Yohanes 3
3
Pojarita Yesus hante Nikodemus
1Naria hadua to Farisi, hangana Nikodemus. Hia ee mai hadua to pangkeni agama Yahudi. 2Hangkani tempo ngkawengiana, Nikodemus narata hi Yesus, nanguli iwei, “Rabi, laincani kami ane Iko narata halaku guru to laihuro Alatala, apa moma hema haduaa tauna to mamala mobabei tanda-tanda to nepakahera ewa to laibabei-Mu, ane moma'i laipodohe Alatala.”
3Nehono Yesus, “Mpuu-mpuu Ku'ulikako, moma hema mamala mawali todea i rara poparentaa Alatala ane moma'i raote nculi.”
4Iuli Nikodemus hi Yesus, “Bewami tauna raote nculi ane matua'ipi? Apa mamala'i mehua rara ntai tinana pade raote nculi?”
5Nehono Yesus, “Mpuu-mpuu Ku'ulikako, ane hadua tauna moma'i raote nculi lako ue bo Inoha to Nagaha, moma'i mamala mawali todea i rara poparentaa Alatala. 6Woto manuhia naria habana laipoanaka totuana. Naupawee katuwu to nabou laiwaika Inoha to Nagaha. 7Nemoko mahera habana iulika-Kuko, kana raote nculiko. 8Butu tauna to laiote lako Inoha to Nagaha ewa ngolu to nantawiri rau rima dotana, pade iepemu monina, naupawee moma incanimu lako rima'i narata ba rau rima'i.”
9Nangepe to iuli Yesus lauria, nepekunemi Nikodemus, “Bewa to ewa lauria madupa?”
10Nehono Yesus, “Iko ei mai guru jumaa to nopatudu to Israel, bewa pade momako nengkao to ewa lauria? 11Mpuu-mpuu Ku'ulikako, kami nanguli napa to laincani kami pade nampojarita napa to ihilo kami, naupawee moma'i parahayami napa to iuli kami. 12Bewami miparahaya ane Ku'ulika komi nangkambelai to nadupa i huruga, bo to iuliku nangkambelai to nadupa i dunia moto moma'i laiparahayami? 13Poma naria tauna to nariami nengkahe rau huruga. Wuwu Ana Manuhia aga, apa Hia nehompo lako huruga. 14#Bil. 21:9Pade nahibali hante Musa nobabei ule lako tambaga i tongo mpada to nabai, laiparikana i kau pade laiorena pakalangkona, wee moto mui Ana Manuhia kana raore rapakalangko#3:14 Rara buku Yohanes, raore rapakalangko ee tolu ngaa batuana. Hangaana: Yesus raparika i kau salib, karongaana: rapakatuwu nculi, pade katolungaana: raore rau huruga., 15bona butu tauna to neparahaya hi Hia mamparata katuwua to moma maria kahuduana. 16Habana nabohe mpuu towe Alatala hi manuhia i dunia ei, hampena laipopewai-Na Ana hadudua-Na, bona butu tauna to meparahaya hi Ana-Na ee mai moma mamate duu kahae-haena, naupawee mamparata katuwua to moma maria kahuduana. 17Apa patuju Alatala nampahuro Ana-Na narata i dunia moma tumai mampahuku manuhia, naupawee tumai-'I mampakahalama manuhia. 18Hema to meparahaya hi Ana Alatala ee mai, moma'i rahuku. Naupawee hema to moma meparahaya, tauna ee mai laihuku Alatalami, apa moma'i neparahaya hi Ana hadudua Alatala. 19Alatala kana mampahuku manuhia, apa naratami baa i rara dunia, naupawee laipokonorapi manuhia kalimauana lako kabaana, habana ingkura nadaa. 20Apa hema-hema to nadaa ingkuna, laipodaana to nabaa. Moma'i nadota narata i baa ee mai, bona ingku-ingkuna to nadaa ee mai moma'i rahilo. 21Naupawee hema-hema to nampoingkuka to nakono, hia ee mai narata hi baa, bona rahilo ane ingku-ingkuna nantuku dota Alatala.”
Yohanes to Pediu nangkewo hema Yesus kakonona
22Napu ee raumi Yesus hante ana-ana guru-Na i Yudea pade no'oharamo i ria, pade i ria Yesus nediu. 23Naupawee Yohanes nediu mui'ihawo i ngata Ainon, to namohu ngata Salim, apa i hee nadea ue, pade tau-tauna narata laidiuna i hee. 24Tempo ee mai Yohanes poma'i laipahua rara tarungku. 25Lauparia nonehalapaharamo ana-ana guru Yohanes hante hadua to Yahudi nangkambelai ada popakagaha woto to Yahudi. 26Napu ee rauramo hi Yohanes pade nangulika'i, “Rabi, tauna to nodohe hante iko i dipo Ue Yordan, to laiulimumi hi kami hema-'I, nediu mui-'Ihawo pade nadea tauna narata hi Hia.”
27Nehono Yohanes, “Palelemi. Moma mamala tauna mobabei hangu hangaa ane moma'i Napaliu Alatala. 28Iepemi motomi to iulikaku komi, ane aku ei moma'a Magau to Pepakahalama to laitipa Alatala. Naupawee aku laihuro mampoilodoka-'I. 29Yesus ee lairapaika hadua pongante balailo pade aku lairapaika bale pongante balailo to nopahadia huha ponikaa. Tempo ponikaa, nagoe mpuu bale pongante balailo nangepe pongante balailo ee nojarita. Wee moto mui hante aku, welau ei nagoe mpuu'a apa nadeami tauna nantuku Yesus. 30Hia kana mantambai dola pobunu-Na, bo aku kakuu-kuraa pobunuku.
31Hia to narata lako huruga, neliu pobunu-Na lako humawee manuhia. Habana manuhia narata lako dunia ei moto, pade to laipojaritana nangkambelai dunia ei aga. Hia to narata lako huruga, neliu pobunu-Na lako humawee tauna. 32Hia nanguli nangkambelai napa to ihilo-Na pade to iepe-Na, naupawee moma hema haduaa to namparahaya napa to iuli-Na. 33Hema to namparahaya napa to iuli-Na ee mai, tauna ee mai nangaku ane nakono hi Alatala. 34Apa Tauna to laihuro Alatala, noparata lolita Alatala, habana moma laihuka-Na Alatala nampopewai Inoha-Na hi Hia. 35Tuamata Alatala nampotowe Ana-Na, pade laiwaika-Na Ana-Na baraka moparenta hangu hangaa. 36Hema to neparahaya hi Ana-Na ee mai, hia mantarima katuwua to moma maria kahuduana. Naupawee hema to moma neturuhi hi Ana-Na, moma'i mantarima katuwua to moma maria kahuduana, hodo Alatala aga to maria oa hi hia.”
Tans Gekies:
Yohanes 3: MYL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
