Luka 22
22
Yawuda mwa ɓa vədə Yesu
(Matta 26.1-5; Markus 14.1-2; Yohana 11.45-53)
1A vor bətɨngɨn ite sɨlangsətɨ Zɨm Burodite taa maɗə kaarə (ite mya wa atɨ sɨkwalə Lawuttə) ɓe sɨka, 2kɨsehəmi kpan-kpanye ka ji-lee kəndə ɓashita Musa a ɨl tɨfa tən ɓa koɗən gə təna kɨt Yesu a ɓɨlə haa ɓotə. Shezə kala mwanate ɓwaare ɓa maddə gə le dan a dɨ gərən. 3Də Shetan a pɨrə hubo Yawuda dɨ Iskariyoti hiɗə dɨ vor lagbe da Yesu 'ye bəw a mbiɗi-kpe. 4Yawuda a maɗə ɗəng a wudə haka kɨsehəmi kpan-kpanye ka nggɨraa dɨ gɨra Shafe. Təna peyə a shalale a nə ɗate tən ɓa ɗa nda vərən Yesu gə təna kɨsə a ɓɨlə. 5Təna ɗa hanɨngtə ka ite Yawuda a mwa ɓa vərən Yesu, təna mwa mgban ɓa vən taa. 6Yawuda a tiya ɨl təfəgi ɗate ndi ɓa ɗa gə nda vədə Yesu a haa ɓotə a haa təkə-təkətɨ ɓwaare aa ləkə də.
Yesu a zɨm sɨzɨmtɨ kwalə Lawuttə ka lagbe dan
(Matta 26.17-25; Markus 14.12-21; Yohana 13.21-30)
7Ite fərə sɨlangsətɨ Zɨm Burodite taa maɗə kaarə a kənə, a fəra mya dɨ hama ka ji-mbage də gə sɨkwalə Lawuttə, 8Yesu a lyen Bitrus ka Yohana, nda sarən, “Wudəm ɗamdə haa mya peyəm a zɨməmshi kwalə Lawuttə də.”
9Təna ɗiyən, “Ndo hanə hye dɨ mwo hina dɨ ɗadən?”
10Nda sarən, “Niyəm, hwun kana pɨrə vor vɨratɨngɨn, hwun ɓa peyə ka ama ka kyeɗəwtɨ haɓye. Koɗəmə mangɨn wudəmə hwoɗyee nda pɨrədə, 11hwuna boyə Həmɨ-hwoɗingɨn atɨ, ‘Nzə-kəndəshe nə dɨ ɗi le atɨ: A ndo haa gə vɨnə jangata omye, a haa hɨn ɓa zɨm sɨzɨmtɨ kwalə Lawuttə də ka lagbe de?’ 12Ndi ɓa bɨləwnə vɨnə pwatə kpan, mye ɗadən pepe. Hwuna ɗadə hangɨn gə zɨm shingɨn.”
13Təna muɗə, a pa shingɨn kat ɓətɨ Yesu a boyərən. Sə mgban təna ɗadə hangɨn gə zɨmshi sɨkwaləngɨn.
14A haa zɨm shingɨn, Yesu ka kpe-lagbe dan a dɨ nza a ɓɨdɨmə haa zɨmshe. 15Nda sarən, “Ka hɨmne na shi gə na zɨm sɨzɨmtɨ kwalə Lawuttɨnə kəwnə a mbəə na ɓə pɨrə tənətə. 16Gə-angɨn na dɨ səwnə, taa diyə ga zɨm wule sɨzɨmtɨnə baa, fəra naarə sɨkwalə Lawuttə ɓa naa kan gaarə a vor həmne da Həmɨnpwa.”
17Ndi ɓe bwe le she mbəə, nda nggur kpaa sopshe, nda ɗa hiwtə ka usəkətə a sarən, “Luwom hwuna ɓyana a wakasəwnə a soɓwo. 18Hɨnə dɨ səwnə, taa diyə ga sop mbwotɨ kada inabitɨnə ɓə, baa fəra həmne da Həmɨnpwa ɓa shikan.”
