ruutu.
De ukuoli to Obede ai ngofaka gea o Isai.
6De ukuoli o Isai ai ngofaka abe to ngone nanga koano ma dihiraino o Dautu.
De hokogea o Yesusu ai totofora abe o Abarahaamoka de auku ka hiadono o Dautuku.
De naa tinihingahu ma titi to Dautu ai totoforauku o Isiraele ma nyawa abe yolape-lapeuku ka hiadono ma oraha o homoa ma nyawa yangohama de yataoko. Abe ma oraha gea o Isiraele ma nyawa yodadioka o nyawa manga gogilaongo de yaoika manga dutu manga tonakoka abe gea o Babele ma tonakoka.
Ho nanga koano o Dautu ai ngofaka gea ai romanga o Saloomo, abe ai ngofaka ngoi meme gea mofaooka angamoi muna ma dihiraino modadi to Uria ngoi fekata masara una wohonengoka.
7De ukuoli o Saloomo ai ngofaka gea o Rehabeama,
de ukuoli o Rehabeama ai ngofaka o Abia,
de ukuoli o Abia ai ngofaka gea o Asa.
8De ukuoli o Asa to una ai ngofaka gea o Yosafata,
de ukuoli o Yosafata ai ngofaka o Yorama,
de ukuoli o Yorama ai ngofaka gea o Usia.
9De ukuoli o Usia ai ngofaka gea o Yotama,
de ukuoli o Yotama ai ngofaka o Ahasa,
de ukuoli o Ahasa ai ngofaka gea o Hisikia.
10De ukuoli o Hisikia to una ai ngofaka gea o Manase,
de ukuoli to Manase ai ngofaka o Amono,
de ukuoli o Amono ai ngofaka gea o Yosia.
11De ukuoli o Yosia to una ai ngofaka gea o Yekonia de ai roria-dodoto, abe ona gea yomaboa ma oraha o Babele ma nyawa yoboaino de yahikala o Isiraele ma nyawaika hiadono yataoko de yaoika o Babele ma tonakika.
12De naa tinihingahuoli abe ma titi to Yesusu ai totofora utuoli abe ona yowango ma oraha o Isiraele ma nyawa naga o Babele ma nyawa manga kuahaka de ka hiadono ma oraha o Yesusu womaboa.
Ho o Yekonia ai ngofaka ai romanga o Seatiele,
de ukuoli o Seatiele ai ngofaka gea o Serubabele.
13De ukuoli o Serubabele ai ngofaka gea o Abihudu,
de ukuoli o Abihudu ai ngofaka o Eliakimi,
de ukuoli o Eliakimi ai ngofaka gea o Asoro.
14De ukuoli to Asoro ai ngofaka gea o Sadoko,
de ukuoli to Sadokoli ai ngofaka o Akimi,
de ukuoli o Akimi ai ngofaka gea o Eliudu.
15De ukuoli o Eliudu ai ngofaka gea o Eleasara,
de ukuoli to Eleasara ai ngofaka o Matana,
de ukuoli o Matana ai ngofaka gea o Yakubu.
16De ukuoli to Yakuboli ai ngofaka o Yusupu abe una wodadi to o ngo Maria ami rokata. De o ngo Maria muna gea abe o Yesusu womaboa munangino.
De o Yesusu Una gea abe iwihiromanga Unangika ato o Kristusu nanga Koano abe Ma Jou wonahibehehongoka ngoneino.
17Ho ona mata-mata abe manga roma-romanga tinihingahuoka, ona gea yodadioka to Yesusu Kristusu ai totofora. De nako ngone haetongo to ona manga lape-lapeuku abe ma dodihiraka o Abarahaamoka de auku de ka hiadono nanga koano o Dautuku, gea manga lape ngimoi de iatuku. De abe nako haetongoli manga lape abe ma oraha o Dautoka de auku abe ka hiadono ma oraha o Isiraele ma nyawa yataoko de yaoika o Babele ma tonakika, de gea enangoo naga manga lape ngimoi de iatuku. De nagali ma lape ngimoi de iatukuoli abe nako to ona manga lape haetongo abe ma oraha o Isiraele ma nyawa naga o Babele ma tonakoka de ka hiadono womaboa nanga Koano o Kristusu.
