Luka 24
24
Matta Yesu gə taane
(Matta 28.1-10; Markus 16.1-8; Yohana 20.1-10)
1A fərə tiya lyentə#24.1 Fərə tiya lyenta Yawude nə fərə hiwtə. da Yawude, mandingɨn a maɗə ka haa dung-dung a nggur maare ka shi ɨhɨng-ɨhɨngye təna ɗa gə təna dɨ bəsə wo Yesu, a muɗə taane. 2Ite təna tɨlə hangɨn, təna niyə mye mgbəngtəngdə kaɓa farate a kwaamɨ taanəngɨn. 3Ite təna pɨrə taane a gonggorə faratə, tənaa naa sɨtɨ Həmɨmiye Yesu a haa mya bədən də. 4Təna kangə hangɨn haagərən tukut le ta ɓwarən, də a hangɨn təna nza naa ɓwaare kpe ka sɨɓwetɨ kungye dɨ ɓɨra hal-hal. 5Kala a gə mandingɨn, təna shelətə a tedə nyemingrən a njiya, mingɨn a ɗiyərən, “Ɓə ya hwuna dɨ ɨl ma ka myentə a waka wogye? 6Ndi tamdə ga, ɓə maggə we. Ɗyangam ka la nda boyownə ite sɨne a hakəwnə a Galili. 7Nda səwnə atɨ, ‘Ɓə nza mbak-mbak shingɨn inə kat a ɗa. Mye ɓa ɗərdi hɨn Nze da Ɓwaara mye ɓa vədi a tɨfə mi hashe, tən ɓa ɓɨdɨmdi a gbalti, beetɨ bətə mwaakɨn mgban hɨn ɓa maggə we ka myentə.’ ” 8Də a hangɨn təna shea ɗyanga ka la Yesu a boyərən.
9Təna ɗaka taane a mɨnə hwoɗye a dɨ boyə lagbe dan 'ye mbiɗi bəw a mbiɗi-hiɗə ləməgingɨn, ka mbiɗitɨ myee dɨ koɗə Yesu kat. 10Mandyee wudə taanəngɨn tənə yə Maryamu dɨ Magdala, ka Juwana ka Maryamu nuwogə Yakubu, ka i mandi. Təna sɨ boyə kpe-lagbe da Yesu shee ɗa. 11Kpe-lagbengɨn aa mwaka la mandingɨn a boyərən, təna nggur ləngɨn ləmə ɓayə. 12Kat ka angɨn Bitrus a maɗə ka taɗa a muɗə taane. Nda dɨ badə nəngɨn a yəngə taane, nda naa foowe nee gbəwo haa hiɗə. Nda mɨnə ta ndəli ka ləngɨn.
Lagbe kpe a nə tɨfə Imawus
(Markus 16.12-13)
13A fərəngɨn mgban imi kpe dɨ vorsərən a maɗə a dɨ muɗə itɨ vɨrati mya dɨ wa atɨ Imawus, kote kwi kpaksak ɓa ɗa meltə tukolukpe dɨ Urshelima. 14Ite təne a nə tɨfe dɨ muɗi, təna tiya byele a nə shee kat ɗa a Urshelima a vor bətɨngɨn. 15Təne a nə byele ka sə a nə tɨfe, Yesu asɨ parən, təna kpapə ta muɗi. 16Tən mingɨn Həmɨnpwa a kupadə kwa-hubosərən tənaa leyə atɨ sɨnə.
17Yesu a ɗiyərən, “Lə mɨnə hwuna ɗɨmə a dɨ boyə nə tɨfe ɓə?”
Le a ɓwarən təna virwo a kangə ɗəng-ɗəng ka humwa twakatə. 18Ma hiɗə dɨ vorsərən mya dɨ wa atɨ Kɨlopas a ɗiyə Yesu, “Hyenə hiɗə ome a vor Urshelima ma? Tee ɓə lee shee ɗa a vor bətɨna?”
19Yesu a ɗiyərən, “A ndo shi?”
Təna san, “A wule sa bəng Yesu anə dɨ vɨra Nazarat. Sɨnə kaɓa kpalə kɨr-kɨra dɨ ɗa səkushipe ka byelə gətə a humwa Həmɨnpwa ka ɓwaare kat. 20Kɨsehəmi kpan-kpanye ka həmi njiya dam a kɨsə a vədən, mya ɓashiyən ɓashi we a shea ɓɨdɨmdən. 21Zə niyi, she sɨnə ma hina dɨ bə myensenə a nəngɨn atɨ sɨnə ɓa luwa Israila gə kɨsawne. A vor bətə mwaakɨn tee pɨri shingɨn a ɗa kat. 22Aa la nə ɓəmbə, i mandi a wakasenə a mɨna venə ndəle. Təna maɗə ka haa dung-dung a zə taane, 23tənaa naa sɨtɨ Yesu. Təna mɨna asɨ boyenə atɨ təna naa malyenye, a 'ye boyərən atɨ Yesu nee ka myentə. 24Imi dɨ vorsenə mgban a wudə taane a pa ləngɨn ɓətɨya mandingɨn a boyo, Yesu ka nənəngɨn tənaa nan.”