19Beetɨ angɨn nda nggur buroditə, nda ɗa Həmɨnpwa usəkətə, nda takarə a vərən kat. Nda sarən, “Sɨshi nə ingnə ite na vədə gə le dəwnə. Hwun ta ɗaasə gə hwun tawa ɗyanga ke.”
20Sə mgban, beetɨ ite tən zɨmshe mbəə kat, nda mɨna nggur kpaa sopshe a sarən, “Kpaanə na dɨ ɗifəwnə, kɨləsətɨ hwelti ite mya ɗa ka zaamba, a hɨn ɓa kəjidən gə le dəwnə. 21Shezə ma ɓa ɗərdi, sɨnə ganə a hanə nza dɨ zɨmshe ke. 22Hɨn Nze da Ɓwaara ɓa mbɨrə ɓətɨya Həmɨnpwa a boyo. Kək! Sə oti koyo ka mangɨn a ɓa ɗərdi.” 23Tən ta ɗiyəsə a wakasərən atɨ, “Wonə mangɨn a wakasəm, a ma ɓa ɗa wule sa?”
24Ndəlsətə a maɗə wakasərən a nə wonə magbake a vorsərən. 25Yesu a sarən, “Hwun leyə atɨ a vor vɨratɨnə həmye a duwa ɗa həmne ka mbamtə a nə ɓwaare, sə mgban myee ka gətə a dɨ bɨlə ɓwaare ɓətɨ tən mi twayi. 26Shezə aa kana hwuna ɗaasə. Ɓə kana ma atɨ sɨnə magbake a vorsəwnə, nda gə ɓətɨ sɨnə ma swaɗe. Ma mgban ka həmne, nda gə ɓətɨ kɨsa. 27Na ɗiyə atɨ ɓwaa, wonə pɨri ka gbaktə ɓə? Ma nza ɗəng mya dɨ ɗa sɨzɨmtə a nggura a vən a haa zɨmshe nə ma, naasə mgban ma dɨ verəwi ɗa sɨzɨmtə na? Dii ma nza mya ɗa sɨzɨmtə a nggura a vən a haa zɨmshe nə magbake. Zə niyəm hɨnə a vorsəwnə ɓətɨ nzə-hwoɗi dɨ ɗəwnə lyentə. 28Hwunə myee kanyi ɓwaa ke a vor tənətɨ de. 29Gə-angɨn mgban hɨnə dɨ vəwnə həmne ɓətɨya Baagi gaarə a vor pwa a vi. 30Hwun ɓa zɨmshe ke, hwuna soɓwo ke a vor həmne de. Nagi ndo ma a vorsəwnə ɓa nza nə ruutə a ɓashiyə kworyi mi Israila tən bəw a mbiɗi-kpe kat.”
31Yesu a sa, “Siman, a Siman, zə niyi! Shetan ɨlə gə nda shara gəwnə, ɓətɨ mya dɨ bula zumwe a shara a dɨmdə shifətə ka takɨɗe. 32Zə niyi Siman! Hɨn ɗa hiwtə gə le dəw, gə ɓe fukə. Shezə na hye fukə, hye kana maɗə a por-njiya, a mɨna ka mwadiyale, hye nyerədə mbiɗitɨ ji-nuwogu.”
33Bitrus a luwa a san, “Həmɨmiye, hɨn mwa ɓa koɗu. Nagi a vor gbərəwe ka we hye pɨrə, taa dɨ mɨna gu, hɨne ɓwaa kəw.”
34Yesu a san, “Bitrus, ɗekə kwamətə ta wa, hye ɓa məntəmə lee shi a laka mwaakɨn haa aɓə kɨɗa.”