Abe ma titi o Yesusu womaboa
Lukasa 2:1-7
18-19De hokonaa ma ade-ade ma oraha womaboa o Koano abe Ma Jou ma dihirainohi wonahibehehongoka ngoneino abe gea ai romanga o Yesusu. To Una ngoi meme o ngo Maria abe ma dihirainohi yahidatarunokau muna de womatengo o nauru ai romanga o Yusupu. Masara ona ko yomatoomuahi de muna momahioriki naga de ami badangoka. Masara o Yusupu ka de una womihioriki de womatemo ai hiningaka wato, “Ami ngofaka gea ko to ngohiua.” De gea wagoungu ko to unangua masara Ma Jou o Womaha womihidadi de ai kuaha hiadono muna de ami badangoka ngaro ko ma moiuahi yomakitigi de o nauru. De o Yusupu ai wowango hatoli itiai angamoi una duru wotobahingounu o Yahudi ma nyawa manga agama ma paretaika. Ho womatemo ai hiningaka wato, “Muna gea kiani tomioluku dika, ma ko toigoua tomihimaleke o nyawa manga himangoka. Ho naa kiani o ngo-ngoluku ma hurata ngohi todiai la ufa o nyawa ihioriki done o ngo Maria imimaleke.” Hokogea o Yusupu ai hininga ma hidee.
20Masara o Yusupu ai hininga ma hidee gea ka womahohiningahi de o Yusupu wobuluhara. De ai buluhara ma goronaka de naga Ma Jou ai malaekata womatengo womahimatoko de witemo unangika wato, “Yusupu, to Dautu ai toforauku, ngaro ufa nahuha nomile o ngo Maria gea. Angamoi o ngofaka gea ami pokoroka ko o nyawainoua masara gea Ma Jou o Womaha abe womihidadi de ai kuahaino hiadono ami ngofaka idadi. 21Ho o ngo Maria ahao momagerewoto de ami ngofaka o nauru, de ngini kiani niwihiromanga o Yesusu, angamoi ma romanga gea ma titi, ‘Ma Jou o Yawe wonaduhunu to ngone nanga hohowonino.’ De kiani niwihiromanga hokogea angamoi Una gea ahao ai nyawa wahihohe manga howo-howonino.” Hokogea o malaekata wihitararono o Yusupika abe ma titi o ngo Maria ami ngofaka gea.
22De gea mata-mata kiani idadi la duru imaketero abe hoka duru ma dodihiraka Ma Jou wonahingahuokau ngone o nyawaino. Abe ai behehongo gea womatengo wihiakunu ai uru ma dodofanga la una gea wohitulihuku wato,
23 “Abeika, naga momatengo o moholehe abe muna ko ma iwahi yomakitigi de o nauru. De ngaro hokogea masara muna gea naga de ami badangoka. De muna ahao momagerewoto de ami ngofaka o nauru, De Una gea iwihiromanga o Imanuele.”
Hokogea ma dodihiraka Ma Jou ai uru ma dodofanga wohitulihuku. #1:23 Ma Jou ai uru ma dodofanga abe wihiakunu de o hingahu naa ai romanga o Yesaya de ai hingahu gea wotulihuku ngade-ngade o taongo o ratuhu tumidi ma dekana de ahao idadi. De Ma Jou ai hingahu gea idadi o dodunguu o Isiraele ma nyawaika la ma oraha o Yesusu womaboa ka idadi ona iwihioriki abe o ngofaka naa Ma Jou ai Behehongo abe duru ma dodihiraka wohibehehongo ma oraha o Adama de o ngo Hawa yahowono.
De ma romanga o Imanuele gea nako o Isiraele ma nyawa manga demo ma titi, “Ma Jou ka ihikaika naga de de ngone.”
24Ho gea o Yusupu ai buluhara ipahaino de womamaoino de wodiai abe hoka Ma Jou ai malaekata wihingahuoka unangika. Ho ipahaino de o ngo Maria womile la modadi to una ngoi fekata, de womiao ai tauika. 25De ngaro yomahitaumoioka masara ona ko yomatoomuahi ka hiadono ami ngofaka womaboahi. De ami ngofaka gea iwihiromanga o Yesusu.
Tans Gekies:
Matiusu 1: MJDD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gereja Firman Allah, Yayasan Misi Masyarakat di Pedalaman