25Yesu a ɗiyərən, “Mɨnə ɗa kwa-hubosəwnə aɓə kupaa she ya? Baa ɓəgəng hubosəwnə aa banga a tɨfe, hwunaa mwaka ləməgye kpalye a boyə vor Malɨmtɨ Ɗəmɗəmta? 26Giɓə kpalye səwnə atɨ mbak-mbak Ma Həmɨnpwa a Yaɓwarən ɓa sop tənətə ka shingɨn kat, nda ɓə ga shea pɨrə vor fukatɨ dan?” 27Yesu a shea nggura dimsə ləməgingɨn a tiya ka Musa zənə ləməgyee kpalye a doro, nda shea bɨlərən kpəshi la kat Malɨmtɨ Ɗəmɗəmtə a boyə nəngɨn, ndi Yesu.
28Ite təna tɨlə gbyel ka vɨrate mingɨn a dɨ muɗə də, Yesu a ɗa ɓətɨ ndi ɓa pɨrə a muɗə a haa. 29Təna nyisən a sa, “Wa bəə hakenə, gəkɨlə fəre poro kpalam.” A hangɨn Yesu a ɗɨrə a koɗərən a hwoɗye.
30Ite təna nza a ɓɨdɨmə ɓa zɨmshe, Yesu a nggur buroditə, nda ɗa Həmɨnpwa usəkətə, nda takarə a ɓyanarən. 31Də a hangɨn diingrən a shea wonə, təna leyə atɨ sɨnə, də mgban nda kipgərən. 32Təna ɗiyəsə, “Ɓə ya ite nda dɨ byelə kam a nə tɨfe nzɨmsəm aa moɗəm a bɨləm naarə ləməgye mya doro vor Malɨmtɨ Ɗəmɗəmta?”
33A hangɨn ɗəng təna mɨna maɗa a kɨsa tɨfe a mɨnə Urshelima. Təna pa mbiɗitɨ lagberə bəw a mbiɗi-hiɗə a hwoɗye, təne peyi ka mbiɗitɨ myee mwadiyale ka Yesu. 34Myee a vor hwoɗye a sarən atɨ, “Ka diyale Həmɨmiye maɗə ka myentə, ɓə dɨma ka Siman.” 35Minə kpe mɨna dɨ Imawus a pɨra bwelə sa təna nan a nə tɨfe ite təne dɨ muɗi, ka ite təna shea leyə atɨ Yesu nə, ndi ta nggur buroditə a ɓyanarən.
Yesu a dɨma ka lagbe dan
(Matta 28.16-20; Markus 16.14-18; Yohana 20.19-23; Lyenta 1.6-8)
36Təne a vor byele she a nə ləngɨn, ndi Yesu ka nənəngɨn a kangə wakasərən a sarən, “Maa ɗolta Həmɨnpwa a nza ɓwaa kəwnə!”
37Le a ɓwarən, kala a gərən, haagərən ɓətɨ kpiriti təna naarə. 38Nda ɗiyərən, “Ɓə ya le a ɓownə ka kala, mɨnə ɗa hwuna ɓə dɨ ɗa ndəle? 39Niyəmdə tyefi ka mbwayi, soɓwo hɨnə. Zəm pemi, gə hwun leyə atɨ kpiritə tamdə ka sɨtə ka oolye ɓətɨ hwuna dɨ nee kaarən.”
40Ite Yesu ɓe boyo sə nda bɨlərən tyefingɨn ka mbwayingɨn. 41Gəkɨlə hanɨngte lagbe dan a ɗa, peyi kat ka ndəle, tənaa mwadiyale atɨ Yesu nə. Nda ɓə ɗiyərən, “Hwunə ka sɨzɨmtə ganə ma?” 42Təna vən vaakə uutə. 43Nda luwo a tuulə diingrən kat.
44Də Yesu a sarən, “Di ləngɨn a na boyownə ite hɨne ɓwaa kəwnə, atɨ shee kat mya doro a vor ɓashita Musa ka Kpalye ka Dyemshe, mbak-mbak ɓa naa.”
45Nda wuna kwa-hubosərən gəkɨlə təna lee naarə shee mya doro vor Malɨmtɨ Ɗəmɗəmtə. 46Nda mɨna sarən, “Di ləngɨn a mya doro vor Malɨmtə atɨ, ‘Ma Həmɨnpwa a Yaɓwarən ɓa tənə nda ɓə mbɨrə, a mwaakɨnə bətə mgban ndi ɓa maggə we. 47Beetɨ angɨn a vor kwakɨngɨn mye ɓa hiwa mi vɨratə kat ləmə mbəha gə təna por-njiya, mya nggurərəngə səhase darən. Dɨ Urshelima mya tiya bwe ləməgingɨn.’ 48Hwunə myee naa shingɨn ka diingəwnə, hwunə mgban ɓa takaləngɨn a haka ɓwaare kat. 49Hɨn kana muɗə, hɨn ɓa lyanəwnə she ka Pitɨ Ɗəmɗəmtə ɓətɨ Baagi a vəwnə kwaame a nəngrə. Kulam a vor Urshelima, baa fəra mye ɓa jangəwnə də gəta Pitɨngɨn dɨ pwa də.”
Yesu maɗə muɗə pwa
(Markus 16.19-20; Lyenta 1.9-11)
50Dɨ bee Yesu a dɨmə ka lagbe dan a zə gbyel ka Betani, nda maddə tyefingɨn a pwa a ɗɨkərən fukatə. 51Sɨne a vor ɗɨktə dɨ ɗɨkərən fukatə, nda ɗakarən a maɗə pwa. 52Təna kalan-gbəətə, a mɨnə Urshelima ka hanɨngtə kɨr-kɨr. 53Fərə-fərə təne a vor Kwa-Shafe dɨ ɓondi Həmɨnpwa.
Tans Gekies:
Luka 24: bcy
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