35Yesu a ɗiyə lagbe dan atɨ, “Ɓətɨ ite na lyentəwnə a fərarə ta pititi də, taa zambɨramə də, hwunaa por i hwanyi, hwun ɗongə asə ma?”
Təna san atɨ, “Ə'ə, hinaa ɗongə asə.”
36Yesu a sarən, “Ɓəgəng ma ka pititə a nda nggura ka taa a vorsən, ma ka zambɨrame mgban, a nda dɨm omotə ka zambɨrame dan, ma taa sungwa kan, a nda ɗərdə rukute dan a ɗər sungwa hiɗə. 37Hɨnə dɨ səwnə, la mya doro na, a vor Malɨmtɨ Ɗəmɗəmtə atɨ, ‘Sɨnə mya bəltən a vor ji-ɗa sɨkpakye,’#22.37 Naasə: Ishaya 53.12. gəngnə mgban ləngɨn ɓa dɨ naa.”
38Lagbe dan a san, “Həmɨmiye, zə niyi, sungwe nə kpe.”
Nda sarən, “Ɓə kənə she.”
Yesu a ɗa hiwtə a nə Motɨ Kade Zetun
(Matta 26.36-46; Markus 14.32-42)
39Yesu a dɨmə a zə nə Motɨ Kade Zetun ka lagbe dan a beesən, ɓətɨ nda duwa ɗa. 40Ite tən ɓe tɨlə də, nda sarən, “Ɗam hiwtə gəkɨlə ɓe hwunaa pɨrə vor kanaha.” 41Nda gɨrgə lagbe dan, a muɗə humwa ɓyeləng, nda gyerə a ɗa hiwtə. 42Nda sa atɨ, “Baa, na hye mwa, hye nggurigə kpaa tənətɨnə hɨn ɓa soɓwo. Kat ka angɨn, ɓe koɗə kanatɨ de, koɗə hɨnggu.” 43Malyene a janga dɨ pwa, a gwadən, a nyerədən. 44Gəkɨlə sɨne a vor tənətə kɨr-kɨr, gə-angɨn nda mɨna ɗa hiwtə dwat, ruwasən ta tyanga dɨ sɨsən ɓətɨ zaambə.
45Ite Yesu a maggə haa nda gyerə a dɨ ɗa hiwtə də, nda mɨnə haka lagbe dan a parən təne dɨ sheni, gəkɨlə sɨsərən kpalagərən gə yedi-kɨttə. 46Nda ɗiyərən, “Ɓə ya hwuna pukə a dɨ shena? Maɗəm, ɗam hiwtə gəkɨlə ɓe hwunaa pɨrə vor kanaha da Nzə-tɨmbɨrha.”
Mye kɨt Yesu
(Matta 26.47-56; Markus 14.43-50; Yohana 18.3-11)
47Ite sɨne a vor byele ka lagbe dan, ɓwaare hananang a shi hakarən, ka ndi Yawuda, hiɗə dɨ vor lagbe dan, sɨnə luwa mingɨn kwamətə jipa Yesu dɨ wunakan ka shawa bwaka. 48Yesu a ɗiyən, “Yawuda, ka shew bwaka hye ɓa vədi hɨn Nze da Ɓwaara?”
49Ite lagbe da Yesu a naa sa dɨ muɗi, təna ɗiyən, “Həmɨmiye, a hina dər sungwe denə a tiya nyatə kaarən?” 50Hiɗə dɨ vorsən a viriwdə sungwa dan dɨ haka kɨsa da Kɨsahəmə kpane a saggə kwakɨngɨn a zɨme a dɨmdən vat. 51Yesu a sa, “Ɓe hwunaa yə nya, ɓə kənə she.” Nda pa kwakɨngɨn ɓoke a mbəə.
