Chenesis 2
2
1Yakohmi hosh ʋba moma, micha yakni, mikmʋt nana ai i̱ puta kʋt momʋt ʋlhtaiyaha tok.
2Mihma nitak ont isht untuklo ma Chitokaka yʋt natoksʋli ikbi tuk ʋt atahli tuk atok: micha nitak ont isht untuklo ma natoksʋli moma isht ahanta tuk ʋt foha tok.
3Micha Chitokaka yʋt nitak ont isht untuklo kak o̱, Chitokaka nana isht ikba chi̱ hosh ikbi tuk toksʋli puta kʋt yʋmmak o̱ issʋt a foha hatuk okʋt, holitoblichit hullochi tok.
4Ilʋppa puta kak osh Chihowah Chitokaka yʋt yakni, micha ʋba moma aiena ikbi tok, nitak a̱ ʋba moma, micha yakni aiena kʋt toba tok a̱ isht annoa hoke;
5Chihowah Chitokaka yʋt yakni, micha ʋba moma ikbi tok nitak a̱, haiaka itʋpushi moma kʋt yakni ya̱ ik ai iksho ma, haiaka haiyu̱kpulo moma kʋt ik ai offo ki̱sha tok: Chihowah Chitokaka yʋt yakni paknaka ik on umbacho hatuk o̱, mihma yakni toksʋla hi ʋt hatak nana kia iksho tok.
6Yohmi tuk kia yakni ya̱ a kifillit ʋba ia cha, yakni paknaka moma ka̱ shummichi tok.
7Mihma Chihowah Chitokaka yʋt yakni ya̱ lukfi ak o̱ ai ishi cha, hatak ikbi mʋt, ilhfiopak okcha̱ya ya̱ ibishakni chiluk ak o̱ fiopʋt fohki tok; mihma hatak ash osh shilombish okcha̱ya toba tok.
8Mihma Chihowah Chitokaka hʋt hʋshi akochaka imma yo̱ Eten a̱ osapushi ya̱ ahokchi tok; micha yʋmmak o̱ hatak a̱ ikbi tuk ʋt bohli tok.
9Micha Chihowah Chitokaka yʋt iti pisa achukma puta, micha ʋpa achukma aiena, iti aiokcha̱ya, micha iti nana achukma, micha nana ik achukmo aiena isht ai ithʋna yak kia osapushi iklʋnna hikia ka̱, yakni ya̱ ai offochi tok.
10Mihma okhina yʋt osapushi yash shummicha chi̱ kʋt Eten a̱ ai atehli cha, yʋmma ont ia mʋt, iti̱ filamohli cha, okhina ushta toba tok.
11Ʋmmona hohchifo kʋt Pison oke: yʋmmak osh Hafilah yakni moma, yʋmma tʋli lakna ʋt aiasha ka̱ apakfoyupa mak oke.
12Micha yakni yʋmma tʋli lakna a̱sha kʋt achukma hoke: yʋmma betellium micha oniks tʋli ʋt a̱sha hoke.
13Mikma okhina atukla hohchifo kʋt Kihon oke: yʋmmak osh Ehliopia yakni moma ka̱ apakfoyupa mak oke.
14Mikma okhina atuchina hohchifo kʋt Hittekel oke: yʋmmak osh Assilia i̱ hʋshi akochaka imma pit yanʋlli mak oke. Mikma okhina ai ushta kʋt Euflates ak oke.
15Mihma Chihowah Chitokaka yʋt hatak ash ishi cha, Eten osapushi ya̱ a toksʋlit atona chi̱ ho̱ bohli tok.
16Micha Chihowah Chitokaka yʋt hatak ash im apesʋt, Osapushi ya̱ iti aiasha puta ka̱ pilla ish ai ʋpashke.
17Amba nana achukma, micha nana ik achukmo aiena isht ai ithʋna iti ak okʋno chik ai ʋpo kashke: yʋmmak o̱ ish ai ʋpa hokʋto, i̱ nitak makinli ho̱ chilli pulla hi okʋt, achi tok.
18Mihmʋt Chihowah Chitokaka yʋt, Hatak ʋt ilap banot ahanta kʋt ik achukmoshke: apelʋchi ilap a̱ im ʋlhpiesa ho̱ im ikbi lashke, achi tok.
19Micha Chihowah Chitokaka yʋt nampoa yakni haiaka aiasha moma ka̱ yakni ya̱ ai isht ikbi tuk atok; micha hushi ʋba itʋnowa moma aiena ka̱ ikbi tuk ʋt Alam ʋt nana ho̱ hochifo na pisa chi̱ kʋt pehlichit isht im ona tok; atuk o̱ nan okcha̱ya puta ka̱ nana ho̱ A̱lam ʋt hochifokma, yʋmmak osh hohchifo hatok.
20Mihma Alam ʋt nanʋlhpoa moma, micha ʋba hushi puta, micha nampoa haiaka aiasha puta aiena ka̱ hohchifo imʋt tahli tok: yohmi kia Alam ak okʋno apelʋchi ilap a̱ im ʋlhpiesa kʋt iksho tok.
21Mihma Chihowah Chitokaka yʋt Alam a̱ nusi kʋllo ho̱ nusechi na, nusi tok: mihma naksi foni ya̱ achʋfalit ishi cha, yʋmmak atuk a̱ nipi ya̱ it afʋmmichi tok.
22Micha Chihowah Chitokaka yʋt hatak ash naksi foni im ishi tuk ʋt ohoyo ho̱ ikbi cha, ilauelit hatak ash isht im ona tok.
23Mihma Alam ʋt, Himak a̱ sa foni ya̱ ai achʋfa foni yoke, micha sa nipi ya̱ ai achʋfa nipi yoke: hatak o̱ ai ishi tuk oka, Ohoyo hohchifashke, achi tok.
24Yʋmohmi hoka hatak ʋt i̱ki, micha ishki ya̱ issa cha, tekchi ak o̱ asitia hi oke: mikmʋt itatu̱klo kʋt nipi achʋfa hi oke.
25Mihma hatak ash osh micha tekchi itatu̱klo kʋt nipi bano hosh aha̱shwa cha, hofahya iksho tok.
Tans Gekies:
Chenesis 2: CHH
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Published by the American Bible Society 1848-1886, reprinted 1913
