मत्ती 7
7
दूसरेन पै दोस मत लगाऔ
(लूका 6:37–38,41,42)
1“तुम दूसरेन पै दोस मत लगाऔ जाते के तुम पैऊ दोस नांय लगायौ जाबै। 2#मर 4:24चौंकि जा तरीका ते तुम दोस लगाबतौ बाई तरीका ते तुम पैऊ दोस लगाऔ जाबैगौ, और जा नाप ते तुम दूसरेन काजै नापतौ बाई नाप ते परमेस्वर तुमारे काजैऊ नापैगौ।
3“तोए तेरे भईया की छोटी-छोटी बुराई तौ दीखतै पर तोए अपनी बडी-बडी बुराई नांय दीखत? 4जब तेरी ही आँख में लठ्ठाए तौ तू अपने भईया ते कैसे कैह सकै कै, ‘मैं तेरी आँख में ते तिनका निकार दऊं’? 5अरे ओ कपटी पैहले तू अपनी आँख कौ लठ्ठा तौ निकार लै जाते तू बड़िया तरैह ते देखकें अपने भईया की आँख कौ तिनका निकार सकै।
6“कुत्तान के आगे अपनी पबित्र चीजन कूं मत डारियों और अपने मोती सूगरन के आगे मत डारियो। कऊं ऐसौ नांय होय कै सूगर बिन्नें रौंदें और कुत्ता उल्टे तुमेंई फार खामें।
जो कछू तुम चाहतौ वाके काजै पिराथना करौ
(लूका 11:9–13)
7“परमेस्वर ते मांगौगे तौ तुमें मिलेगौ, ढ़ूढोगे तौ तुम पाऔगे, खटखटाऔगे तौ तुमारे काजै खोलौ जाबैगौ। 8चौंकि जो कोई मांगतै बू पाबतै और जो ढूंडतै बाय मिलतै और जो द्वार खटखटाबतै वाके काजै खोलौ जाबैगौ।
9“तुम मैं ऐसौ कौन सौ पिता है, जाकौ बालक रोटी मांगे तौ बू बाय पत्थर देय? 10और मछली मांगै तौ बू बाय सांप देय? 11जब तुम बुरे हैके अपने बालकन्नें अच्छी चीज दैबौ जानतें तौ तुमारौ सुरगीय पिता अपने मांगबे बारेन्नें अच्छी चीज चौं नांय दैबेगौ? 12#लूका 6:31जामारै तुम जैसो दूसरेन ते अपने काजै बरताब चाहतौ। बैसेई तुम दूसरेन के संग बरताब करौ। चौंकि परमेस्वर की व्यबस्था और परमेस्वर की बात बतायबे बारेन की जेई सिछाऐ।
सकरौ और चौंड़ौ रस्ता
(लूका 13:24)
13“सकरे द्वार के रस्ता ते भीतर घुसौ। चौंकि चौड़े दरबाजे कौ रस्ता नांस की ओर लै जाबतै, भौत से लोग ऐसै हैं जो चौढे रस्ता के दरबाजे ते जाय रये हैं। 14पर सकरे दरबाजे कौ रस्ता जीबन की ओर लै जाबतै बापे थोरेई लोग जाय रये हैं।
पेड़ और वाके फल
(लूका 6:43–44)
15“परमेस्वर के बारे में झूंठी बात बतायबे बारे जो परमेस्वर की ओर ते नांय तुम बिनते सावधान रहियों, जो तुमारे जौरै भेड़ के भेस में आबतै असल में बे फाड़बे बारे भेड़ियाएं। 16बिनके कामन ते तुम बिनकूं पैहचान लिंगे। चौंकि झाड़ीन में अंगूर और ऊँट कटारे में अंजीर नांय लगत। 17जई तरैह ते अच्छे पेड़ अच्छे फल लाबतै, पर बुरे पेड़ बुरे फल लाबतै। 18अच्छौ पेड़ कबऊ बुरौ फल नांय लाबै और बुरौ पेड़ कबऊ अच्छौ फल नांय लाबै। 19#मत्ती 3:10; लूका 3:9बू हरेक पेड़ जो अच्छे फल ना लाबै, बू काटौ जाबैगौ और आग में डारौ जाबैगौ। 20#मत्ती 12:33परमेस्वर के बारे में झूंठी बात बतायबे बारे जो परमेस्वर की ओर ते नांय तुम बिनकूं बिनके कामन ते पैहचान लिंगे।
सच्चे और झूंठे चेला
(लूका 13:25–27)
21“जो लोग मोय पिरभू पिरभू कैहतै, बिनमें ते सब परमेस्वर के राज में नांय घुसिंगे, पर बेई सुरगीय राज में घुसेगौ जो मेरे सुरगीय पिता की इच्छाऐ पूरी करतै। 22बा दिनां भौत से लोग कहिंगे कै, ‘है पिरभू मैंनें तेरे नाम ते भविस्यबानी नांय करी, का दुस्ट आतमान कूं नांय निकारौ और का तेरे नाम ते भौत से अचम्भे के काम नांय करे?’ 23तब मैं बिनते कैह दुंगो, ‘मैं तुमें कबऊ नांय जान्त। अरे कुकरमियों तुम मेरे जौरै ते चले जाऔ।’
मूर्ख और बुद्धिमान आदमी
(लूका 6:47–49)
24“जो आदमी मेरे वचनन नें सुनतै और बिनपै चलतै बू आदमी बा बुद्धिमान आदमी जैसौए, जानें अपनों घर चट्टान पै बनांयौ। 25बरसात आयी, बाढ़ आई और आँधी आयी तबऊ बा घर कौ कछू नांय बिगरौ और नांय बू गिरौ। चौंकि बा घर की नींव चट्टान पै हती। 26पर जो आदमी मेरी इन बातन्नें सुनें और उनपै नांय चलै, बू बा मूर्ख आदमी के जैसौए जाने अपनों घर बालू पै बनांयौ। 27और आँधी आई मेह बरसौ और बाढ़ आई और वाकौ घर बिनकी लहरन की टक्कराबे कें मारै मईं गिरकै सत्यानांस है गयौ।”
ईसू कौ अधिकार
28 #
मर 1:22; लूका 4:32 जब ईसू जि बात कैह चुकौ, तब भीड़ वाके उपदेस ते चकित भई। 29चौंकि बू सास्त्रन कूं सिखाबे बारेन की तरैह ते सिछा नांय देतौ पर अधिकारी की तरैह ते सिछा देतौ हतो।
Tans Gekies:
मत्ती 7: BRAJ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
NonCommercial-NoDerivatives 4.0 International (CC BY-NC-ND 4.0)
