Marko 4
4
1Na akatumbwili kawili kuyigalisa mu makigi mwa nyanja. Ni liwunganika kwake lipuga likulungu nyahope, mpaka akayingili mu liboti, ni akatemi pasi pa nyanja; ni lipuga lyoha likayili papipi ni nyanja pa ndima. 2Ni akawayigalisi fingi pa ngongo, ni akawatawalili pa mayigaliso gake, Muyufwanile: 3Lola, wa kumicha akapititi kumicha mbeyu yake: 4ni ikayili kukita pa kumicha, yingi yikagwili mu makigi mwa ndila, ni fikachiti fidege ni fikayilili ngani. 5Ni yingi yikagwili pa lutala, pala pakayili lepe ni lidupi lingi; ni hino apa yikameliti, ndawa yikayili lepa ni lidupi lya kubita pasi: 6ni apa lijuwa likakweliti, yikayutwiki; na ndawa yikayili lepa ni milela, yikayunditi ngani. 7Ni yingi yikagwili pa mifwa, ni yikakweliti mifwa, ni yikaniongiti, ni yikapambiki lepa. 8Ni yingi yikagwili pa lidupi linofu, ni yikapambiki fipambiko, kukwela ni kukula; ni yikahogwili, makumi gadatu, ni makumi ntanda, ni pa mia. 9Ni akajowiti, Yuyu ayii ni makutu ga kuyufwanila, ayufwane.
10Na apa akayili wakape, wala wakusyungutila yombe pamonga na kumi na wawili wala wakankotiti ngongo sila. 11Na akawajowili, Kwinu kipeliwi kya kuhyetu kya utwa wa Mulungu: leka kwa wala wa kunja, fyoha fikitike pa ngongo: 12nausi pa kulola walole, na wasiwona; na pakuyufwana wayufwane, ni wasiwalalila; pangi kwali yawang’anamuke kawili, ni kulekeleseka kwa wombe. 13Na awajowela wombe, Mumanya lepa ngongo iyi? na wuli yamumanye ngongo syoha? 14Wa kumicha amicha lilowe. 15Leka awa wayii wa pa makigi ga ndila, pala limichiwa lilowe; ni baha wamaliti kuyufwana, hino apa Shetani ahicha, ni anyaka lilowe lila limichiki mwa wombe. 16Na awa wiwi wayii wala wamichiki pa lutala, wala nawombe pala wayufwini lilowe, hino apa waliyupa ni kiheko; 17ni wayii lepe ni milela pa wombe wene, koma wayumalakila kwa lukumbi; payuma pake pakuwoneka mahumbuso pangi kuhyunga ndawa ya lilowe, hino apa wakuwasika. 18Na wangi wayii wala wamichika pa mifwa; awa wala wayufwini lilowe, 19na maholo ga miaka iyi, ni kukonga kwake kyuma, ni manyonyelo ga findu fingi fiyingila, filinionga lilowe, ni likitika lyangali fipambiko. 20Na wala wayii wombe wakamichiki pa lidupi linofu; wala nawombe wayufwana lilowe, ni waliyupa, ni wapambika fipambiko, pa makumi gadatu, ni pa makumi ntanda, ni pa mia.
21Na akawajowili, Wila nyali yitoleka kuwikika pasi pa kikong’ondela, pangi pasi pa kitala, ni nukuya kuwikika pandu pake? 22Pakuya payilepe kyakufihika, lema nausi kiwoneke pa lulanga; haka kya kumweya, lema nausi kiyiche pa lulangalila. 23Wona mundu ayii ni makutu ga kuyufwanila, ayufwane. 24Na akawajowili, Mulolaye kila muyufwanila: ni ndingo uwu mulinga nawo yaulingike kwinu: na, yakiyonjakaseke kwinu. 25Pakuya yuyu ayii nakyo, yakupelewe kwa yombe: na yula ayii nakyo lepa, haka kila ayii nakyo yakiwusike pa yombe.
26Ni akajowiti, Wiwi uyii utwa wa Mulungu, ngati mundu yatage mbeyu pa lidupi; 27ni yagone ni yayimuke kilo ni musi, ni mbeyu yayituke ni yayikule, umu amanya lepa mwene. 28Ndima wene uhogola; pakutumbula mhofu, panyuma pake mahojo, na panyuma pake kumemaseka pa mahojo. 29Leka apa fipambiko fikomela, hino apa atuma nyengo, ndawa kubena kufiki.
30Na akajowiti, Wuli yatihwananganise utwa wa Mulungu? pangi pa ngongo nyiki yatikokosele? 31Uyii ngati lungele lwa karadali, lula baha lumichika pa lidupi, haka luyii luchoko kulutila mbeyu syoha sya pa ndima, 32koma pala lutukiti, lukwela, ni lupata kuya lukulungu kulutila likolo lyoha, ni lukita ndafi sikulungu; mpaka madege ga mu nyingalila gahotola kujenga masakasa gawe pasi pa kifwili kyake.
33Ni pa ngongo nyingi ngati iyi akalongili nawo lilowe lila, umu wakahotwili kuliyufwanila: 34leka palema ngongo akalongili nawo lepa: koma pa mweya kwa wanafunsi wake mwene akakokosili fyoha.
35Ni pa ligono lilila, pa kufika kimihi, awajowela wombe, Tiyomboke kwisi. 36Ni kuleka lipuga, wantola yombe pamonga nawo, umu akayili, mu liboti. Ni maboti gangi gakayili pamonga nako. 37Ni lihicha limbupulu likulungu lya mbepo, ni mayiga gapyolela mu liboti, mpaka liboti likatumbwili kumema. 38Nuyombe mwene akayili pa mbingu, kugona lugono akasamili nsamilo: na wanjimusa, kunjowela, Mwalimu, wila nukuya kindu kwako titagika? 39Na akayimwiki, na akalakalili mbepo, nakajowiti kwa nyanja, Tama kinunu, ni ukitike lita. Ni mbepo yikayilimi, ni lukayili lumbwela lukulungu. 40Ni akajowiti kwa wombe, Ndawa kiki muyii ni woga? mukona nukuya ni kiyitakiso? 41Na wakayogwipi muni, kujowana yungi ni njini, Nani uyu ati, pakuya haka mbepo ni nyanja sinjufwanila?
Tans Gekies:
Marko 4: MGS1937
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
First published by the British and Foreign Bible Society in 1937.