52Yesu a sa kɨsehəmi kpan-kpanye, ka ji-gɨra Shafe, kat ka mi kpan-kpanyee shi ɓa kɨttən atɨ, “Ɓə ya hwuna ɓə shi ɓa kɨtti ka sungwe ka gbɨlasakye ɓətɨ hɨn makpanə da ji-ɗa sɨkpaki? 53Giɓə fərə-fərə hɨne ɓwaa kəwnə a Kwa-Shafe, hwunaa ɗe asə. Fəre dəwnə nə supo, həmnə kulitə nee lyeni.”
Bitrus a məntəmə Yesu
(Matta 26.57-58; Markus 14.53-54,66-72; Yohana 18.12-18,25-27)
54A hangɨn təna kɨttən a ləkədən, a zəkan a hwoda Kɨsahəmə kpane. Bitrus a koɗən, ndi ta kər mbwayingɨn dɨ haa ɓongətə. 55Ite mya kɨsadə ɗiye a vor hwoɗye a dɨ yinə, Bitrus mgban a shi asɨ nza hangɨn. 56Itɨ nji-kɨsati, ite dɨ ɗa lyentə a vor hwoɗingɨn, a naa Bitrus a kwa-ɗiye gə ɓɨrtɨ ɗiyəngɨn. Ngga mɨna nidən pepe, ngga sa, “Manə təne ɓwaa kan.”
57Bitrus a məntəmə la ngga boyo a sa, “Metə, taa leerən.”
58Beetɨ angɨn aa ɓongə, ama nee kanyi də ɓə, nda nidə Bitrus a san, “Hye, hyene hiɗə dɨ vorsərən.”
Bitrus a luwa a san, “Hayu, hɨn tam a vorsərən.”
59Aa ɓongə, ama a mɨna shi ɓə, a mɨn-magba a sa atɨ, “Manə, sɨne ɓwaa kan gə ndi nzə-Galiliti.”
60Bitrus a mɨna məntəmətə a sa, “Maarə taa lee la hye dɨ boyo.” A hangɨn, Bitrus nee a vor byele ɗeke a wa. 61Həmɨmiye Yesu a ɓiya a nidə Bitrus a goyi diingɨn. Də Bitrus a ɗyanga ka la Yesu a boyən, “Ɗekə kwamətə ta wa, hye ɓa məntəmə lee shi a laka mwaakɨn haa aɓə kɨɗa.” 62Bitrus a dɨmə haa bwange a fɨl kawatə kɨr-kɨr ka kehee.
63Myee kɨsa Yesu dɨ nidən a tiya ta shartən ta dɨttən, tən ta lyebrən. 64Təna ɓwe diingɨn, tən ta san atɨ, “Zə kpali, hye kənenə ma lyebra.” 65Tən ta boyən ləməgi hashe som-som.
Yesu a humwaa peta ji-shalale da Yawude
(Matta 26.59-66; Markus 14.55-64; Yohana 18.19-24)
66Ka haa kɨɗatə, mi kpan-kpanye kat ka kɨsehəmi kpan-kpanye darən ka ji-lee kəndə ɓashita Musa, təna paya kat, mya shi ka Yesu a humwasarən. 67Təna san, “Anda hyenə Ma Həmɨnpwa a Yaɓwarən a lyana, boyenə pee.”
Yesu a sarən, “Nagi na boyownə, hwunaa dɨ mwake. 68Hɨn kana ɗiyəwnə le mgban, hwunaa dɨ mwa a mɨnedən. 69Dɨ fəranə supo, hwun ɓa ne hɨn Nze da Ɓwaara hɨne nza tɨfə zɨməngə Həmɨnpwa, ma ka gətə kat.”
70Təna ɗiyən, “Hye sa atɨ, hyenə Nze da Həmɨnpwa?”
Nda sarən, “La hwuna boyo atɨ hɨnə Nze da Həmɨnpwa, sə gən.”
71Təna boyəsə kat atɨ, “Ɓə lə mɨnə mbiɗi mya kɨləmə hakan ɗɨm? Mye kat kɨləm la nda boyo ka kwaamɨngɨn.”
Tans Gekies:
Luka 22: bcy
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
