Matius 7
7
Nangkambelai pehalai
(Luk. 6:37-38, 41-42)
1“Nemo komi mehalai bona moma komi rahalai. 2Apa hante pehalaimi ee moto mui mei Alatala mampahalai komi. Pade pohuka to laipakemi nohuka, ee moto mui rapopohukaka komi. 3Napa pade karupu to i mata ompimu laihilomu, bo tompo kau to i rara matamu moto moma laihilomu? 4Bewa pade iulikamu ompimu, ‘Mai kulalikako karupu etu lako rara matamu,’ bo naria motomi tompo kau i rara matamu? 5He, tauna to nabelo wongko! Lali olu tompo kau lako rara matamu bona maraha karawa penaamu molali karupu to i rara mata ompimu.”
Bewa moparata patudu to nagaha
6“Nemo mipopewai hangu hangaa to nadea bununa i tingoo Alatala hi dike, apa wule rapegolihira komi mei pade rapakakerura. Pade nemo komi mampopewai watu mutia to nahuli olina hi wawu, apa wule ratanalihara moto'i.”
Nangkambelai honoia hambaya
(Luk. 11:9-13)
7“Perapimi, kana rawaika komi. Palimi to iparaluumi, kana mirata moto'i. Kadomi womo, kana rabeaka komi. 8Habana butu tauna to merapi kana mantarima napa to laiperapina, butu tauna to mampali kana mamparata napa to laipalina, pade butu tauna to mokado womo kana rabeaka womo. 9Naria komi to nampawaika watu anami, ane anami nerapi roti? 10Ba ane nerapi baura, laiwaikami ule? 11Aji, ane komi to nadaa ingkumi laincanimi nampawaika anami to nabelo, neparauli Tuamami to i huruga. Hia kana mampawaika to nabelo hi tauna to nerapi hi Hia.
12Etumo, rara hangu hangaa, bewa ingku to mipokono rababei tau ntanina hi komi, babeimi ewa ee hi tau ntanina. Apa eemi koropokona ihi buku Taurat pade buku nabi-nabi.”
Dala to nakono
13“Pehuamo i womo to natuhu. Apa nawela womo pade naluo dala rau kamatea duu kahae-haena, pade nadea tauna nantara i hee. 14Naupawee natuhu womo pade nagopi dala rau katuwua to moma maria kahuduana, pade hodi aga tauna to namparata dala ee mai.”
Nangkambelai nabi to moma nakono
15“Mainga komi hi nabi-nabi to moma nakono to marata hi komi to ntumoni noingku nabelo ewa bimba, bo kakonona hira ee mai ewa serigala to naheke. 16Lako pokaingkura mengkaomo komi hemara kakonona. Moma naria wua anggur nehuwu lako rui, ba wua ara nehuwu lako dunumpu rui. 17Wee moto mui butu puu kau to nabelo nampopehuwu wua to nabelo, pade butu puu kau to nadaa nampopehuwu wua to nadaa. 18Puu kau to nabelo moma'i nampopehuwu wua to nadaa. Wetu moto mui puu kau to nadaa, moma'i nampopehuwu wua to nabelo. 19Pade butu puu kau to moma nampopehuwu wua to nabelo, ratowo pade ratene i rara apu. 20Aji, lako pokaingkura, mengkaomo komi hemara kakonona.
21Moma humawee tauna to nangkio-'A, ‘Pue, Pue!’ to mawali todea i rara poparentaa Alatala. To mawali todea i rara poparentaa Alatala, hira to nampoingkuka to laipodota Tuama-Ku to i huruga aga. 22I eo pobotuhia, madea mei tauna mangulika-'A, ‘Pue, Pue, kami ei noparata peboha Alatala pade nampopalai anudaa lako hi tauna nampake hanga-Mu. Laibabei kami mui nadea ngaa to nepakahera nampake hanga-Mu.’ 23Tempo ee mei Ku'ulikara, ‘Moma komi laincani-Ku! Palaimo komi lako tingoo-Ku, humaweemi to nadaa ingkumi.’ ”
Rongaa pondasi
(Luk. 6:47-49)
24“Etumo, butu tauna to nangepe napa to laiuli-Ku pade laipoingkukana, hia nahibali hante tauna to nadea timbana to nobabei houna i lolo watu. 25Napu ee nanaumi uda bohe pade narata ue mowo hante ngolu bohe namparumpa hou ee. Hou ee mai moma'i napongka apa laipopokangkore i lolo watu. 26Naupawee, butu tauna to nangepe to laiuli-Ku pade moma'i laipoingkukana, hia nahibali hante tauna to nadoyo to nobabei houna i lolo talabone. 27Napu ee nanaumi uda bohe pade narata ue mowo hante ngolu bohe namparumpa hou ee. Hou ee mai napongka pade nadaa mpuu kagerona.”
Namangka pura tauna to nangepe patudu Pue
28Nahudupi Yesus nanguli popatudu-Na lauria, namangka purara todea to nangepe, 29apa moma-'Ihana nopatudu ewa hira to nataualu buku Taurat. Hia nopatudu hante baraka.
Tans Gekies:
Matius 7: MYL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
